رەسەيدىڭ ۋكرايناعا اسكەري قيمىل جۇرگىزىپ جاتقانىن ەسكەرتكەن ستولتەنبەرگ كيەۆتىڭ باتىس ەلدەرىنەن قارۋدىڭ ناقتى قاي تۇرلەرىن العانىن اتاپ جاتپادى.

ناتو ەلدەرى گرۋزيا، بوسنيا مەن گەرتسەگوۆيناعا دا كومەكتەسۋگە كەلىستى.

اتاپ ايتقاندا، گرۋزيا قاۋىپسىزدىك بايلانىسى جانە كيبەرقاۋىپسىزدىك سالالارىندا كومەك الادى. بوسنيا مەن گەرتسەگوۆينا ەلدىڭ قورعانىسىن نىعايتاتىن كومەك پاكەتىنە يە بولادى.

جەتىلىك توبىنداعى ەلدەر كرەملگە قىسىمدى كۇشەيتە تۇسەتىنىن مالىمدەدى. ولار رەسەيدىڭ مەملەكەتتىك قۇرىلىمدارىنا قارسى قوسىمشا سانكتسيا جاريالاۋدى كوزدەپ وتىر.

رەسەيدىڭ قارۋلى كۇشتەرى 24 اقپاندا پرەزيدەنت ۆلاديمير ءپۋتيننىڭ بۇيرىعىمەن ۋكراينا اۋماعىنا باسىپ كىردى. كيەۆ ماسكەۋدى ازاماتتىق ينفراقۇرىلىمداردى ادەيى جويىپ جاتىر ايىپتادى. رەسەي جاعى اسكەري نىسانداردى عانا اتقىلادىق دەپ وتىر.

سوعىس ۋاقىتىندا كەلىسسوزدەر دە ءجۇرىپ جاتىر، بىراق ازىرگە ودان ناتيجە شىقپادى. رەسەيدىڭ سىرتقى ىستەر ءمينيسترى سەرگەي لاۆروۆ ۋكراينا بەيبىت كەلىسىمدەردە 29 ناۋرىزدا ستامبۋلداعى جۇزدەسۋدە ايتىلعان تالاپتارىن قاتايتا ءتۇستى دەپ مالىمدەدى.

كەلىسسوزدەردە ۋكراين جاعى ۋكراينانىڭ بەيتاراپ مارتەبەسۋ تۋرالى حالىقارالىق كەلىسىم جوباسىن ۇسىنىپ، ونىڭ قاۋىپسىزدىگىنە حالىقارالىق كەپىل سۇراعان. اتاپ ايتقاندا، مۇنداي كەپىلدىك اننەكسيالانعان قىرىمعا، دونداسستىڭ ءبىر بولىگىنە جۇرمەيتىنى ايتىلعان. ەندى كيەۆ مۇنداي ەرەجەدەن باس تارتىپ وتىر، دەيدى لاۆروۆ.

ۋكراين جاعى ازىرگە لاۆروۆتىڭ مالىمدەمەسىنە جاۋاپ بەرمەدى. ۋكراينا سىرتقى ىستەر ءمينيسترى دميتري كۋلەبا بۇل ۋاقىتتا بريۋسسەلگە بارىپ، ناتو ەلدەرىنە مۇشە ەلدەردىڭ سىرتقى ىستەر مينيسترلەرىمەن، جەتىلىك توبى ەلدەرىنىڭ وكىلدەرىمەن كەزدەستى.

Abai.kz