جوگوركۋ كەنەش توراعاسى تالانت مامىتوۆ رەسەي بيلىگىن قىرعىزستان ازاماتتارى ءۇشىن بيىل كەزەكتى «ميگراتسيا راقىمشىلىعىن» جاريالاۋعا شاقىردى.

29 ناۋرىزدا ول رەسەي فەدەرالدىق جينالىسى فەدەراتسيا كەڭەسىنىڭ ءتورايىمى ۆالەنتينا ماتۆيەنكومەن كەزدەستى. قىرعىزستان پارلامەنتى ءباسپاسوز قىزمەتىنىڭ حابارلاۋىنشا، جۇزدەسۋ الماتى قالاسىندا، پارلامەنتارالى اسسامبلەيا كەڭەسىنىڭ سالتاناتتى وتىرىسى اياسىندا ءوتتى.

رەسمي مالىمەت بويىنشا، شەتەلدە قىرعىزستاننىڭ 1 ملن 118 مىڭ ازاماتى جۇمىس ىستەيدى، ولاردىڭ ءبىر ميلليونى رەسەيدە ەڭبەك ەتىپ ءجۇر. قىرعىزستان ۇلتتىق بانكىنىڭ ەسەبىنە قاراعاندا، 2021 جىلى ەڭبەك ميگرانتتارى قىرعىزساتنعا 2,7 ملرد دوللار اۋداردى.

2022 جىلدىڭ اقپانىنداعى مالىمەتكە سەنسەك، شامامەن 76 مىڭ قىرعىز ازاماتىنا رەسەيگە كىرۋگە تىيىم سالىنعان. مامانداردىڭ پىكىرىنشە، «قارا تىزىمدەگىلەر» بۇدان الدەقايدا كوپ بولۋى مۇمكىن.

Abai.kz