ۋكراينا مەن رەسەي اراسىنداعى جاڭا كەلىسسوزدەر 28-30 ناۋرىز ارالىعىندا تۇركيادا وتەدى. بۇل تۋرالى كيەۆ وكىلى داۆيد اراحاميا حابارلادى.

ماسكەۋ وكىلى ۆلاديمير مەدينسكي كەزدەسۋ بولاتىنىن راستادى. مەدينسكيدىڭ ايتۋىنشا، جۇزدەسۋ 29-30 ناۋرىزعا بەلگىلەنگەن. رەسەي دەلەگاتسياسىن كىم باستاپ باراتىنى ازىرگە بەلگىسىز.

كەزدەسۋ وتكىزۋ تۋرالى شەشىمدى تاراپتار جەكسەنبىدە قابىلدادى.

ۋكراينا مەن رەسەي كەلىسسوزدەرىنىڭ العاشقى راۋندى بەلارۋس اۋماعىندا ءوتتى. سول كەزدە تاراتاپ بەتپە-بەت كەزدەسكەن. كەلىسسوزدەر ودان سوڭ ۆيدەوبايلانىس فورماتىندا جالعاستى. ناۋرىز ايىنىڭ ورتاسىندا تاراپتار تاعى دا بەتپە-بەت كەزدەستى. كيەۆ پەن ماسكەۋ كەلىسسوزدەردە ناقتى نە تالقىلانعانىن جاريالامادى.

رەسەي ۋكراينا اۋماعىنا 24 اقپاندا پرەزيدەنت ۆلاديمير ءپۋتيننىڭ بۇيرىعىمەن باسىپ كىردى. كيەۆ ماسكەۋدى ازاماتتىق ينفراقۇرىلىمداردى جويىپ جاتىر دەپ ايىپتادى. رەسەي جاعى اسكەري نىسانداردى عانا اتقىلادىق دەپ وتىر.

سوعىس ءجۇرىپ جاتقانىنا قاراماستان تاراپتار جاعدايدى رەتتەۋ جولدارىن تالقىلاپ ءجۇر. ۋكراين جاعىن قاۋىپسىزدىك كەپىلى، اتىستى دوعارۋ، رەسەي اسكەرىن ەلدەن شىعارۋ جانە "داۋلى ايماقتاردىڭ ساياسي شەشىمى" ماسەلەلەرى تولعانتادى.

ماسكەۋدىڭ مالىمدەۋىنشە، ۋكراينانىڭ بەيتاراپ مارتەبەسى مەن ونىڭ ناتو-عا مۇشە بولماۋى وسى كەلىسسوزدەردە تالقىلانىپ جاتىر.

Abai.kz