بۇگىن ءماجىلىس دەپۋتاتتارى پرەزيدەنت قاسىم-جومارت توقاەۆتىڭ مەملەكەتتىك اپپاراتتىڭ قىزمەتىن بيۋروكراتيادان ارىلتۋ تۋرالى جارلىعىنا قولداۋ كورسەتىپ، ءوز پىكىرلەرىن ءبىلدىردى.

ماسەلەن دەپۋتات مەيرامبەك تولەپبەرگەن facebook-تەگى پاراقشاسىندا جارلىقتا جۇيەلى جانە قولدانبالى شارالار كەشەنى قاراستىرىلعانىن ايتىپ، قۇجاتتىڭ ماڭىزدىلىعىنا توقتالدى.

«بۇل شارالاردىڭ بارلىعى مەملەكەتتىك اپپاراتتىڭ ءتيىمدى جۇمىس ىستەۋىنە ىقپال ەتەدى»، – دەدى م.تولەپبەرگەن.

ءماجىلىس دەپۋتاتى ەرلان سايروۆ بۇل جارلىق مەملەكەتتىك ورگاندار جۇمىسىنىڭ تيىمدىلىگىن ارتتىرۋعا سەپتىگىن تيگىزەتىنىن ايتتى.

«جەدەل شەشىم قابىلدايتىن كەزدە، شەنەۋنىكتەر بيۋروكراتياعا سالىنىپ قاشقاقتايدى. بۇل ءوز كەزەگىندە، كوپتەگەن كۇرمەۋلى ماسەلەلەردىڭ جىلدار بويى شەشىلمەۋىنە الىپ كەلەدى. قۇجات وسى جۇيەلى پروبلەمالاردى رەتتەۋدىڭ جولى بولىپ تابىلادى»، – دەدى ە.سايروۆ.

دەپۋتاتتار پرەزيدەنت جارلىعى مەملەكەتتىك اپپاراتتىڭ جۇمىسىن وڭتايلاندىرۋدى تەزدەتۋگە جول اشادى دەگەن پىكىر ايتۋدا.

«مەملەكەتتىك اپپاراتتىڭ ماقساتى ايقىن. ول – حالىقتىڭ مۇددەسىن كوزدەيتىن ماڭىزدى قۇجاتتى ەل يگىلىگى ءۇشىن ءتيىمدى ورىنداۋ»، – دەدى نۇرلىبەك وجاەۆ facebook-تەگى پاراقشاسىندا.

سونىمەن قاتار ءماجىلىس دەپۋتاتتارى پرەزيدەنت جارلىعى مەملەكەتتىك قىزمەتتى زامان تالابىنا ساي جەتىلدىرۋگە باعىتتالعانىن ايتىپ، facebook-تەگى پاراقشالارىندا ءوز ويلارىمەن ءبولىستى.

«ەڭ الدىمەن شەشىم قابىلدانۋ ۇدەرىسى جىلدامداتىلادى. ودان كەيىن،  مەملەكەتتىك ورگاندارداعى ءبىرىنشى باسشىلاردىڭ دەربەستىگى ارتىپ، قۇجات اينالىمى مەن قاعازباستىلىق ازايادى»، – دەپ جازدى ءماجىلىس دەپۋتاتى باۋىرجان سارتباەۆ.

سونداي-اق، دەپۋتات باقىتبەك سماعۇل بيۋروكراتيانىڭ حالىق پەن بيزنەسكە قيىندىق اكەلەتىنىن ايتىپ، جارلىقتىڭ وسى ماسەلەلەردى تۇبەگەيلى شەشەتىنىنە نازار اۋداردى.

«پرەزيدەنتتىڭ بۇگىنگى جارلىعى مەملەكەت پەن ۇلتتىق مۇددەنى كوزدەيتىن اسا ماڭىزدى قۇجات بولىپ وتىر. جاڭا قازاقستاندى قۇرۋعا باعىتتالعان تاريحي قۇجاتتاردىڭ ءبىرى بولادى جانە ناقتى جۇزەگە اسىرىلادى دەگەن ۇمىتتەمىن»، – دەيدى باقىتبەك سماعۇل.

Abai.kz