"قالالىق سوت تا جانبولات ماماي قورعاۋشىلارىنىڭ زاڭدى تالابىن ورىنداماي، جانبولات قاماۋدا قالدى" دەپ جازدى ينگا يمانباي.

ول سوت شەشىمىن ادىلەتسىز دەپ اتادى. سارسەنبى كۇنى قالالىق سوت الدىنا جانبولات مامايدىڭ وننان استام جاقتاسى جينالىپ، بەلسەندىنى بوساتۋدى تالاپ ەتتى.

33 جاستاعى جانبولات ماماي 14 ناۋرىزدا الماتىدا وزىنە قوزعالعان ەكى قىلمىستىق ىسكە قاتىستى قاماۋعا الىنعان بولاتىن. ونىڭ جاقتاستارى تاعىلعان ايىپتىڭ ساياسي استارى بارىن ايتادى.

بەلسەندى 25 اقپاننان بەرى قاماۋدا وتىر: باستاپقىدا ول قاڭتار قۇرباندارىن ەسكە الۋ جيىنىنا قاتىسقانى ءۇشىن “بەيبىت جيىن وتكىزۋ ءتارتىبىن بۇزدى” دەگەن ايىپپەن 15 كۇنگە قامالدى، كەيىن “بيلىك وكىلىن قورلاۋ” جانە “جالعان اقپارات تاراتۋ” باپتارى بويىنشا كۇدىكتى رەتىندە تەرگەۋ يزولياتورىنا قامالدى.

العاشقى ءىس بىلتىر قىركۇيەكتە بولعان رۇقسات ەتىلمەگەن ميتينگىمەن بايلانىستى. ول كەزدە ماماي "ادامداردى ۇرىپ-سوققان پوليتسەيلەرگە" قاراتا "قارابەت" ءسوزىن قولدانعان، كەيىن پوليتسەيلەر بەلسەندىنىڭ ۇستىنەن شاعىمدانىپ، ءىس قوزعالعان. ەكىنشى ءىستىڭ قوزعالۋىنا قارجى نارىعىن رەتتەۋ اگەنتتىگىنىڭ ماماي ۇستىنەن شاعىمدانۋى سەبەپ بولعان. اگەنتتىك بەلسەندىنى قارىزى بار ادامداردىڭ ماسەلەسى بويىنشا "جالعان اقپارات تاراتتى" دەپ كىنالاسا، بەلسەندى قارىز ماسەلەسىن اتالعان "اگەنتتىك شەشۋى ءتيىس" دەپ ايتقانىم ءۇشىن شاعىمدانىپ وتىر دەيدى.

بۇعان دەيىن Human Rights Watch, Amnesty International حالىقارالىق ۇيىمدارى قازاقستان بيلىگىن جانبولات مامايدى بوساتىپ، تاعىلعان ايىپتاردى الىپ تاستاۋعا شاقىرعان.

ماماي اۆتوريتار ۇكىمەتتى قاتاڭ سىناۋمەن تانىلعان. ول قازاقستاننىڭ دەموكراتيالىق پارتياسىن قۇرىپ، تىركەۋگە تىرىسقان. بىراق بيلىكتىڭ كەدەرگى كەلتىرگەنىن العا تارتقان.

Abai.kz