پرەزيدەنت توقاەۆ ۇلتتىق قاۋىپسىزدىك كوميتەتىنىڭ توراعاسى ەرمەك ساعىمباەۆتى قابىلدادى. بۇل تۋرالى اقوردانىڭ ءباسپاسوز قىزمەتى حابارلادى.

كەزدەسۋدە ساعىمباەۆ ۇلتتىق قاۋىپسىزدىك كوميتەتىنىڭ بۇرىنعى باسشىلىعىنا قاتىستى ىستەردى تەرگەپ-تەكسەرۋ بارىسى جونىندە بايانداعان. الايدا، ناقتى تەرگەپ-تەكسەرۋ بارىسىنان اقوردا ناقتى اقپارات بەرمەگەن.

«ەرمەك ساعىمباەۆ پرەزيدەنتكە قىلمىستىق ىستەردى، ونىڭ ىشىندە ۇلتتىق قاۋىپسىزدىك كوميتەتىنىڭ بۇرىنعى باسشىلىعىنا قاتىستى ىستەردى تەرگەپ-تەكسەرۋ بارىسى جونىندە باياندادى.

ۇلتتىق قاۋىپسىزدىك كوميتەتى قابىلداعان شارالاردىڭ ناتيجەسىندە 1769 قارۋ، 273 گراناتا جانە 49 303 وق-ءدارى، سونىڭ ىشىندە قاڭتار وقيعاسى كەزىندە ۇرلانعان قارۋ-جاراقتار زاڭسىز قولدانىستان الىندى.

ەسىرتكى بيزنەسىنە قارسى كۇرەس اياسىندا 6 ەسىرتكى زەرتحاناسىنىڭ جۇمىسى توقتاتىلىپ، 10 حالىقارالىق جانە 11 وڭىرلىك ەسىرتكى كانالى جويىلدى.  404,5 كگ كولەمىندە ەسىرتكىنىڭ بىرنەشە ءتۇرى مەن 2 توننادان استام پرەكۋرسور تاركىلەندى.

مەملەكەتتىك شەكارانى قورعاۋ سالاسىندا ءتارتىپ بۇزعان 2225 ادام ۇستالدى.

500 ميلليون تەڭگەدەن استام سوماداعى ۆاليۋتانىڭ، قۇنى 1,3 ميلليارد تەڭگە بولاتىن حالىق تۇتىناتىن تاۋارلاردىڭ جانە جالپى سوماسى 25 ميلليون تەڭگە بولاتىن جانار-جاعارمايدىڭ زاڭسىز اينالىمىنا توسقاۋىل قويىلدى.

اۋماقتىق سۋ جۇيەلەرىنە قاتىستى 57 زاڭ بۇزۋشىنىڭ ارەكەتى توقتاتىلدى، 98,7 شاقىرىم براكونەرلىك زاتتار تاركىلەندى. 500 ميلليون تەڭگەدەن استام ىقتيمال شىعىننىڭ جولى كەسىلدى»، – دەپ جازادى اقوردانىڭ ءباسپاسوز قىزمەتى.

Abai.kz