ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ جاڭاوزەندە جۇمىس تالاپ ەتىپ، كەيىن "قىسىمنان كەيىن" نارازىلىقتى توقتاتۋعا ءماجبۇر بولعان قالا تۇرعىندارىنىڭ تالاپتارىنا پىكىرىن ايتتى.

مينيستر مۇناي-گاز سالاسىنان جۇمىس تالاپ ەتكەن جاڭوازەندىكتەردىڭ تالابى ورىندالۋى مۇمكىن ەمەس دەگەندى مەڭزەدى.

"حالىقتىڭ سانىنا بايلانىستى، كەزىندە قابىلدانعان شەشىمدەرگە بايلانىستى ول جەردە جۇمىسقا ورنالاستىرۋدىڭ ءوزىنىڭ الگوريتمى بار. ەگەر [مۇناي-گاز سالاسىندا جۇمىس ىستەگەن] جۇمىسشىلار زەينەتكەرلىككە شىقسا، جۇمىسسىزدار تىزىمىندە تۇرعان كەزەگى كەلگەن ادامعا جۇمىس بەرىلەدى. ال ەندى ءتىزىمدى بۇزىپ، ولاردى جۇمىسقا ورنالاستىرۋ كوميسسيانىڭ پىكىرىنشە، مۇمكىن ەمەس. بۇل قالعان ازاماتتاردىڭ قۇقىقتارىن شەكتەيدى. مۇناي-گاز كومپانيالارىنىڭ وزدەرىنىڭ شتاتتىق كەستەسى بار. ونداعى شەكتەن ارتىق ازاماتتاردى جۇمىسقا الۋ مۇمكىن ەمەس. سوندىقتان ورىندار بوساعان كەزدە عانا جۇمىسقا ورنالاستىرۋعا بولادى", - دەدى ازاتتىق ءتىلشىسىنىڭ سۇراعىنا جاۋاپ بەرگەن مينيستر.

ءمينيستردىڭ سوزىنە قاراعاندا، بيلىك بۇعان دەيىن جاڭاوزەندىكتەرگە 150-200 مىڭ تەڭگە جالاقىسى بار جۇمىستار ۇسىنعان. ولاردىڭ اراسىندا كۇزەت قىزمەتى، مۇناي-گاز كومپانيالارىنا سەرۆيستىك قىزمەت كورسەتەتىن كاسىپورىندارداعى جۇمىستار دا بار.اكىمدىك جانىنان قۇرىلعان كوميسسيانىڭ كومەگىمەن 150 ادام جۇمىسقا ورنالاستىرىلىپ جاتىر.

جاڭاوزەن اكىمدىگى الدىندا شامامەن ەكى اي نارازىلىق جاساپ، جۇمىس تالاپ ەتكەن قالا تۇرعىندارى ناۋرىزدىڭ سوڭىندا قىسىمعا كەزىكككەندىكتەن اكتسيانى توقتاتۋعا ءماجبۇر بولعانىن ايتقان.

بەيسەنبى كۇنى ازاتتىق ءتىلشىسى مينيستردەن "نارازىلارعا جاسالعان قىسىم" جونىندە سۇراعان كەزدە شاپكەنوۆ ء"اربىر ادام ءوزىنىڭ ازاماتتىق پوزيتسياسىن اشىق ايتا الادى، قازىر ەندى بارلىعى شىعىپ، [تالاپتارىن] ايتىپ جاتىر، ەگەر زاڭ اياسىندا ايتسا، وعان ەشكىم قىسىم كورسەتە المايدى" دەدى.

ول ءوز كەزەگىندە "ەڭبەك مينيسترلىگى كاسىپورىن اشىپ، جۇمىس ورىندارىن قۇرۋمەن اينالىسپايدى" دەپ ناقتى جاعداي بويىنشا مينيسترلىكتىڭ جاۋاپكەرشىلىگىن ازايتۋعا تىرىستى.

جاڭاوزەن قالاسىندا قاڭتاردىڭ سوڭىنان بەرى جۇزدەگەن ادام مۇناي-گاز سالاسىنان جۇمىس تاۋىپ بەرۋدى تالاپ ەتىپ، جەرگىلىكتى اكىمدىك الدىندا نارازىلىق اكتسياسىن وتكىزگەن. بىراق كەيىن تۇرعىندار "قىسىمنىڭ سالدارىنان" نارازىلىقتى توقتاتۋعا ءماجبۇر بولعان.

وسى نارازىلىققا قاتىسقانداردىڭ ءبىرى ەكى بالانىڭ اناسى امانگۇل جاپپاسوۆا 29 ناۋرىزدان بەرى جاڭاوزەن اكىمدىگى الدىندا اشتىق اكتسياسىن باستاپ، قونىپ ءجۇر.

"مەن بيلىك ايتقانداي "الگوريتمدى بۇز" دەپ تالاپ ەتىپ وتىرعان جوقپىن. 2019 جىلدان بەرى جۇمىسقا ورنالاسا الماي قالعان ۇلىما قاتىستى ادىلەتسىزدىكتى جويۋدى جانە وزىمە جۇمىس تاۋىپ بەرۋدى سۇراپ وتىرمىن" دەدى مۇگەدەك بالا تاربيەلەپ وتىرعان انا 31 ناۋرىزدا ازاتتىق تىلشىسىنە. ول ءالى اشتىق اكتسياسىن جالعاستىرىپ جاتىر. قازىر تەك سۋ ىشەدى.

Abai.kz