ۋكراينا مەن رەسەي اراسىنداعى سوعىس قىزعان ساتتە، ازەربايجانعا تيەسىلى قاراباقتا دا قاقتىعىس بۇرق ەتە قالدى.

90-جىلدارى باسقىنشى رەسەيدىڭ قولداۋىمەن ارمەنيا تاراپى قاراباقتاعى جەتى اۋداندى باسىپ الىپ، ۇزاق جىلدار بويى وتارلاپ، جاساندى 1تاۋلى قاراباق رەسپۋبليكاسى1 اتتى سەپاراتيستىك قۇرىلىمدى ومىرگە اكەلگەن بولاتىن. حالىقارالىق قاۋىمداستىقتىڭ ءبىرى دە مويىنداماعان بۇل سەپاراتيستىك قۇرىلىمدا 2020 جىلى 44 كۇندىك سوعىس ناتيجەسىندە ازەربايجان وزىنە تيەسىلى قاراباقتاعى بىرقاتار اۋداندى ازات ەتتى. الايدا باسقىنشىلار قولىندا قاراباقتىڭ ورتالىعى سانالاتىن حانكەندى قالاسى قالدى. كەلىسىم بويىنشا ول قالا بىرنەشە ۋاقىتتان كەيىن ازەربايجانعا ءوتۋى ءتيىس، ال باسقىنشىلار تاراپىنان كوشىپ كەلگەن ارميان حالقى ازەربايجاننىڭ حالقى سانالىپ، ەش قىسىم جاسالمايتىنى ايتىلدى. كەلىسىم بويىنشا تاراپتار اراسىنداعى سوعىستى توقتاتۋ ءۇشىن رەسەيدىڭ بىتىمگەرلىك كۇشتەرى ايماققا ورنالاستىرىلدى.

الايدا ارمەنيا تاراپى ۇزاق ۋاقىت بويى كەلىسىمدى بۇزىپ، ورەسكەل ارانداتۋشىلىق ارەكەتتەرىنە بارۋدى جالعاستىرۋدا. كەلىسىم جاسالعاننان كەيىن شەكارا ماڭىندا بىرنەشە مارتە اتىس-شابىس بولدى. تاراپتار ءبىر-ءبىرىن ايىپتادى. 2022 جىلى، 8 ناۋرىزدا قاراباق حالقىن گازبەن قامتاماسىز ەتەتىن قۇبىردىڭ ءبىرى جارىلدى. سالدارىنان مىڭداعان قاراباق تۇرعىنى جىلۋسىز قالدى. ارمەنيا تاراپى قۇبىردى ازەربايجان جاردى دەسە، ازەربايجان تاراپى ارمەنيانىڭ جارعانىن ايتادى. بۇل تاراپتار اراسىنداعى جاعدايدى ۋشىقتىرا ءتۇستى.

24 ناۋرىزدا تاراپتار اراسىنداعى جاعداي ۋشىقتى. ارمەنيا تاراپى ازەربايجان اسكەرىنە وق اتىپ، ارانداتۋشىلىققا بارعانى ايتىلادى. ال ازەربايجان تاراپى قارسى شارا قابىلداپ، اتىس بولعان. ازەربايجان اسكەرىنىڭ فارۋح اۋىلىنا كىرىپ، بيىكتىكتەردى يەمدەنگەنى ايتىلدى. دەگەنمەن بۇل اقپاراتتى باكۋ جوققا شىعارىپ، تەك «پوزيتسيانى ناقتىلاۋ جۇمىسى ءجۇرىپ جاتقانىن» ەسكەرتتى. فارۋح اۋىلى كەلىسىم بويىنشا ازىرگە رەسەي بىتىمگەرلەرىنىڭ باقىلاۋىندا، ال كەيىن ازەربايجانعا بەرىلۋى قاجەت.

ارمەنيا قورعانىس مينيسترلىگى: «رەسەيدىڭ ايماققا جىبەرگەن بىتىمگەرلىك كۇشتەرى تىم از جانە ولاردىڭ سانىن ارتتىرۋ كەرەك»، - دەپ مالىمدەمە جاسادى. بەيرەسمي اقپارات كوزدەرىنە سەنەتىن بولساق، رەسەي قاراباقتاعى اسكەرىنىڭ ءبىر بولىگىن ۋكرايناعا اكەتكەن. سونىمەن قاتار، ول سيريا، ابحازيا، تاجىكستان، وسەتياداعى اسكەرىنىڭ ءبىر بولىگىن دە ۋكراينا سوعىسىنا اتتاندىرعان. بۇل كاسىبي اسكەردىڭ ۋكراينادا ۇلكەن شىعىنعا ۇشىراپ جاتقانىنىڭ ءبىر دالەلى بولسا كەرەك.

رەسەيلىك تەلەارنالار بولسا، ازەربايجاننىڭ ارەكەتىن ادەتتەگىدەي ايىپتاپ، «باكۋ بۋىنسىز جەردەن پىشاق ۇردى»، - دەپ بايبالام سالىپ جاتىر. باكۋ كيەۆكە جانارماي جەتكىزۋ بويىنشا كەلىسىم بەردى. بۇل ارەكەتىن ماسكەۋ «ايىپتاۋدى» باستاپ كەتتى.

Abai.kz