بيىلعى «قاسىرەتتى قاڭتار» وقيعاسىنان كەيىن بۇرىنعى پرەزيدەنت نۇرسۇلتان نازارباەۆتىڭ وتباسى مۇشەلەرى ەلدەگى ءىرى قىزمەت ورىندارىنان بوساتىلا باستادى. سونى ءبىرى – نازارباەۆتىڭ كۇيەۋ بالاسى تيمۋر قۇلىباەۆ 2022 جىلى 17 قاڭتاردا "اتامەكەن" ۇلتتىق كاسىپكەرلەر پالاتاسىنىڭ توراعاسى قىزمەتىنەن كەتكەن بولاتىن. ءباسپاسوز حابارلاماسىندا ونىڭ جۇمىس ورنىن بوساتۋ سەبەبى كورسەتىلمەگەن، تەك "ۇلتتىق كاسىپكەرلەر پالاتاسىنىڭ جوعارى باقىلاۋ ورگانىن سەگىز جىل بويى باسقارۋ مەن ءۇشىن ۇلكەن قۇرمەت پەن جاۋاپكەرشىلىك بولدى",- دەپ جازىلدى حابارلامادا.

ىلە-شالا تيمۋر قۇلىباەۆتىڭ تاعى ءبىر قىزمەتى رەسەيلىك الىپ كومپانيا «گازپرومنىڭ» ديرەكتورلار كەڭەسىنىڭ مۇشەلىگىنەن الىنىپ، ونىڭ ورنىن رەسەي پرەزيدەنتى ۆلاديمير ءپۋتيننىڭ دوسى گەرحارد شرەدەر باسادى دەگەن اقپارات شىقتى.

2012 جىلدان بەرى قازاقستانننىڭ ەڭ باي كاسىپكەرلەرى قاتارىنان تابىلىپ كەلگەن تيمۋر قۇلىباەۆتىڭ بۇدان بولەك تاعى دا قىزمەتتەرى بار. ول - KAZENERGY مۇناي-گاز جانە ەنەرگەتيكا كەشەنى ۇيىمدارى قاۋىمداستىعىنىڭ جەتەكشىسى ءارى قازاقستان بوكس فەدەراتسياسىنىڭ قۇرمەتتى پرەزيدەنتى، قازىرگى كۇنى قازاقستان ۇلتتىق وليمپيادا كوميتەتىن باسقارادى.

بەيجىڭ – 2022 قىسقى وليمپيادا قارساڭىندا قۇلىباەۆ باسقارىپ وتىرعان ۇلتتىق وليمپيادا كوميتەتى الداعى ۋاقىتتا سپورتقا بولىنەتىن قارجىنى يگەرۋ قۇقىعىنان ايىرىلدى. بۇعان سەبەپ پرەزيدەنت قاسىم-جومارت توقاەۆتىڭ «تاپسىرماسىمەن» مادەنيەت جانە سپورت مينيسترلىگىندەگى سپورت كوميتەتىنىڭ ۇوك-پەن اراداعى كەلىسىم-شارتتى جويىلۋى. سونداي-اق پرەزيدەنت قۇلىباەۆتى بيىلعا اق وليمپيادا ويىندارىنا ەرتىپ اپارمادى.

بەيجىڭ قىسقى وليمپياداسىنا اتتانعان سپورتشىلارىمىز ەل قورجىنىنا بىردە-ءبىر مەدال سالا المادى. شورت-ترەك بويىنشا ءتورتىنشى ورىنعا شىققان ابزال اجىعاليەۆ وليمپيادا ويىندارىنان كەيىن الەۋمەتتىك جەلىدە سپورت سالاسىنداعى «بىلىقتاردى» اشكەرە قىلعان جازباسىن جاريالادى.

ول سپورتشىلاردىڭ جەتكىلىكتى دەڭگەيدە سپورت قۇرال جابدىقتارىمەن قامتاماسىز ەتىلمەيتىنىن ايتقان.

«بىزگە كەرەكتى قۇرال جابدىقتاردى تەك زاڭدا رۇقسات ەتىلگەن شامادا عانا الىپ بەرەدى. ينۆەنتار الۋ - ءبىز ءۇشىن مۇزدان كەيىنگى ۇلكەن ماسەلە دەپ ايتار ەدىم. ءدال وسىنداي پروبلەماعا توكيونىڭ الدىندا ساداقشىلار دا تاپ بولدى. وسى پروبلەما بارلىق سپورتشىنىڭ باسىنان وتەدى جانە سپورتشىلار ءاردايىم وسىنى ايتىپ كەلەمىز. بىراق، وعان مينيسترلىك نەمەسە باسقارمالار ءمان بەرىپ وتىرعان جوق. كوڭىل اۋدارسا دا، تەك وليمپيادانىڭ الدىندا ەسىنە الادى. كاسىبي سپورتقا تەك وليمپيادا كەزىندە ەمەس، ۇنەمى، تۇراقتى نازار اۋدارىپ، جۇمىس ىستەپ وتىرۋ كەرەك. ءبىزدىڭ سپورت ءۇشىن ۆەلوجاتتىعۋلار وتە ماڭىزدى. وعان ۆەلوستانوك، ۆەلوسيپەد، كونكيىمىزدى قارايتىن گەيچ پەن كۇش ولشەيتىن تەحنيكالار كەرەك. بارلىق ەلدىڭ كوماندالارى اتالعان زاتتارمەن تولىق قامتاماسىز ەتىلگەن. ءبىز ولاردى ونسىز دا جەڭىپ ءجۇرمىز. بىراق، بىزگە بەرىلگەن ۋادە، ۋادە كۇيىندە قالىپ وتىر. ءاردايىم اڭگىمە ينۆەنتارعا كەلىپ تىرەلگەندە «گوسزاكۋپتىڭ» پروتسەستەرىنە بايلانىستى كەشىكتىرىلىپ جاتىر» دەپ، سىلتاۋراتادى. حالىقارالىق جاتتىعۋلار ءبىزدىڭ جابدىقتارىمىز جوق دەپ توقتاپ تۇرمايدى عوي. ناتيجەسىندە ءبىزدىڭ مەحانيكتەر ءوز قالتالارىنان اقشا شىعارىپ، كونكيگە ارنالعان «زاپچاستاردى» ساتىپ اپەرەدى. نەمەسە «زاڭدا رۇقسات ەتىلمەگەن» دەپ ايتقان سوڭ، كەيبىر قۇرالداردى ءوز اقشامىزعا جيناپ الۋىمىزعا تۋرا كەلەدى. سەبەبى، ءبىز ينۆەنتار جوق نەمەسە جەتپەيدى دەپ جارىسقا قاتىسپاي قويا المايمىز. ءبىزدىڭ جارىستار تەندەر قاشان وتەتىنىن كۇتىپ وتىرمايدى. بۇل تەك بيىل ەمەس، جىلدا قايتالاناتىن نارسە»،-دەپ جازعان بولاتىن ول.

سپورتشىنىڭ جانايعايى كىل شەندى-شەكپەندىلەر باسقاراتىن ۇلتتىق وليمپيادا كوميتەتىنىڭ وسالدىعىن بايقاتادى. سوعان قاراماستان ءار ءتۇرلى لاۋازىمدارىنان قاعىلعان قۇلىباەۆ ۇلتتىق وليمپيادا كوميتەتىنىڭ باسشىلىعى قىزمەتىن ساقتاپ قالدى.

Forbes جۋرنالىنىڭ اقپارىنشا 2,9 ملرد اقش دوللورىن يەمدەنگەن ەڭ باي وليگارح تيمۋر قۇلىباەۆتىڭ قازاقستاننان بولەك شەتەلدە جاسىرعان ەن بايلىعى تۋرالى دا ءباسپاسوز بەتىنە وقتىن-وقتىن جاريالانىپ تۇرادى.

جاقىندا ۇلىبريتانيا پارلامەنتىنىڭ دەپۋتاتى مارگارەت حودج قازاقستاننىڭ «كلەپتوكراتيالىق ەليتاسى» حالىقتان ۇرلاعان اقشاسىن شەتەلدە ساقتادى دەپ، ەكس پرەزيدەنت نۇرسۇلتان نازارباەۆتىڭ وتباسى مۇشەلەرىنە سانكتسيا سالۋعا شاقىردى.

ەندەشە، الداعى ۋاقىتتا باسى سانكتسياعا ىلىنگەن تۇلعا قالايشا سپورت سالاسىن دامىتپاق؟ وزىق ەلدەرگە بارىپ قالاي كەلىسسوزدەر جۇرگىزبەك؟ وسى تەكتەس سۇراقتار كوپشىلىكتىڭ كوكەيىندە تۇرعانى انىق.

Abai.kz