ەلوردادا باس ءمۇفتي ناۋرىزباي قاجى تاعانۇلىنىڭ توراعالىعىمەن قازاقستان مۇسىلماندارى ءدىني باسقارماسىنىڭ تورالقا ءماجىلىسى ءوتتى.

جيىندى اشقان قمدب توراعاسى ناۋرىزباي قاجى تاعانۇلى: «ساناۋلى كۇندەردەن سوڭ قاسيەتتى رامازان ايى باستالادى. مۇسىلمان ۇمبەتى ءۇشىن رامازان – ەرەكشە اي. مەيىرىم مەن كەشىرىمگە، ساۋاپقا تولى ايدى ادەتتەگىدەي ءوز دەڭگەيىندە وتكىزۋدى اللا ءناسىپ ەتسىن! وسى ايدا مەيلىنشە قايىرىمدىلىق ءىس-شارالاردى كوبىرەك اتقارۋعا شاقىرامىن» دەدى.

تورالقا ماجىلىسىندە نايب ءمۇفتي، شاريعات جانە ءپاتۋا ءبولىمىنىڭ مەڭگەرۋشىسى سانسىزباي قۇربانۇلى بيىل قاسيەتتى رامازان ايى 2 ساۋىردەن باستالاتىنىن، وزبەكستان، قىرعىزستان مۇسىلماندارى ءدىني باسقارماسىمەن كەڭەسىپ، وسىنداي ورتاق شەشىم قابىلدانعانىن اتاپ ءوتتى. ماجىلىستە «زەكەت جانە قايىرىمدىلىق» قورىنىڭ ديرەكتورى قانات قىدىرمين قاسيەتتى ايدا اتقارىلاتىن قايىرىمدىلىق ءىس-شارالار تۋرالى باس مۇفتيگە باياندادى.

ايتا كەتسەك، بيىل رامازان ايى 2 ساۋىردە باستالىپ، 1 مامىردا اياقتالادى. ورازا 30 كۇن بولماق. 2 مامىر – ورازا ايت كۇنى. 27 ساۋىردەن 28 ساۋىرگە قاراعان ءتۇن – قادىر ءتۇنى.

Abai.kz