29 ناۋرىزدا Transparency International ۇيىمىنىڭ ورىس ءبولىمى گۇلنارا كارىموۆانىڭ قارجىسىنىڭ وزبەكستانعا قايتارىلۋ پروتسەسى اشىق ءجۇرىپ جاتقان جوق دەپ مالىمدەدى.

ولار جاساعان باياندامادا وزبەك ۇكىمەتىن ازاماتتىق قوعام وكىلدەرىمەن تىعىز بايلانىس ورناتۋعا شاقىرعان.

قۇقىق قورعاۋشىلاردىڭ سوزىنشە، وزبەكستاندا سوڭعى جىلدارى رەفورما جۇرگىزۋ ءۇشىن جانە كوررۋپتسياعا قارسى كۇرەسۋ ءۇشىن زاڭ بازاسى قۇرىلعان.

"بىراق سوعان قاراماستان مەملەكەتتىك ورگانداردا تامىر- تانىستىق، كەدەرگىلەر، جەمقورلىق ارەكەتتەر كورىنىس الىپ جاتىر", - دەلىنگەن مالىمدەمەدە.

قازىر وزبەكستاندا ەلدىڭ تۇڭعىش پرەزيدەنتى يسلام كاريموۆتىڭ قىزى گۇلنارا كارىموۆانىڭ كولەڭكەلى جولمەن تاپقان دەلىنگەن اقش جانە شۆەيتساريادا بۇعاتتالعان 1,3 ميلليارد دوللارىن قايتارۋ پروتسەسى ءجۇرىپ جاتىر.

وزبەكستان مەن شۆەيتساريا اراسىنداعى كەلىسىمدە قارجىنى قايتارۋ پروتسەسى اشىق بولۋ ءۇشىن ازاماتتىق قوعام وكىلدەرى قاتىسادى دەپ كورسەتىلگەن. بىراق وزبەك بيلىگى بۇل پروتسەستى قۇپيا جۇرگىزىپ جاتىر.

Abai.kz