بۇگىن تامارا دۇيسەنوۆا قر ەڭبەك جانە حالىقتى الەۋمەتتىك قورعاۋ ءمينيسترى بولىپ قايتا تاعايىندالدى. بۇعان دەيىن اتالعان مينيسترلىكتى سەرىك شاپكەنوۆ باسقارعان بولاتىن. ول 7 ءساۋىر كۇنى پرەزيدەنت توقاەۆتىڭ جارلىعىمەن اتىراۋ وبلىسىنىڭ اكىمى بولىپ تاعايىندالعان.

تامارا دۇيسەنوۆا قازىر 57 جاستا. ەڭبەك جولىن 1988 جىلى وڭتۇستىك قازاقستان وبلىسى سارىاعاش اۋدانىنداعى ورتا مەكتەپتە ينفورماتيكا ءپانىنىڭ مۇعالىمى بولىپ باستاعان. ول تاشكەنت حالىق شارۋاشىلىعى ينستيتۋتىندا «ينجەنەر-ەكونوميست» ماماندىعى بويىنشا ءبىلىم العان.

1994-1997 جىلدارى سارىاعاش اۋدانى اكىمىنىڭ كەڭەسشىسى، ورىنباسارى، ءبىرىنشى ورىنباسارى بولادى. 1997-1999 جىلدارى شىمكەنت قالاسى اكىمىنىڭ ءبىرىنشى ورىنباسارى، كەيىن وڭتۇستىك قازاقستان وبلىسى اكىمىنىڭ ورىنباسارى بولىپ قىزمەت اتقارادى.

قر ەڭبەك جانە حالىقتى الەۋمەتتىك قورعاۋ مينيسترلىگى تامارا بوسىمبەكقىزى دۇيسەنوۆانىڭ «جەكە مينيسترلىگى» دەسە دە بولادى.

تامارا دۇيسەنوۆا 2002 – 2006 جىلدارى قر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى، 2008 – 2013 جىلدارى قر ەڭبەك جانە حالىقتى الەۋمەتتىك قورعاۋ مينيسترلىگىنىڭ جاۋاپتى حاتشىسى قىزمەتتەرىن اتقارعان.

سول 2013 جىلدىڭ اقپانىندا قايتادان قر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى، ماۋسىم ايىندا – مينيستر مىندەتىن اتقارۋشى، شىلدە ايىندا – مينيستر بولىپ تاعايىندالعان.

2014 جىلى بۇرىنعى پرەزيدەنت نۇرسۇلتان نازارباەۆتىڭ جارلىعىمەن ەڭبەك جانە حالىقتى الەۋمەتتىك قورعاۋ مينيسترلىگى مەن دەنساۋلىق ساقتاۋ مينيسترلىگى بىرىكتىلەدى دە، «دەنساۋلىق ساقتاۋ جانە الەۋمەتتىك دامۋ مينيسترلىگى» دەپ اتالادى. بىرىككەن مينيسترلىكتى تامارا دۇيسەنوۆا باسقاردى.

2017 جىلى دەنساۋلىق ساقتاۋ جانە الەۋمەتتىك دامۋ مينيسترلىگى ەكىگە ءبولىنىپ، قايتادان باياعى قالپىنا ورالادى. وسىلايشا تامارا دۇيسەنوۆا دا بۇرىنعى جۇمىس ورنى – ەڭبەك جانە حالىقتى الەۋمەتتىك قورعاۋ مينيسترلىگىنە باسشىلىققا قايتا سايلانادى.

ال 2018 جىلدىڭ اقپان ايىندا ەكس-پرەزيدەنت نازارباەۆ «مىندەتتى مەديتسينالىق ساقتاندىرۋدى ەنگىزۋدى» كەيىنگە قالدىرعانى ءۇشىن ءمينيستردى كوپشىلىك الدىندا سىنعا العان.

«نە بولدى، تامارا؟ ايت، الدە، بۇل جۇمىستان شارشادىڭ با؟»، - دەگەن ەكس-پرەزيدەنت نازارباەۆتىڭ سوگىسىنەن كەيىن تامارا حانىم مينيسترلىك تىزىگىن تاپسىرىپ بەرگەن.

دۇيسەنوۆا مينيسترلىكتەن كەتكەن سوڭ 2018-2019 جىلدارى «Nur Otan» پارياسىنىڭ حاتشىسى بولىپ ىستەدى. 2020 جىلدىڭ  5 مامىرىنان باستاپ  قازاقستان رەسپۋبليكاسى پرەزيدەنتىنىڭ كومەكشىسى قىزمەتىن اتقاردى.

بۇگىن دۇيسەنوۆا ءۇشىنشى رەت ەڭبەك جانە حالىقتى الەۋمەتتىك قورعاۋ ءمينيسترى بولىپ سايلانىپ وتىر.

«تامارا بوسىمبەكقىزى دۇيسەنوۆا قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ ءمينيسترى بولىپ تاعايىندالسىن، ول قازاقستان رەسپۋبليكاسى پرەزيدەنتىنىڭ كومەكشىسى – قازاقستان رەسپۋبليكاسى پرەزيدەنتى اكىمشىلىگىنىڭ وتىنىشتەردى قاراۋدى باقىلاۋ ءبولىمىنىڭ مەڭگەرۋشىسى لاۋازىمىنان بوساتىلسىن»، - دەلىنگەن پرەزيدەنت جارلىعىندا.

ايجان تەمىرحان

Abai.kz