رەسەيدىڭ ۋكراينا سوعىسىندا جوسپارى ماسكەۋ قالاعانداي ىسكە اسپاۋدا. كيەۆتى جىلدام الۋعا ءتيىس بولعان رەسەي اسكەرى كەرىسىنشە كيەۆ وبلىسىنان شەگىنىپ كەتتى. جەڭىلىس تاپتى. سەگىز باعىتتا شابۋىلعا شىققان رەسەي اسكەرىنىڭ تەك ەكى باعىتتى ۇستاپ تۇرۋىنا مۇمكىندىگى جەتكەن، ال قالعان باعىتتاردا شەگىنۋ نەمەسە قورشاۋعا ءتۇسۋ قاۋپى ارتقان. قازىرگى ۋاقىتتا رەسەي دونباسس ايماعى مەن حەرسون ماڭىندا شابۋىلداپ جاتىر. ماريۋپول قالاسىن ەكى ايدىڭ ىشىندە ءالى تولىق باسىپ الا المادى. بۇل ساتسىزدىكتەردىڭ بارلىعى دا رەسەي بيلىگى تىم جاۋاپتى ءارى قاۋىپتى شەشىمدەردى قابىلداۋعا ءماجبۇر ەتۋى مۇمكىن. 

تسرۋ ديرەكتورى ۋيليام بەرنس، «ۆلاديمير پۋتين ۋكرايناعا قارسى سوعىستا جەڭىسكە جەتۋدەن ءۇمىتىن ۇزەتىن بولسا، رەسەيدىڭ تاكتيكالىق نەمەسە شاعىن يادرولىق قارۋدى قولدانۋ قاۋپى بارىن» ايتتى. اقش ازىرگە رەسەيدىڭ قانداي دا ءبىر يادرولىق سوققى جاساۋعا دايىندالىپ جاتپاعانىن ايتادى. عارىشتىق تۇسىرىلىمدەر مەن كۇندەلىكتى مونيتورينگ سولاي دەيدى. دەگەنمەن پۋتين ونداي قاۋىپتى قادامعا بارۋى ابدەن مۇمكىن.

بەرنس اقش پرەزيدەنتى دجو بايدەننىڭ اكىمشىلىگى رەسەيدىڭ يادرولىق قارۋدى قولدانۋ قاۋپىن بايىپپەن قابىلدايتىنىن ايتتى. «پرەزيدەنت پۋتين مەن رەسەي باسشىلىعىنىڭ شابۋىل كەزىندە كەزدەسكەن اسكەري ساتسىزدىكتەردى ەسكەرە وتىرىپ، شاراسىزدىقتان يادرولىق قارۋ قولدانۋى بەك مۇمكىن», - دەدى ول.

بەرنس بۋچا قالاسىنداعى قىرعىن مەن باسقا دا ايماقتارداعى رەسەيلىك اسكەرلەردىڭ ارەكەتىن گەنوتسيد دەپ اتاپ، الدا قاندى شايقاستار كۇتىپ تۇرعانىن مالىمدەدى.

بەرنس - 2005-2008 جىلدارى رەسەيدەگى اقش ەلشىسى قىزمەتىن اتقارعان، ول ورىس، فرانتسۋز جانە اراب تىلدەرىن بىلەدى. سوندىقتان دا ول بايدەن اكىمشىلىگىنىڭ باسقا جوعارى لاۋازىمدى مۇشەلەرىنە قاراعاندا رەسەي باسشىلىعىمەن كوبىرەك كەزدەسكەن تۇلعا دەۋگە تولىق نەگىز بار. العاش بولىپ رەسەيدىڭ ۋكرايناعا باسىپ كىرۋ مۇمكىندىگىن جوعارى ەكەنىن ايتقان تۇلعالاردىڭ ءبىرى.

باتىستىق ساراپشىلار پۋتين يادرولىق قارۋ قولدانسا، وندا الەمدە ءۇشىنشى دۇنيەجۇزىلىك سوعىس باستالاتىنىن بولجاۋدا. ونىڭ ۇستىنە يادرولىق قارۋ قولدانۋ رەسەيدىڭ «اسكەري وپەراتسيا» مەن «حالىقتى ازات ەتۋدەمىز» دەگەن جالعان ۇراندارىنا ساي كەلمەيتىن ەدى.

Abai.kz