بەيسەنبى, 19 قاراشا 2026
ايقاي 130 0 پىكىر 19 قاراشا, 2026 ساعات 15:18

سالىق قىسپاعى: 500 مىڭ كاسىپ جابىلۋعا جاقىن...

سۋرەت: جي ارقىلى جاسالدى.

ەلىمىزدەگى شاعىن جانە ورتا بيزنەس وكىلدەرىن تاعى ءبىر «سالىقتىق سىلكىنىس» كۇتىپ تۇرعان سىڭايلى. مەملەكەتتىك كىرىستەر كوميتەتى (مكك) ازىرلەپ جاتقان جاڭا تۇزەتۋلەر كۇشىنە ەنسە، ەلىمىزدەگى 300 مىڭنان 500 مىڭعا دەيىنگى جەكە كاسىپكەر (جك) ءوز قىزمەتىن تولىعىمەن توقتاتۋعا ءماجبۇر بولۋى مۇمكىن.

سالىق سالاسىنىڭ بەلگىلى ساراپشىسى، Uchet.kz كومپانيالار توبىنىڭ نەگىزىن قالاۋشى ماكسيم بارىشەۆ وسىنداي بولجام جاساپ وتىر. ماسەلەنىڭ ءمان-جايى نەدە جانە جاڭا رەفورما كىمدەردىڭ قالتاسىن قاقپاق؟ سارالاپ كورەيىك.

ەڭ تومەنگى جالاقى وسكەنىمەن، باستى قاۋىپ وندا ەمەس

الدىمەن ەڭ تومەنگى جالاقى (ەتج) مولشەرىنىڭ وسۋىنە توقتالساق. بۇل كورسەتكىش مىندەتتى زەينەتاقى جانە الەۋمەتتىك اۋدارىمداردى ەسەپتەۋگە تىكەلەي اسەر ەتەدى. ساراپشىنىڭ ايتۋىنشا، جالدامالى جۇمىسشىلارى بار كاسىپكەرلەر ءۇشىن ايتارلىقتاي سالماق تۇسپەيدى، ويتكەنى نارىقتا ەڭ تومەنگى جالاقى الاتىن قىزمەتكەرلەر وتە از.

ال جالدامالى جۇمىسشىسى جوق، وزىنە فورمالدى تۇردە ەڭ تومەنگى جالاقى تاعايىنداپ قويعان جەكە كاسىپكەرلەر ءۇشىن اي سايىنعى تولەمدەر شامامەن 10 مىڭ تەڭگەگە عانا وسەدى. ياعني، بەلسەندى جۇمىس ىستەپ تۇرعان بيزنەس ءۇشىن بۇل اسا اۋىر سوققى ەمەس.

باستى سوققى: «ۇيقىداعى» كاسىپكەرلەرگە سالىق سالۋ

ناعىز دۇربەلەڭ تۋعىزاتىن جاڭالىق — مەملەكەتتىك كىرىستەر كوميتەتىنىڭ ءىس جۇزىندە جۇمىس ىستەمەيتىن (ارەكەتسىز) جك-لارعا قاتىستى ۇسىنىسى. بۇگىندە ەلىمىزدە تابىسى جوق، ەسەپ تاپسىرمايتىن، بىراق رەسمي تىركەۋدە تۇرعان جۇزدەگەن مىڭ كاسىپكەر بار.

«مكك ەگەر جك ارەكەتسىز بولسا دا، ودان ەڭ تومەنگى جالاقى مولشەرىنە قاراي سالىق جانە بيۋدجەتتەن تىس قورلارعا تولەنەتىن باسقا دا مىندەتتى تولەمدەردى ءوندىرىپ الۋ مۇمكىندىگىن قاراستىرىپ جاتىر. قازىر بۇل ۇكىمەت ءۇيى مەن مينيسترلىكتەردە تالقىلانۋدا»، — دەيدى ماكسيم بارىشەۆ.

مەملەكەتتىك ورگاندار بۇل باستامانى دەپۋتاتتار الدىندا «جك رەتىندە تىركەلگەن ءاربىر ازامات ءوزى ءۇشىن مىندەتتى اۋدارىمداردى تولەۋى ءتيىس» دەگەن ۋاجبەن نەگىزدەۋى مۇمكىن.

نارىقتاعى «جاپپاي جابىلۋ» تولقىنى

ەگەر بۇل تۇزەتۋلەر قابىلدانسا، «قاعاز جۇزىندە» عانا تۇرعان كاسىپكەرلەرگە ەكى-اق جول قالادى: نە قىزمەتىن رەسمي تۇردە ۋاقىتشا توقتاتۋ، نە جك-نى تولىق جويۋ.

بۇل كەلەسى جىلى كاسىپكەرلىك سۋبەكتىلەرىنىڭ جاپپاي جابىلۋىنا اكەپ سوعادى. بارىشەۆتىڭ ەسەبىنشە، جابىلۋى مۇمكىن 300-500 مىڭ كاسىپكەر — ەلىمىزدە تىركەلگەن بارلىق 1,7 ميلليون جك-نىڭ شامامەن 30 پايىزى!

ايتا كەتەيىك، تازالاۋ ءۇردىسى بيىلدىڭ وزىندە قارقىن العان. ۇلتتىق ەكونوميكا ءمينيسترى سەرىك جۇمانعاريننىڭ مالىمەتىنشە، 2026 جىلدىڭ توعىز ايىندا ەلىمىزدە 20 مىڭ زاڭدى تۇلعا مەن 356 مىڭ جەكە كاسىپكەر ەسەپتەن شىعارىلعان. ونىڭ 43 پايىزىندا مۇلدەم تابىس بولماسا، 21 پايىزى ءوزىن-ءوزى جۇمىسپەن قامتۋشىلار (ساموزانياتىە) ساناتىنا وتكەن.

سالىق ورگاندارىنىڭ «كولەڭكەلى» ەكونوميكامەن كۇرەسىپ، ءتىزىمدى رەتكە كەلتىرگىسى كەلەتىنى تۇسىنىكتى. الايدا، تابىسى جوق قاراپايىم ازاماتتاردى مىندەتتى تولەمدەرمەن قىسپاققا الۋ — شاعىن بيزنەستىڭ تىنىسىن تارىلتىپ، نارىقتاعى بەلسەندىلىكتى ودان ءارى تومەندەتۋى ابدەن مۇمكىن. بۇل رەفورما بيزنەس ورتانى ساۋىقتىرا ما، الدە كاسىپكەرلىككە دەگەن قۇلشىنىستى وشىرە مە — ۋاقىت كورسەتەدى.

ءابىل-سەرىك الىاكبار

Abai.kz

0 پىكىر