ۇلتتىق قاۋىپسىزدىك كوميتەتىنىڭ بۇرىنعى توراعاسى كارىم ءماسىموۆتى قاماۋعا الۋ مەرزىمى ۇزارتىلدى. سونداي-اق ءماسىموۆتىڭ ءىسى قىلمىستىق كودەكستىڭ بەس بابى بويىنشا تەرگەلىپ جاتىر.

«25 اقپاندا نۇر-سۇلتان قالاسىنىڭ تەرگەۋ سوتى كارىم ماسىموۆكە قاتىستى قاماۋدا ۇستاۋ تۇرىندەگى بۇلتارتپاۋ شاراسىن 3 ايعا دەيىن ۇزارتتى»، – دەپ حابارلادى ۇقك.

ءماسىموۆتى تەرگەۋ كەزىندە تاركىلەنگەن مۇلكى مەملەكەتتىڭ كىرىسىنە بەرىلەتىن بولدى.

ۇقك جەدەل تەرگەۋ توبى ءماسىموۆتى جانە باسقا دا تۇلعالاردى قر قىلمىستىق كودەكسىنىڭ مىناداي باپتارى بويىنشا تەرگەپ جاتقانىن حابارلادى:

– 366-باپتىڭ 4-بولىگى – «پارا الۋ»;

– 362-باپتىڭ 4-بولىگىنىڭ 3-تارماعى – «بيلىكتى نەمەسە لاۋازىمدىق وكىلەتتىكتەردى اسىرا پايدالانۋ»;

– 175-باپتىڭ 1-بولىگى – «مەملەكەتكە وپاسىزدىق جاساۋ»;

– 179-باپتىڭ 3-بولىگى – «قازاقستان رەسپۋبليكاسىنىڭ كونستيتۋتسياسىن بۇزىپ، بيلiكتi كۇشپەن باسىپ الۋعا نەمەسە بيلiكتi كۇشپەن ۇستاپ تۇرۋعا نە قازاقستان رەسپۋبليكاسىنىڭ كونستيتۋتسيالىق قۇرىلىسىن كۇشتەپ وزگەرتۋگە باعىتتالعان ارەكەتتەر»;

– 218-باپتىڭ 3-بولىگى 3-تارماعى – «قىلمىستىق قۇقىق بۇزۋشىلىقتاردان تۇسكەن تابىستار بولىپ تابىلاتىن مۇلىكتى كونۆەرسيالاۋ نەمەسە اۋدارۋ تۇرىندە مامىلەلەر جاساسۋ ارقىلى قىلمىستىق جولمەن الىنعان اقشانى جانە (نەمەسە) وزگە مۇلىكتى زاڭدى اينالىمعا تارتۋ نە مۇنداي مۇلىكتى يەلەنۋ جانە پايدالانۋ».

Abai.kz