سوعىس باستالعالى قازاقستانعا 130 مىڭ رەسەي ازاماتى كەلگەن، دەپ حابارلايدى ىشكى ىستەر ءمينيسترىنىڭ ءبىرىنشى ورىنباسارى مارات قوجاەۆ.

ءماجىلىس وتىرىسىندا دەپۋتاتتار ۋكرايناداعى وقيعاعا بايلانىستى اقپان-ناۋرىز ايلارىندا رەسەي مەن ۋكراينادان قانشا ازامات قازاقستانعا كەلگەنىن، قانشا ادام ازاماتتىق پەن ىقتيارحات الۋعا ءوتىنىش بەرگەنىن سۇرادى.

مارات قوجاەۆتىڭ ايتۋىنشا، ءبىرىنشى قاڭتاردان بەرى رەسپۋبليكاعا 457 مىڭ شەتەلدىك كەلگەن. ونىڭ دەنى – كورشى ەلدەردەن، ەڭ كوبى – وزبەكتەر، ەكىنشى ورىندا – رەسەي ازاماتتارى.

"24 اقپاننان 11 ساۋىرگە دەيىن 130 مىڭ رەسەي ازاماتى ەلىمىزگە كىرگەن. 120 مىڭنان استامى شىعىپ كەتتى. بىلتىرعى جىلمەن سالىستىرعاندا، بۇل كورسەتكىش ەكى ەسە ءوسىپ وتىر. بىراق 2020-2021 جىلدارى پاندەمياعا بايلانىستى شەكارا جابىلعانىن بىلەسىزدەر. ال ونىڭ الدىڭعى جىلدارى – 2018-2019 جىلدارمەن سالىستىرعاندا، بۇل سان ءۇش ەسەگە از. ول جىلدارى ءبىرىنشى توقساندا ەلىمىزگە رەسەيدەن 350-360 مىڭ ادام كىرىپ-شىعىپ تۇردى", - دەدى قوجاەۆ ءماجىلىس وتىرىسىندا.

ال وسى جىلدىڭ ءبىرىنشى توقسانىندا ۋكراينادان قازاقستانعا 3481 ادام كەلگەن.

قوجاەۆ كەلتىرگەن ستاتيستيكاعا سۇيەنسەك، بۇگىندە 170 رەسەيلىك جانە جەتى ۋكرايندىق قازاقستان ازاماتتىعىن الۋعا ءوتىنىش ءبىلدىردى. بۇل وتكەن جىلدارداعى كورسەتكىشپەن بىردەي.

2019 جىلى رەسەيدەن 200-دەن استام ازامات قازاقستان ازاماتتىعىن الۋعا ءوتىنىش بىلدىرگەن.

Abai.kz