ۋكراينا مەن رەسەي سوعىسى الەمدىك استىق قاۋىپسىزدىگىنە قءاۋىپ توندىرۋدە. ورتا ەسەپپەن الەمدىك استىقتىڭ 30 پايىزىن بەرەتىن ەكى ەلدىڭ بيىل نارىققا استىقتى كوبىرەك شىعارۋ مۇمكىندىگى تومەندەگەن. ۋكراينا ەگىن ەگۋ ناۋقانى باستالعان ساتتە سوعىسىپ جاتىر، ال رەسەي باسقىنشىلىعى ءۇشىن سانكتسيانىڭ استىندا قالدى. سوندىقتان «بيىل رەسەيدىڭ نارىققا استىق شىعارۋى ازايادى، ال ۋكراينا مۇلدە شىعارمايدى» دەگەن بولجامدار بار.

قازاقستان استىق ءوندىرۋشى مەملەكەتتەردىڭ ىشىندە العاشقى 15 ەلدىڭ قاتارىنا كىرەدى. استىق ءوندىرىسىن ەكسپورتتاۋ ارقىلى رەسەي مەن ۋكراينانىڭ نارىقتاعى ورنىن الۋعا تىرىسۋعا دا بولادى دەيدى ماماندار.

وزبەكستان مەملەكەتتىك رەزەرۆىن تولتىرۋ ماقساتىندا 600 مىڭ توننا استىق ساتىپ الماق. ونىڭ ىشىندە 100 مىڭ توننانى قازاقستاننان ساتىپ الۋ جوسپارلانۋدا. تاپسىرىس ءساۋىر-ماۋسىم ارالىعىندا ورىندالۋى كەرەك. بۇل تۋرالى وزبەكستاندىق سايتتار جازۋدا.

رەسەي ەنگىزىلگەن سانكتسيالارعا بايلانىستى سىرتقا استىق ونىمدەرىن شىعارۋعا تىيىم سالدى. تىيىم 2022 جىلدىڭ ماۋسىم ايىنىڭ سوڭىنا دەيىن. وزبەكستان بيىل 7,7 ملن توننا استىق الۋدى جوسپارلاپ وتىر. بۇل وتكەن جىلمەن سالىستىرعاندا 1 ملن تونناعا ارتىق. ال 2021 جىلى قازاقستان وزبەكستانعا 2,77 ميلليون توننا استىق ساتقان، بۇل وزبەكستان ساتىپ العان استىقتىڭ  94% پايىزىن قۇرايدى. بيىل رەسەيدىڭ تىيىم سالۋىنا بايلانىستى بۇل كورسەتكىش ارتۋى مۇمكىن.

2022 جىلى قازاقستان ەۋروپا ەلدەرىنە استىق ءونىمىن رەكوردتىق دەڭگەيدە جەتكىزگەن. ەو ەلدەرىنە 13 ەسە كوپ استىق ساتىلعان. بۇل ۋكراينا سوعىسىنا تىكەلەي بايلانىستى بولىپ تۇر. ەو ەلدەرى بيىل قازاقستاننان كوبىرەك استىق الۋعا نيەتتى، ال رەسەي ەو-عا استىق ساتپايتىنىن مالىمدەپ ۇلگەردى.

Abai.kz