پرەمەر-مينيستر ءاليحان سمايىلوۆ «قازاقستاندا قۋاڭشىلىق جىلدان-جىلعا كۇشەيىپ كەلەدى»، - دەيدى. بۇل تۋرالى ۇكىمەت باسشىسىنىڭ سايتىندا حابارلاندى.

24 ناۋرىزدا ەلوردادا پرەمەر-مينيستر ءاليحان سمايىلوۆتىڭ توراعالىعىمەن قازاقستان رەسپۋبليكاسى ۇكىمەتىنىڭ جانىنداعى داعدارىسقا قارسى شارالار جونىندەگى جەدەل شتابتىڭ كەزەكتى وتىرىسى ءوتتى. وتىرىس بارىسىندا جەدەل شتاب مۇشەلەرى اگروونەركاسىپتىك كەشەن سالاسىنىڭ بىرقاتار جەدەل، كۇردەلى  ماسەلەلەرىن قاراستىردى: كوكتەمگى ەگىس جۇمىستارىنا قوسىمشا قاراجات ءبولۋ، اۋىل شارۋاشىلىعى ءوندىرىسى ءۇشىن قاجەتتى تاۋارلىق-ماتەريالدىق قۇندىلىقتاردى جەتكىزۋ لوگيستيكاسىنىڭ نەگىزگى پروبلەمالارى ايتىلدى.

وتىرىستا قازىرگى سىرتقى ساياسي احۋالدىڭ الەم ەلدەرىمەن قاتار قازاقستاندا دا اۋىل شارۋاشىلىعى تاۋارلارىنىڭ، ونىڭ ىشىندە تەحنيكانىڭ، تۇقىمنىڭ، گەنەتيكالىق ماتەريالدىڭ، مينەرالدى تىڭايتقىشتاردىڭ جانە ت. ب. ونىمدەردىڭ قىمباتتاۋىنا تۇرتكى بولىپ وتىرعانى اتاپ ءوتىلدى.

بۇعان دەيىن ۇكىمەت وتىرىسىندا پرەمەر-مينيستر ءاليحان سمايىلوۆ اۋىل شارۋاشىلىعى مينيسترلىگىنە قارجى جانە ۇلتتىق ەكونوميكا مينيسترلىكتەرىمەن، «بايتەرەك» ۇبح» اق-مەن بىرلەسىپ، رەسپۋبليكالىق بيۋدجەتتى ناقتىلاۋ اياسىندا كوكتەمگى ەگىس جانە ەگىن جيناۋ جۇمىستارىن جۇرگىزۋگە 70 ملرد تەڭگە سوماسىندا قوسىمشا بيۋدجەتتىك كرەديت ءبولۋدى قامتاماسىز ەتۋدى تاپسىرعان بولاتىن.

وتاندىق ازىق-تۇلىك قاۋىپسىزدىگىن كۇشەيتۋ اياسىندا قر اشم باسشىسى يمپورتتىق تاۋەلدىلىكتى تومەندەتۋ ءۇشىن وتاندىق تۇقىم سۇرىپتارىن ازىرلەۋ باعدارلاماسى تۋرالى ايتتى. ۆەدومستۆو باسشىسىنىڭ ايتۋىنشا، اۋىل شارۋاشىلىعى مينيسترلىگى وتاندىق تۇقىمداردى ءوسىرۋ جونىندەگى جول كارتاسىن دايىنداعان.

«قىسقا مەرزىم ىشىندە وتاندىق تۇقىم سۇرىپتارى عىلىمىن دامىتۋ جونىندەگى ورتا مەرزىمدى باعدارلاما قابىلداۋ قاجەت. تۇقىم سۇرىپتارى ساپاسىزدانىپ، ونىمدىلىك تومەندەپ بارادى. جىلدان جىلعا قۇرعاقشىلىق بەلەڭ الۋدا. بۇل جاعدايدا قۋاڭشىلىققا ءتوزىمدى ءارى مول ءونىم بەرەتىن تۇقىمداردىڭ جاڭا سۇرىپتارىن ازىرلەۋ اسا ماڭىزدى»، - دەدى مينيسترلەر كابينەتىنىڭ باسشىسى.

سونداي-اق قر يندۋستريا جانە ينفراقۇرىلىمدىق دامۋ مينيسترلىگىنە «قازاقستان تەمىر جولى» اق-مەن بىرلەسىپ، اۋىل شارۋاشىلىعى ءوندىرىسى ءۇشىن تاۋارلىق-ماتەريالدىق قۇندىلىقتاردى ۋاقىتىلى جەتكىزۋ ماقساتىندا قوسىمشا ۆاگوندارمەن قامتاماسىز ەتۋ جانە رەسەي فەدەراتسياسىنان تۇقىم يمپورتى بويىنشا جەتكىزۋدىڭ بالاما باعىتتارى ماسەلەسىن پىسىقتاۋ تاپسىرىلدى.

Abai.kz