ءماجىلىس دەپۋتاتتارى قارجى پيراميدالارىن جارنامالاۋعا قارسى زاڭ جوباسىن ازىرلەيدى. بۇل تۋرالى ءماجىلىس توراعاسى ەرلان قوشانوۆ Facebook-تەگى پاراقشاسىندا جازدى.

«بۇگىن جالپى وتىرىستا ءماجىلىس دەپۋتاتى يۋري لي ءوزىنىڭ دەپۋتاتتىق ساۋالىندا قارجى پيراميدالارى قىزمەتىنە قاتىستى وزەكتى ماسەلە كوتەردى. جاقىندا عانا ءبارىمىز قارجىلىق الاياقتىق ارەكەتتىڭ  تۇزاعىنا تۇسكەن ازاماتتاردىڭ قانداي كۇيزەلىسكە ۇشىرايتىنىنىڭ كۋاسى بولدىق»، – دەپ جازدى ەرلان قوشانوۆ.

سونىمەن قاتار ءماجىلىس سپيكەرى مەملەكەت باشىسىنىڭ قارجى پيراميدالارىنا قارسى كۇرەس بويىنشا ءتيىستى مەملەكەتتىك ورگاندارعا تاپسىرما بەرگەنىن اتاپ ءوتتى.

«بۇل جۇمىسقا دەپۋتاتتار دا بەلسەندى قاتىساتىن بولادى. وسى ورايدا ءماجىلىس دەپۋتاتتارى اتالعان قارجىلىق جۇيەنى ۇيىمداستىرۋشىلاردى  جارنامالاعانى ءۇشىن قىلمىستىق جازا ەنگىزۋدى كوزدەيتىن جاڭا زاڭ جوباسىن قابىلداۋ جونىندە دەر كەزىندە، ورىندى باستاما كوتەردى دەپ ەسەپتەيمىن. سونىمەن بىرگە ءارتىس، بلوگەر، ۆاينەر نەمەسە باسقا دا قوعامدا وزىندىك ىقپالى بار ازاماتتار قارجى پيراميدالارىنىڭ الاياقتىق ءمان-ماعىناسى بار ەكەنىن ءتۇسىنىپ تۇرىپ،  ونى جارنامالايتىن بولسا، جاۋاپكەرشىلىككە تارتىلۋى كەرەك. ويتكەنى كەڭ كولەمدى جارناماعا جول بەرمەۋ ارقىلى قارجى پيراميدالارىنىڭ قىزمەتىن ايتارلىقتاي شەكتەۋگە بولادى»، – دەدى ەرلان قوشانوۆ.

ءماجىلىس توراعاسىنىڭ پىكىرىنشە، گەرمانيا مەن كانادا سياقتى دامىعان ەلدەردە مۇنداي زاڭ بار. دەپۋتتار ازاماتتارىمىزدى قارجى پيراميدالارىنا قاتىستى الاياقتىق ارەكەتتەردەن قورعاۋى كەرەك.

Abai.kz