بۇۇ باس اسسامبلەياسى ۋكراينانىڭ بەيبىت حالقى مەن ازاماتتىق ينفراقۇرىلىمىن قورعاۋ جانە ۋكرايناداعى سوعىستى توقتاتۋ جونىندە تالاپتار جازىلعان رەزوليۋتسيا قابىلدادى.

24 ناۋرىزدا ماقۇلدانعان باس اسسامبلەيا رەزوليۋتسياسى تەك رەكومەنداتسيا سيپاتىنداعى قۇجات. ونى ورىنداۋ مىندەتتەلمەيدى.

ۇيىمعا مۇشە 193 مەملەكەتتىڭ 140-ى رەزوليۋتسيانى قولداپ داۋىس بەردى. ءتورت مەملەكەت – بەلارۋس، سولتۇستىك كورەيا، سيريا جانە ەريترەيا رەسەيمەن بىرگە "قارسى" داۋىس بەردى، 38 مەملەكەت قالىس قالدى. اراسىندا قازاقستان دا بار.

رەزوليۋتسيا رەسەيدىڭ ۋكرايناعا باسقىنشىلىعىن دەرەۋ توقتاتىپ، بەيبىت حالىققا شابۋىل جاساماۋدى تالاپ ەتەدى. قۇجاتتا بەيبىت حالىقتى، مەديتسينا ماماندارىن، گۋمانيتارلىق ۇيىم قىزمەتكەرلەرىن، سونىمەن بىرگە جۋرناليستەردى قورعاۋ قاجەتتىگى جازىلعان.

ناۋرىزدىڭ باسىندا دا بۇۇ باس اسسامبلەياسى وسىعان ۇقساس رەزوليۋتسيا قابىلداعان. ول كەزدە دە حالىقارالىق ۇيىم قابىلداعان قۇجات رەسەيدەن ۋكرايناعا كۇش قولدانۋىن توقتاتۋدى تالاپ ەتكەن ەدى. قۇجاتتى 141 مەملەكەت قولداپ، بىرنەشە مەملەكەت "قارسى" داۋىس بەرگەن. ول كەزدە دە قازاقستان قالىس قالعان ەدى. بۇعان دەيىن جەرگىلىكتى بەلسەندىلەر قازاقستاننىڭ قالىس قالۋىن سىناعان.

ۋكراينا جانە باتىس ەلدەرى ماسكەۋدى ازاماتتىق نىساندار مەن بەيبىت حالىققا شابۋىل جاسادى دەپ ايىپتاپ كەلەدى. ماسكەۋ مۇنى جوققا شىعارادى.

Abai.kz