ەنەرگەتيكا ءمينيسترى بولات اقشولاقوۆ قازاقستاننىڭ اتوم ەلەكتر ستانتسياسى سالىناتىنىنا سەنىمدى ەكەنىن ايتادى.

"اەس سالۋ –  بىر-ەكى جىلدىڭ شارۋاسى ەمەس. اەس ورنالاساتىن ايماقتى، سۋ جاعدايىن، ادام رەسۋرستارىن، كليماتىن، تەكتونيكاسىن زەرتتەپ، شەشىم قابىلداۋعا كەم دەگەندە ءبىر جىل ۋاقىت كەتەدى. مۇنىڭ ءبارىن تەحنولوگيا ماسەلەسىمەن قاتار بارلاپ-باقىلاۋعا ۋاقىت كەرەك. قازىر بۇل تۇرعىدا سىزدەرگە ناقتى اقپارات بەرە المايمىن. بىراق ءبىز اەس سالۋعا ناقتى بەكىندىك", - دەدى اقشولاقوۆ وكق بريفينگىندە.

بۇعان دەيىن ەنەرگەتيكا مينيسترلىگىنىڭ اتوم ەنەرگەتيكاسى جانە ونەركاسىبى دەپارتامەنتىنىڭ ديرەكتورى جاسلان قاسەنوۆ «قازاقستان اەس سالۋ ءۇشىن يادرولىق تەحنولوگيالار جەتكىزەتىن التى ەلدىڭ قاراستىرىلىپ جاتقانىن ايتقان ەدى. ولار: امەريكالىق، امەريكا-جاپوندىق، كورەي، قىتاي، ورىس جانە فرانتسۋز تەحنولوگيالارى. ول سونداي-اق قۋاتتىلىعى 1000-1200 مەگاۆاتت بولاتىن ءبىر ەنەرگيا بلوگىنىڭ قۇرىلىسى شامامەن 5 ميلليارد دوللار تۇراتىنىن ايتقان بولاتىن.

Abai.kz