13 ملرد تەڭگەدەن استام قارجىنى جىمقىردى دەگەن كۇدىكپەن «وكم وپەراتورى» جشس بۇرىنعى باسقارۋشى ديرەكتورى ۇستالدى. بۇل تۋرالى سىبايلاس جەمقورلىققا قارسى ءىس-قيمىل اگەنتتىگى حابارلادى.

«سىبايلاس جەمقورلىققا قارسى ءىس-قيمىل اگەنتتىگى «وكم وپەراتورى» جشس بۇرىنعى باسقارۋشى ديرەكتورىن ۇستادى.

ول «جاسىل دامۋ» اق («وكم وپەراتورى» جشس قۇقىقتىق ميراسقورى) تۇلعاسىندا مەملەكەتكە اسا ءىرى مولشەردە زالال كەلتىرە وتىرىپ، ىستەن شىققان كولىك قۇرالدارىن كادەگە جاراتۋدىڭ جوعارى قۇنىن بەلگىلەۋ ارقىلى «RecyclingCompany» جشس-نە زاڭسىز تۇردە قايتا تىركەپ، 13 ملرد.تەڭگەدەن استام سومادا سەنىپ تاپسىرىلعان اقشا قاراجاتىن جىمقىردى دەپ كۇدىكتەلۋدە.

قىلمىستىق ارەكەتتەر 2016-2019 جىلدار ارالىعىندا «وكم وپەراتورى» جشس باسقا قىزمەتكەرلەرىمەن بىرلەسىپ جاسالدى. سوتتىڭ سانكتسياسىمەن كۇدىكتى قاماۋعا الىندى.
ونىڭ ءىس-ارەكەتتەرىنە قورىتىندى قۇقىقتىق باعالاۋدى سوت بەرەدى»، – دەلىنگەن اگەنتتىك اقپاراتىندا.

19 قاڭتاردا ۇكىمەت سايتىندا «وپەراتور روپ» كومپانياسىنىڭ «ۋتيليزاتسيالىق الىمدى اكىمشىلەندىرۋ جانە ءتيىستى قاراجاتتاردى باسقارۋ شەڭبەرىندەگى قىزمەتى توقتاتىلدى. ۋتيليزاتسيالىق الىم قاراجاتى ەسەبىنەن قۇرىلعان اكتيۆتەر مەملەكەت مەنشىگىنە بەرىلدى» دەپ حابارلانعان.

كومپانيانىڭ مىندەتىن ەندى مەملەكەتتىك «جاسىل دامۋ» اق اتقارادى.

11 قاڭتاردا قازاقستاننىڭ قازىرگى پرەزيدەنتى ۋتيليزاتسيا الىمىن جينايتىن «وپەراتور روپ» كومپانياسىنىڭ جۇمىسىن توقتاتۋدىبۇيىرعان.

بۇل كومپانيانىڭ بۇرىنعى پرەزيدەنت نۇرسۇلتان نازارباەۆتىڭ ءاليا نازارباەۆاعا قاتىسى بارى ايتىلادى. بۇعان دەيىن بيلىك ۋتيليزاتسيا الىمىن جينايتىن «وپەراتور روپ» كومپانياسىنا كەيىنگى بەس جىلدا 691,9 ملرد تەڭگە قاراجات تۇسكەنىن ايتقان.

Abai.kz