قازاقستان دۇيسەنبىدەن باستاپ ءوز ازاماتتارى مەن شەتەلدىكتەرگە قۇرلىقتا ورنالاسقان شەكارالارداعى شەكتەۋلەردى جويادى. مۇنداي شەشىم تۇراقتى ەپيدەمولوگيالىق جاعدايعا بايلانىستى قابىلداندى.

جەرگىلىكتى اقپارات قۇرالدارىنىڭ ۇكىمەتكە سىلتەمە جاساپ حابارلاۋىنشا، قازاقستاننىڭ رەسەيمەن، وزبەكستانمەن جانە قىرعىزستانمەن شەكارالارىنداعى باقىلاۋ-وتكىزۋ بەكەتتەرىندەگى شەكتەۋلەر الىنادى.

بۇعان قوسا، قازاقستاننىڭ مەملەكەتتىك شەكارالارىنان اۋە جولدارى ارقىلى وتۋگە قويىلعان بارلىق شەكتەۋ جويىلادى. بىراق كوروناۆيرۋسقا قارسى ۆاكتسينانى تولىق العانى، رەۆاكتسيناتسيا تۋرالى قۇجاتتار نەمەسە پتسر ناتيجەسىن تالاپ ەتۋ ساقتالادى.

ەسكە سالايىق، بۇنىڭ الدىندا قىرعىزستان پرەزيدەنتى سادىر جاپاروۆ قازاقستان پرەزيدەنتى قاسىم-جومارت توقاەۆتان قىرعىزستان ازاماتتارى ءۇشىن قۇرلىقتاعى شەكارانى اشۋىن سۇراعان. توقاەۆ بۇل ۇسىنىسقا قاتىستى تاپسىرمانى قۇزىرلى ورگانداردىڭ قاراۋىنا بەرەتىنىن ايتتى، دەپ حابارلادى قىرعىز پرەزيدەنتىنىڭ ءباسپاسوز قىزمەتى.

قازاقستان مەن قىرعىزستان اراسىنداعى شەكارا 2020 جىلعى كوكتەمدە كوروناۆيرۋس ىندەتىنە بايلانىستى جابىلعان. قىرعىزستان ازاماتتارى كورشى ەلگە اۋە جولدارى ارقىلى عانا وتەدى.

Abai.kz