كەشە قاماۋداعى كاسىپكەر، ەكس-پرەزيدەنت نۇرسۇلتان نازارباەۆتىڭ تۋىسى قايرات ساتىبالدىعا تيەسىلى فيرمالاردىڭ يەلىگىندە بولعان «قازاقتەلەكوم» اق-نىڭ 28 پايىز اكتسياسى مەملەكەت مەنشىگىنە قايتارىلعانى تۋرالى بەلگىلى بولدى. بۇل تۋرالى ۇكىمەتتىڭ ءباسپاسوز مالىمدەدى.

ۇكىمەت قاۋلىسىندا: «Skyline Investment Company S.A. جەكەمەنشىك كومپانياسىنىڭ «قازاقتەلەكوم» اق-نىڭ 2 671 481 قاراپايىم اكتسياسىن سىيعا تارتۋ كەلىسىم-شارتى نەگىزىندە مەملەكەت مەنشىگىنە قايتارۋ تۋرالى ۇسىنىسى ماقۇلدانسىن. بۇل – اكتسيونەرلىك قوعامنىڭ جارعىلىق كاپيتالىنىڭ 24,95 پايىزى»، - دەلىنگەن.

ودان بولەك، Alatau Capital Investment كومپانياسى دا سىيعا تارتۋ جولىمەن «قازاقتەلەكومداعى» 413 412 اكتسياسىن مەملەكەت مەنشىگىنە وتكىزۋدى ۇيعارعان. مۇنى دا ۇكىمەتتىڭ ءوزى مالىمدەدى.

ايتا كەتەيىك، قايرات ساتىبالدى Alatau Capital Investment كومپانياسىنا 2015 جىلدان بەرى يەلىك ەتەدى ەكەن. ستاتۋسى - باسقارۋشى سەرىكتەس. سونداي-اق، وففشوردا تىركەلگەن Skyline Investment Company S.A. كومپانياسىنىڭ دا يەسى. ال اكتسيالاردى قايتارۋ «قازاقتەلەكومدى» دەمونوپوليزاتسيالاۋ تۋرالى باستاما كوتەرىلگەننەن كەيىن جانە ساتىبالدىنىڭ ۇستىنەن قىلمىستىق ءىس قوزعالعاننان كەيىن جۇزەگە اسقان.

قايرات ساتىبالدى «قىزمەت بابىن اسىرا پايدالاندى» جانە «قازاقتەلەكوم» اق قارجىسىن ءىرى كولەمدە ۇرلادى» دەگەن كۇدىكپەن 13 ناۋرىزدا تۇتقىندالعان. جەمقورلىقپەن كۇرەس قىزمەتى ساتىبالدى «مەملەكەت قاۋىپسىزدىگىنە قاتەر توندىرەتىن باسقا ىستەر بويىنشا تەرگەلىپ جاتقانىن» ايتتى.

2021 جىلعى زەرتتەۋىندە ازاتتىق ليۋكسەمبۋرگتەگى LBR رەەسترى بويىنشا، قايرات ساتىبالدى Skyline Investment Company S.A. كومپانياسىنىڭ جالعىز قۇرىلتايشىسى ەكەنىن انىقتاعان. اشىق دەرەككوزدەگى اقپاراتقا قاراعاندا، ساتىبالدى 2016 جىلى ءوزىنىڭ Alatau Capital Invest كومپانياسى ارقىلى «قازاقتەلەكومنىڭ» 4 پايىزعا جەتپەيتىن اكتسياسىن ساتىپ العان.

4 ساۋىردە قازاقستاننىڭ جەمقورلىقپەن كۇرەس اگەنتتىگى ەكس-پرەزيدەنتتىڭ نەمەرە ىنىسىنە قارايتىن باسقا كومپانيالاردا دا اقشا ۇرلاۋ فاكتىلەرى بولعان دەگەن مالىمدەمە جاسادى. بىرنەشە كۇننەن سوڭ «بيزنەستى زاڭسىز تارتىپ الدى» دەگەن كۇدىكپەن قايرات ساتىبالدىنىڭ بۇرىنعى ايەلى گۇلميرا ساتىبالدى دا تۇتقىندالدى.

«قاسىرەتتى قاڭتار» وقيعاسىنان سوڭ بۇرىنعى پرەزيدەنتتىڭ وتباسى مۇشەلەرى مەن ونىڭ ماڭايىنداعى ادامدار جوعارى لاۋازىمدارىنان ايىرىلىپ، كەيبىرەۋى تۇتقىندالدى. قامالعاندار اراسىندا نازارباەۆتاردىڭ بۇرىنعى قۇداسى، وليگارح قايرات بورانباەۆ تا بار. بورانباەۆقا «كۆازيمەملەكەتتىك سەكتوردا اسا ءىرى كولەمدە اقشا ۇرلادى» دەگەن ايىپ تاعىلدى.

Abai.kz