دەنساۋلىق ساقتاۋ مينيسترلىگى قازاقستاننان دارىلىك زاتتاردى ەكسپورتتاۋعا ۋاقىتشا تىيىم سالۋدى جوسپارلاپ وتىر. بۇيرىق جوباسى "اشىق نقا" پورتالىندا جاريالاندى.

قۇجاتقا سايكەس، 6 ايعا قازاقستان اۋماعىنان كەز كەلگەن نىسانداعى دارىلىك زاتتاردى، ونىڭ ىشىندە فارماتسەۆتيكالىق سۋبستانتسيالاردى، مەديتسينالىق ماقساتتاعى بۇيىمداردى، سونداي-اق ولاردى وندىرۋگە ارنالعان ماتەريالدار مەن كومپونەنتتەردى اكەتۋگە تىيىم سالۋ ۇسىنىلادى.

تەك مىنا جاعدايلاردا رۇقسات بەرىلەدى:

قازاقستاننان تىس جەرگە ترانزيتتىك جونەلتىلىم بويىنشا تاسىمالداناتىن جۇكتەر;
تەك جەكە پايدالانۋعا، جەكە تاپسىرىسقا ارنالعان مەديتسينالىق بۇيىمدار;
حالىقارالىق گۋمانيتارلىق كومەككە ارنالعان تاۋارلار;
بولشەك ساۋدا شەڭبەرىندە جەكە تۇتىنۋ ءۇشىن اكەلىنەتىن جانە ساتىپ الىنعان تاۋارلار;
تەگىن مەديتسينالىق كومەكتىڭ كەپىلدىك بەرىلگەن كولەمى جانە مىندەتتى مەديتسينالىق ساقتاندىرۋ شەڭبەرىندە الىنعان دارىلىك زاتتار;
ساتۋعا قۇقىعى جوق كورمەلەرگە ارنالعان ۇلگىلەر;
زەرتتەۋلەر مەن سىناقتارعا ارنالعان ۇلگىلەر;
پايدالانۋ ورنى بويىنشا دەنساۋلىق ساقتاۋ ۇيىمدارىندا وندىرىلگەن راديوفارماتسەۆتيكالىق پرەپاراتتار;
مەملەكەتتىك تىركەۋ كەزىندە ساراپتاماعا الىنعان ۇلگىلەر;
پاتسيەنتتىڭ نەمەسە ونىڭ دونورىنىڭ اۋتولوگيالىق بيوماتەريالدارىن پايدالانا وتىرىپ، جەكە قولدانۋعا ارنالعان كەڭەيتىلگەن تەراپيالىق ءدارى-دارمەكتەر;
ەاەو كەدەندىك اۋماعىنا كەلەتىن كولىك قۇرالدارىنىڭ جولاۋشىلارى مەن ەكيپاج مۇشەلەرىن ەمدەۋگە ارنالعان دارىلىك زاتتار;
حالىقارالىق مادەني، سپورتتىق ءىس-شارالارعا قاتىسۋشىلاردى جانە حالىقارالىق ەكسپەديتسيالارعا قاتىسۋشىلاردى ەمدەۋگە ارنالعان دارىلىك زاتتار;
قازاقستان وندىرۋشىلەرى شىعارعان، تىيىم سالىنعان "ست-1" نىسانىنداعى تاۋاردىڭ شىعۋ تەگى تۋرالى سەرتيفيكاتى بار دارىلىك زاتتار.
بۇيرىق جوباسى 6 ساۋىرگە دەيىن قوعامدىق تالقىلاۋعا ۇسىنىلعان.

Abai.kz