«جاڭا قازاقستان» سلوگانى سوڭعى ۋاقىتتا كوپ ايتىلۋدا. پرەزيدەنتتىڭ ءوزى «جاڭا قازاقستاندى» قۇراتىن ءسات كەلدى»، - دەپ مالىمدەگەن بولاتىن. قاسىرەتتى قاڭتار وقيعاسىنان كەيىن، ساياسي رەفورما جاريالانىپ، وزگەرىستەر بولاتىنى ءجيى ايتىلۋدا. الايدا راسىمەن «جاڭا قازاقستان» بار ما؟

«قاسىرەتتى قاڭتار» وقيعاسىنان كەيىن پرەزيدەنت ۇكىمەتتى تاراتتى. جاڭا پرەمەر بولىپ ءاليحان سمايلوۆ تاعايىندالدى. ول بۇرىن پرەزيدەنتتىڭ كەڭەسشىسى، قارجى ءمينيسترى سىندى اسا جوعارى لاۋازىمداردى اتقارعان. بىلايشا ايتقاندا ەسكى قازاقستاندا دا جوعارى قىزمەتتەردە بولعان.

جاڭا پرەمەر مينيستر تاعايىندالعاننان كەيىن، مينيسترلەر كابينەتى دە جاڭاردى. جاڭارعاندا ەسكى كادرلار جاڭا كادر بولىپ شىعا كەلدى. ناقتىلاپ ايتاتىن بولساق، قورعانىس ءمينيسترى مۇرات بەكتانوۆ (قازىر تەرگەۋدە), ءىىم ەرلان تۇرعىمباەۆ, اۋىل شارۋاشىلىق ءمينيسترى ەربول قاراشوكەەۆ, بجعم اسحات ايماعامبەتوۆ, ەڭبەك جانە حالىقتى اۋلەمەتتىك قورعاۋ ءمينيسترى سەرىك شاپكەنوۆ, قارجى ءمينيسترى ەرۋلان جاماۋباەۆ, تجم ءمينيسترى يۋري يلين, تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين, ەكولوگيا ءمينيسترى سەرىكقالي برەكەشەۆ ءوز ورىندارىن ساقتاپ قالدى. ياعني ۇكىمەت ەلۋ پايىز عانا جاڭاردى. جاڭا مينيستر قىزمەتىن العان تۇلعالاردىڭ اراسىندا ۆيتسە-مينيسترلەر دە جەتەرلىك ەدى.

قاڭتار وقيعاسىنداعى ازاپتاۋ فاكتىلەرىنە قاتىسى بار دەپ قوعام تاراپىنان ايىپتالعان ءىىم ەرلان تۇرعىمباەۆ قىزمەتىنەن الىنعان ساتتە، ونى «قانداي دا ءبىر جاۋاپكەرشىلىككە تارتادى ما» دەگەن سۇراق تۋىنداعان بولاتىن. الايدا تۇرعىمباەۆ كەرىسىنشە قازاقستان رەسپۋبليكاسى پرەزيدەنتىنىڭ كەڭەسشىسى بولىپ تاعايىندالدى. وسىلايشا حالىقتىڭ «جاڭا قازاقستانعا» دەگەن كوزقاراسى وزگەرە باستاعانداي.

ەسكى قازاقستاندا باستى پارتيا «نۇر وتان» بولاتىن، ال جاڭا قازاقستاندا «نۇر وتان» اتاۋىن «امانات» دەپ وزگەرتتى دە، باستى پارتيانىڭ ءبىرى بولىپ قالا بەردى. ەل اتالمىش پارتيانى تاراتىپ، ورنىنا باسەكەگە قابىلەتتى پارتيالار قۇرىلادى دەپ سەنگەن بولاتىن.

پرەزيدەنتتىڭ ناۋرىز ايىنداعى جولداۋى ساياسي پارتيالاردى تىركەۋ مەن قۇرۋعا جەڭىلدىكتەر ۇسىنسا دا، «اماناتتىڭ» ءباسى جوعارى بولاتىنى بۇگىننەن بەلگىلى.

پارتيالار دەمەكشى، قازاقستان حالىق پارتياسىنا ەرمۇحامەت ەرتىسباەۆ توراعا بولىپ سايلاندى. بۇل وزگەرىسكە حالىقتىڭ جارتىسى كۇلە قاراسا، جارتىسى كۇمانمەن قاراۋدا. سەبەبى قازاقستان حالىق پارتياسى اتى وزگەرسە دە، حالىق جادىندا كوممۋنيستىك پارتيا بولىپ قالا بەرمەك.

«جاڭا قازاقستاندا» ءالى وبلىس اكىمدەرى اۋىسقان جوق. وبلىستاردىڭ بارلىعىندا ەسكى قازاقستاننىڭ سۇرلەۋىمەن جۇرگەن، ەسكى ماقتاۋ-ماداقتاۋدى جاقتايتىن، ەسكى ادىسپەن جۇمىس ىستەيتىن كادرلار وتىر. سوندا «جاڭا قازاقستاندى» ەسكى كادرلار قۇرماق پا؟

نۇرگەلدى ابدىعانيۇلى

Abai.kz