ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەرجان ءبىرجانوۆ سارسەنبى كۇنگى بريفينگ كەزىندە ازىرگە رەسەي ازاماتتارىنىڭ قازاقستانعا ۇدەرە كوشۋى بايقالماعانىن ايتتى.

ۆيتسە-ءمينيستردىڭ ايتۋىنشا، قازىر ەلدە 101 مىڭنان استام رەسەي ازاماتى بار. جىل باسىنان بەرى 6,3 مىڭ رەسەيلىك قازاقستانعا جۇمىس ساپارىمەن كەلگەن.

"قازىرگى كەزدە مينيسترلىك ءىىم-مەن بىرىگىپ، ۇقك شەكارا قىزمەتى ارقىلى دا، كۇن سايىن قازاقستانعا كەلگەندەر مەن شىققانداردى باقىلاپ وتىر. ەگەر رەسەي بويىنشا عانا ايتساق، 30 ناۋرىز تاڭەرتەڭگى مالىمەت بويىنشا قازاقستاندا 101 مىڭنان استام رەسەيلىك بار، 6 350 ادام جۇمىسىنا بايلانىستى كەلگەن. ياعني، جىل باسىنان بەرى 6300 ادام جۇمىسقا كەلگەن" دەدى ءبىرجانوۆ.

ونىڭ سوزىنە قاراعاندا، بىلتىر ءبىر جىلدا 18 800 رەسەيلىك قازاقستانعا كەلگەن. ۆيتسە-ءمينيستردىڭ سوزىنە قاراعاندا، قوعامدا رەسەيلىكتەردىڭ قازاقستانعا كوشۋى ەلدەگى ەڭبەك نارىعىنداعى جاعدايعا كەرى اسەر ەتەدى دەگەن قورقىنىش تا بار. شەنەۋنىك بۇل تەندەنتسيانىڭ وڭ جاعىنا دا نازار اۋدارۋعا شاقىردى، ياعني، مەملەكەت "جوعارى بىلىكتى ماماندارمەن تولىعادى" دەيدى. ول قازاقستانعا Indriver تاكسي سەرۆيسىنىڭ كەلۋىن مىسال رەتىندە كەلتىردى.

"كەلگەندەردىڭ كوبى جەكەلەگەن سالاعا بەيىمدەلگەن: كونسالتينگ قىزمەتى، IT سالاسى، IT شەشىم تابۋ، اقپارات قاۋىپسىزدىگى. مەنىڭ ويىمشا، بۇل كەرىسىنشە [ەڭبەك نارىعىنا] وڭ اسەر ەتەدى" دەدى ول.

بۇعان دەيىن جەرگىلىكتى اقپارات قۇرالدارى ۋكرايناداعى سوعىس پەن سونىڭ سالدارىنان تۋىنداعان رەسەيگە قارسى سانكتسيالاردان كەيىن رەسەيلىكتەردىڭ كورشى ەلدەرگە، ونىڭ ىشىندە قازاقستانعا دا كوشىپ جاتقانى تۋرالى اقپارات تاراتقان. كەيبىر مالىمەتكە قاراعاندا، سونىڭ سالدارىنان ەلدەگى ەڭ ءىرى قالالار الماتى مەن نۇر-سۇلتاندا پاتەر جالداۋ قۇنى قىمباتتاعان.

Abai.kz