دۇنيەجۇزىلىك بانك بولجامىنا قاراعاندا، رەسەي باسقىنشىلىعىنا بايلانىستى ۋكراينا ەكونوميكاسى شامامەن 45,1 پايىزعا ازايادى، "ونىڭ اۋقىمى سوعىستىڭ قارقىنى مەن قانشا ۋاقىتقا جالعاساتىنىنا بايلانىستى بولادى".

يمپورت كارزەڭكەسىندەگى تاۋاردىڭ 40 پايىزى رەسەيدەن كەلەتىن قازاقستان ەكونوميكاسى 2022 جىلى 1,5 پايىزعا تەجەلەدى. "رەسەيدەگى ەكونوميكالىق كوللاپس قازاقستانعا جەتكىزىلەتىن تاۋار تاسىمالىنىڭ تىزبەگىنە نۇقسان كەلتىرىپ، قازاقستان ەكونوميكاسىنىڭ دامۋىن تەجەيدى. جالپى ىشكى ءونىمى 2022 جىلى 1,5–2 پايىز ازايادى", - دەيدى دۇنيەجۇزىلىك بانك.

بانك ساراپشىلار قازاقستان مۇنايىنىڭ 80 پايىزىن باتىسقا جەتكىزەتىن كاسپي قۇبىر جەلىسىنىڭ ناۋرىز ايىندا نوۆوروسسيسك پورتىندا ىستەن شىققانىنا نازار اۋدارعان. جوندەۋگە ءبىر ايدان التى اپتاعا دەيىن ۋاقىت كەتەتىنىن ەسكەرگەندە، 2022 جىلى مۇناي ەكسپورتىنىڭ كولەمى بەس-التى پايىزعا قىسقارادى.

دۇنيەجۇزىلىك بانكتىڭ ەسەبىنشە، رەسەيدىڭ جالپى ىشكى ءونىمى باتىس سانكتسياسىنا بايلانىستى 11,2 پايىزعا تومەندەيدى.

"رەسەي باسقىنشىلىعى ۋكراينا ەكونوميكاسىنا مەن ينفراقۇرىلىمىنا وراسان زور شىعىن كەلتىرىپ جاتىر",- دەدى دۇنيەجۇزىلىك بانكتىڭ ەۋروپا جانە ورتالىق ازيا بويىنشا ۆيتسە-پرەزيدەنتى اننا بەردە.

رەسەي ۋكراينانىڭ ازوۆ تەڭىزىندەگى نەگىزگى پورتى ماريۋپول قالاسىن تالقانداپ، حالىق سانى جونىنەن ۋكراينانىڭ ەكىنشى قالاسى حاركوۆ قالاسىنا زور نۇقسان كەلتىردى. رەسەي اسكەرى كوپتەگەن قالالاردىڭ اۋەجايلارى مەن تەمىرجولدارىن بومبالاپ، كوپىرلەردى جارىپ جىبەردى.

بىرىككەن ۇلتتار ۇيىمىنىڭ مالىمەتىنە قاراعاندا، سوعىستان 10 ميلليوننان استام ۋكراين بوسىپ كەتكەن، ونىڭ 4,5 ميلليوننان استامى شەتەلگە باس ساۋعالاۋعا ءماجبۇر بولعان.

Abai.kz