مەملەكەت باسشىسى قاسىم-جومارت توقاەۆتىڭ ۇيعارىمىمەن ەلىمىزدە اباي، ۇلىتاۋ، جەتىسۋ وبلىستارىنىڭ قۇرىلۋى جاڭا مازمۇنعا بەرىك قادام باسىپ وتىرعان قازاقستان مەملەكەتتىلىگىنىڭ بىرەگەي بەلەسى ەكەندىگىنە ەش كۇمان جوق.

ۇلى بابالارىمىزدىڭ اسىل مۇراسى رەتىندە جادىمىزدا ماڭگىلىك ساقتالىپ كەلە جاتقان قاسيەتتى اتامەكەنىمىزدىڭ بايىرعى اتاۋلارىنىڭ، ۇلت ۇستازى تانىلاتىن قاستەرلى تۇلعالارىمىزدىڭ ەسىمىنىڭ ەندىگى رۋحاني-مادەني عانا ەمەس، الەۋمەتتىك-ساياسي مانگە يە بولۋى ءدال قازىرگىدەي بەتبۇرىستى كەزەڭدە اسا وزەكتى.

بۇگىنگى اينالامىزداعى كۇردەلى گەوساياسي وقيعالاردىڭ كورىنىسى، كەشە عانا تاۋەلسىزدىگىمىزگە تونگەن ىشكى قاتەرلەر ەلدىك بىرلىكتىڭ، ۇلىستىق تۇتاستىقتىڭ قانشالىقتى ماڭىزدى، قىمبات ەكەندىگىنە تاعى ءبىر كوزىمىزدى جەتكىزدى. پرەزيدەنت جولداۋىندا مالىمدەلگەندەي، وتانشىلدىق رۋحتى، دەمەك ۇلتتىق كودىمىزدى ساقتاۋدىڭ وزەگى، اسىرەسە قازاق حالقى ءۇشىن تاريحي جادىمىزدا، رۋحاني مۇرامىزدا، البەتتە انا تىلىمىزدە تۇرعاندىعى اسپانداعى ايداي اقيقات.

ادامزاتتىق اۋقىمدا ويلاۋ بيىگىنە كوتەرىلگەن دانا ابايدىڭ، ۇلتتىق تۇتاستىقتىڭ رامىزىنە اينالعان ۇلىتاۋدىڭ، جەر ءجانناتى بولعاندىقتان دا ۇدايى سىرتقى جاۋلاردىڭ شاپقىنشىلىعىنا تاپ بولىپ، نەبىر اۋمالى-توكپەلى داۋىرلەردى باستان كەشكەن جەتىسۋدىڭ اتىمەن ءۇش بىردەي ىرگەلى وبلىستىڭ قۇرىلۋىنىڭ، ءبىزدى ويىمىزشا، اۋماقتىق قاجەتتىلىگىنەن بولەك ۇلىستىق ءمانى باسىم كورىنە بەرەدى.

ۇلىتاۋ، جەتىسۋ، اباي  -  قازاقستان حالقىنىڭ وسىناۋ ۇلى ۇعىمداردىڭ الدىندا ءاردايىم، كۇندەلىكتى ەسەپ بەرۋىن بىلدىرمەك. بۇگىنگى ءاربىر قوعام مۇشەسى اۋىل وقۋشىسىنان باستاپ استانا تورىندەگى شەندى-شەكپەندى قىزمەتكەردىڭ ارقايسىسى دەربەس مەملەكەتتە ءومىر ءسۇرۋدىڭ قادىرىن بەك ءتۇسىنۋ ءۇشىن ۇدايى وتان تاريحىنا دەن قويىپ، اباي، الاش وسيەتتەرىن جۇرەكتە ساقتاپ «بەس دۇشپانىن ءبىلىپ، بەس اسىل ىسكە كونىپ»، اقىل، قايرات، جۇرەكتى بىردەي ۇستاعان تولىق ادامعا اينالۋعا ۇمتىلىپ، وزىمشىلدىككە ەمەس وركەنيەتىلىككە، زياندىققا ەمەس زيالىلىققا، پاسىقتىققا ەمەس پاراساتتىلىققا بەت بۇرۋى قازىرگى جانە بولاشاق ءداۋىر تالابى.

تالاي قيلى زامانداردى، عاسىردان دا ۇزاق كورىنگەن قورعانسىز كۇندەردى باستان وتكەرگەن ەلدىگىمىزدە ۇلتتىق تامىرعا ورالۋ جولىمەن يدەولوگيالىق تۇتاستىقتىڭ ورناۋى الەۋمەتتىك تۇراقتىلىققا جەتكىزىپ، كەرى كەتكەندەردىڭ ەمەس، تەك قانا وزىق وركەنيەتتى قوعامداستىقپەن تەرەزەسى تەڭ دامۋعا باستايدى.

مۇحتار كارىباي،

وش قالاسى

Abai.kz