ۋكرايناداعى سوعىستىڭ اسەرى وزبەكستانعا دا ءتيىپ، ەلدە ازىق-تۇلىك قىمباتتادى.

تاشكەنت تۇرعىنى ابدۋراززاك سادىكوۆ سوڭعى ءبىر اپتانىڭ ىشىندە قالادا قانت 50 پايىزعا قىمباتتاعانىن ايتادى.

"كەشە بازاردا قانتتىڭ ءبىر كەلىسى 15 مىڭ سۋمنان ساتىلىپ جاتقانىن كوردىم. ون كۇن بۇرىن 9 مىڭ سۋم بولىپ تۇرعان. ادەتتە قانت جازدا توساپ جاساپ كەزدە قىمباتتاپ، كەيىن قايتا ارزاندايتىن. بۇدان بولەك وسىمدىك مايى مەن ۇن دا قىمباتتاپ جاتىر", - دەدى ول.

سىرداريالىق كاسىپكەر ۋلماس كاححاروۆتىڭ سوزىنشە، "ەل اراسىندا باعا ودان دا قىمباتتايدى" دەگەن سوزدەردەن كەيىن حالىق جاپپاي ازىق-تۇلىك ساتىپ الىپ جاتىر.

رەسەي اگرەسسياسىنا بايلانىستى ۋكراينا بىرقاتار ازىق-تۇلىك تۇرلەرىن ەكسپورتتاۋعا شەكتەۋ قويىپ، بيداي، جۇگەرى، تاۋىق ەتى، جۇمىرتقا جانە وسىمدىك مايى ەكسپورتىنا تىيىم سالعان.

14 ناۋرىزدا رەسەي ۇكىمەتى دە ەاەو-عا مۇشە ەلدەرگە بىرقاتار ازىق-تۇلىكتى ەكسپورتتاۋعا تىيىم سالدى. بۇل شەكتەۋلەر وزبەكستان ەكونوميكاسىنا كەرى اسەرىن تيگىزىپ وتىر. سەبەبى وزبەكستان نەگىزگى ازىق-تۇلىكتى قازاقستاننان ساتىپ الادى. قازاقستان ەاەو-عا مۇشە بولعاندىقتان، رەسەيدە بۇل ولكەگە ازىق-تۇلىك ەكسپورتتالماي قالادى.

Gazeta.uz سايتىنىڭ مالىمەتىنشە، 2021 جىلى وزبەكستان قازاقستاننان 643,3 ميلليون دوللارعا ءدان ازىقتارىن، 92,9 ميلليون دوللارعا ۇن يمپورتتاعان.

وزبەكستان پرەزيدەنتى شاۆكات ميرزياەۆ 23 ناۋرىزدا ەكونوميكانىڭ تۇراقتىلىعىن قامتاماسىز ەتۋ بويىنشا جينالىس وتكىزىپ، مينيسترلەر كابينەتىنە ىشكى بازارداعى باعانى تۇراقتاندىرۋدى تاپسىرعان.

Abai.kz