قازاقستان ەنەرگەتيكا مينيسترلىگى "كاسپي قۇبىر جەلىسى كونسورتسيۋمىنداعى" قۇبىردىڭ بۇزىلۋى قازاقستان ەكسپورتتايتىن مۇناي كولەمىنە قاتتى اسەر ەتپەيدى دەپ مالىمدەدى.

24 ناۋرىزدا Atameken Business تەلەارناسىنىڭ تىكەلەي ەفيرى كەزىندە ەنەرگەتيكا ءمينيسترى بولات اقشولاقوۆ وسىلاي دەپ مالىمدەدى. ونىڭ سوزىنەن "ينتەرفاكس-قازاقستان" اگەنتتىگى ءۇزىندى كەلتىرەدى.

"ەكسپورتتىڭ ءبىر بولىگى وبەكتيۆتى [سەبەپتەن] قىسقارادى... بىراق سونشالىقتى ءىرى كولەمدە ەمەس... ساراپشىلاردىڭ نازارىن مىنا جايتقا اۋدارعىم كەلەدى: قازاقستاننىڭ كەز كەلگەن كەنىشىندە جوسپارلى جوندەۋ جۇمىستارى بولىپ تۇرادى. ايتالىق، تەڭىز بەن قاشاعان، قاراشىعاناق جانە وزگە دە كەنىشتەردە 40-50 كۇنگە سوزىلۋى مۇمكىن جوسپارلى جوندەۋلەر بولىپ تۇرادى. سول سەبەپتى "كاسپي قۇبىر جەلىسى كونسورتسيۋمىنىڭ" ينفراقۇرىلىمىن جوندەۋگە قاجەت دەيتىن 1-1,5 اي قازاقستان ءۇشىن سونشالىقتى دارەجەدە قاۋىپتى ەمەس. ءونىم كولەمى ازايادى، بىراق تەحنولوگيالىق تۇرعىدا وعان جول بەرۋگە بولادى دەپ قاراستىرۋعا بولادى" دەدى بولات اقشولاقوۆ.

سارسەنبى كۇنى مينيستر بيۋدجەت تۇسىمىنە الاڭداۋعا نەگىز جوق ەكەنىن دە ايتتى، سەبەبى قازىرگى كەزدە مۇنايدىڭ ءبىر باررەلى - 120 دوللاردان ساتىلىپ جاتىر، ال وسى جىلدىڭ بيۋدجەتى مۇنايدىڭ باررەلى 60 دوللاردان ساتىلادى دەگەن بولجاممەن ەسەپتەلگەن.

ءبىر كۇن بۇرىن "كاسپي قۇبىر جەلىسى كونسورتسيۋمى" قاتتى داۋىلدان نوۆوروسسيسك تۇبىندەگى تەڭىز تەرمينالىنداعى قۇبىر ىستەن شىققان. بۇل مۇناي تاسىمالداۋ كولەمىن ازايتۋعا اكەلەدى مە دەگەن قورقىنىش تۋعىزعان.

قازاقستان ەنەرگەتيكا ءمينيسترىنىڭ ايتۋىنشا، بىلتىر "كاسپي قۇبىر جەلىسى كونسورتسيۋمىنا" مەملەكەت 53-54 ملن توننا مۇناي تيەگەن. سول سەبەپتى وسىنشاما كوپ مۇناي كولەمىن باسقا جاققا بۇرۋ كۇردەلى شارۋا. بىراق بالاما جولدار دا جوق ەمەس دەيدى ول.

"بۇل – ءىشىنارا اقتاۋ پورتى، بىزدە ودان بولەك سامارا ارقىلى وتەتىن مۇناي قۇبىرى بار. شاعىن بولىگىن قىتاي باعىتى ارقىلى تاسىمالداۋعا بولادى. بالاما جولداردىڭ نوبايى وسىنداي. ال قالعانى ءىرى مارشرۋتتار، ولاردى قاراستىرۋعا ۋاقىت كەرەك. سەبەبى، بەلگىلى ءبىر تەحنيكالىق شەشىمدەردى تالاپ ەتەدى" دەدى مينيستر.

قازاقستان ءۇشىن "كاسپي قۇبىر كونسورتسيۋمى" باستى مۇناي تاسىمالداۋشى. بۇل ارقىلى الەمدىك نارىققا تاۋلىگىنە 1,2 ميلليون باررەل مۇناي شىعارىلادى. بۇل الەمدىك جەتكىزۋدىڭ 1,2 پايىزىن قۇرايدى. قازاقستاننان شىققان مۇنايدى Chevron, Exxon Mobil, Eni جانە Shell كومپانيالارى وندىرەدى.

Abai.kz