قازاقتا: «ىشتەن شىققان جاۋ جامان»، دەگەن ءسوز بار. مىنە، ۋكراينا مەن رەسەي اراسىنداعى سوعىسقا دا ءبىر ايدان اسا ۋاقىت ءوتتى. باسقىنشى رەسەي بۇل سوعىستا ەكونوميكالىق جەڭىلىس تاۋىپ، اسكەري ساتسىزدىككە ۇشىراۋدا.

ءدال وسىنداي سوعىس ءورتى ورشىگەن شاقتا رەسەيدىڭ ءىرىلى-ۇساقتى دەپۋتاتتارى مەن شەندىلەرى ۋكراينانى ىسىرىپ قويىپ، اينالاسىنداعى وزگە مەملەكەتتەرگە دە دوق كورسەتىپ جاتقانى دا بەلگىلى. الگىندە عانا ماسكەۋلىك دەپۋتات سەرگەي ساۆوستيانوۆ دەگەن كوممۋنيست: «قازاقستاندى دا «دەناتسيفيكاتسيالاۋ» كەرەك», - دەپ سوعىس تىلەگەن سوزدەر ايتتى.

ونىڭ ءىزىن الا، «ەۋروپا پليۋس قازاقستان» راديوستانتسياسىنىڭ قىزمەتكەرى، باعدارلاما جۇرگىزۋشىسى ليۋبوۆ پانوۆا دەگەن ادام شىعىپ: «ۆوۆا اعايدى بىزگە دە كومەككە شاقىرامىز»، -  دەپ سويلەدى. ءسويتىپ، پانوۆا دەيتىن ورىستىڭ مارجاسى ۆوۆا اعايىنان قازاقستانعا كەلىپ، ءتارتىپ ورناتۋىن سۇراعان ەكەن. ونىڭ ۆوۆا اعايى – باسقا-باسقا ەمەس، كرەملدىڭ قوجايىنى، رەسەي پرەزيدەنتى، بۇكىل وركەنيەتتى جۇرت ۋكرايناعا جاساعان باسقىنشىلىعى ءۇشىن گيتلەرگە تەڭەپ وتىرعان ۆلاديمير پۋتين.

بۇل ەل ىشىندە قىزۋ تالقى بولۋدا. ءبىزدى قويىپ، الىس-جاقىن شەت ەلدەگىلەر دە پانوۆانىڭ پاسىق نيەت سوزدەرىنە شۇيلىگۋدە.

ال «ەۋروپا پليۋس قازاقستان» راديوستانتسياسى ليۋبوۆ پانوۆانىڭ «ۆوۆا اعايدى كومەككە شاقىرامىز» دەگەن سوزىنە تۇسىنىكتەمە بەرىپ، بۇيدەپتى:

«ەۋروپا پليۋس قازاقستان» راديوستانتسياسى ءبىزدىڭ قىزمەتكەر ليۋبوۆ پانوۆانىڭ الەۋمەتتىك جەلىلەردەگى جەكە اككاۋنتتارىندا ايتقان سوزدەرى، ونىڭ جەكە ۇستانىمى ءبىزدىڭ راديوستانتسيانىڭ ساياساتىنا ەش قاتىسى جوق دەپ مالىمدەيدى.  «ەۋروپا پليۋس قازاقستان» اقپاراتتىق ساياساتى قازاقستاننىڭ ەگەمەندىگى مەن تىنىشتىعى، ينتەرناتسيوناليزم سياقتى مىزعىماس قۇندىلىقتارعا نەگىزدەلگەن».

راديوستانتسيالار قازاقستان پرەزيدەنتى قاسىم-جومارت توقاەۆتىڭ حالىقارالىق ارەناداعى ساياساتىن باسشىلىققا الا وتىرىپ، حابار تاراتاتىنىن مالىمدەگەن.

«سونىمەن قاتار، ءبىزدىڭ قىزمەتكەردىڭ مالىمدەمەلەرى كومپانيانىڭ ءتارتىپ كوميتەتىندە قارالاتىن بولادى. «ەۋروپا پليۋس قازاقستان» راديوستانتسياسىنىڭ اقپاراتتىق ساياساتى قاتاڭ تەكسەرۋدەن وتكەن وزەكتى جاڭالىقتارعا نەگىزدەلگەن. ءبىزدىڭ راديونىڭ ەفيرىندە ەشقاشان راديكالدى پىكىرلەر نەمەسە راستالماعان فاكتىلەر ايتىلماعان ءارى قاراي دا ايتىلمايدى.

ءبىز ءوز راديو تىڭداۋشىلارىمىزدى، ءوز ەلىمىزدى جاقسى كورەمىز جانە ءبىزدىڭ جۇمىسىمىز قازاقستاننىڭ بەيبىتشىلىگى مەن گۇلدەنۋىنە قىزمەت ەتۋى ءۇشىن قولىمىزدان كەلگەنىن جاساي بەرەمىز»، - دەيدى راديوستانتسيا.

وسىدان كەيىن، ايدىك بولعان پانوۆا قىزمەتىنەن قۋىلىپتى. بۇنى «ەۋروپا پليۋس قازاقستان» راديوستانتسياسى جازىپتى.

ايجان تەمىرحان

Abai.kz