قر ۇقك بۇرىنعى توراعاسى كارىم ءماسىموۆتى جانە ونىڭ ەكى ورىنباسارىن قاماۋدا ۇستاۋ مەرزىمى تاعى دا ۇزارتىلدى. بۇل تۋرالى ۇقك مالىمدەدى.

«ءماسىموۆ پەن سادىقۇلوۆتى قاماۋدا ۇستاۋ مەرزىمى 2022 جىلدىڭ 6 مامىرىنا دەيىن، ەرعوجين – 2022 جىلدىڭ 8 مامىرىنا دەيىن ۇزارتىلدى»، - دەلىنگەن حابارلامادا.

«مەملەكەتكە وپاسىزدىق جاساۋ» بابى بويىنشا كۇدىككە ىلىنگەن ءماسىموۆتىڭ تەرگەۋ يزولياتورىندا وتىرعانىنا 3 ايعا جۋىق ۋاقىت بولدى. تەرگەۋ بارىسىندا ونىڭ مۇلىكتەرى تاركىلەنگەن بولاتىن. ال، قازىر بۇرىنعى ۇقك توراعاسى مەن ونىڭ ەكى ورىنباسارىنا قاتىستى قىلمىستىق ءىس - قىلمىستىق كودەكستىڭ بەس بابى بويىنشا تەرگەلىپ جاتىر.

سونىمەن قاتار جۋىردا ءماسىموۆتىڭ «دەنساۋلىعى ناشارلادى» دەگەن جاڭالىق تارادى. ونىڭ تەرگەۋ ىسىنە قاتىستى «اسا قۇپيا» دەگەن ءمور باسىلىپ، بۇل جاعداي «سوتقا دەيىنگى تەرگەپ-تەكسەرۋدىڭ باسقا دا دەرەكتەرى قىلمىستىق ءىس جۇرگىزۋ كودەكسىنىڭ 201-بابىنا سايكەس جاريا ەتۋگە جاتپايدى» دەپ ءتۇسىندىرىلدى. وسىلايشا ءدال قازىرگى ۋاقىتتا ءماسىموۆ تۋرالى اقپاراتتاردان قوعام مەن جۋرناليستەر شەتتەتىلىپ قالدى.

Kz.expert ساراپتامالىق پورتالى: «ءماسىموۆتىڭ جاقىن ادامدارى، دوستارى، قول استىندا ىستەگەندەر تاراپىنان بۇرىنعى ۇقك باسشىسى تۋرالى بىردە-ءبىر نارسە جاريالاعانىن كورمەدىك، تەك بۇرىن قر ۇكىمەتىن ەكى رەت باسقارعان ادامدى كوپشىلىك الدىندا قورعايتىن ءبىر عانا ينتەرنەت-رەسۋرستى تاپتىق. بىراق، بۇل كۇماندى سايت قالىڭ جۇرتشىلىقتى قىزىقتىرۋى ەكىتالاي. ءبىزدىڭ ويىمىزشا، بۇل سايتتاعى جالعىز قۇندى اقپارات - ءماسىموۆتى قورعاعان شەتەلدىك ساياساتكەرلەر مەن قايراتكەرلەردىڭ ءتىزىمى»، - دەپ جازادى.

ءماسىموۆ كەزىندە قازاقستاننىڭ ەڭ بەدەلدى ادامىنىڭ ءبىرى بولدى، ەكس-پرەزيدەنت نۇرسۇلتان نازارباەۆتىڭ جاقىن سەرىگى ءارى قولىندا ەل تاعدارىن شەشەتىن بيلىگى بولدى. بىراق، قازىر ونىڭ ارقا سۇيەر جاناشىرى قالعان جوق.

«كارىم ءماسىموۆتىڭ قامقورشىسى سانالاتىن ەكس-پرەزيدەنت وعان نەگە وپاسىزدىق جاسادى دەگەن سۇراق تۋىندايدى. پرەزيدەنت قاسىم-جومارت توقاەۆ ءماسىموۆتى جۇمىستان شىعارىپ قانا قويماي، ونى مەملەكەتتىك ساتقىندىق جاسادى دەپ ايىپتاۋعا دا مۇمكىندىك بەردى (بىراق ءبىز بۇعان سەنبەيمىز، بۇل تۋرالى وسى تاقىرىپتاعى بۇرىنعى جاريالانىمداردا بىرنەشە رەت جازعان بولاتىنبىز)»، - دەيدى ساراپتامالىق پورتال.

Kz.expert ايتۋىنشا، ەكس-پرەزيدەنت نازارباەۆتىڭ تەرگەلىپ جاتقان نەمەرە ءىنىسى قايرات ساتىبالدى «قازاقتەلەكوم» اق-نىڭ ءىرى پاكەتىن مەملەكەتكە تەگىن قايتارىپ بەردى، ياعني كارىم ءماسىموۆتىڭ تاعدىرىنداعى شەشۋشى فاكتور – ونىڭ بايلىعى.

«گونكونگ پەن سينگاپۋردا جاسىرىلعان، قر ۇقك ەكس-توراعاسىنىڭ ادامدارى باسقارعان بىرنەشە ميلليارد اقش دوللارى نۇرسۇلتان نازارباەۆقا، دالىرەك ايتقاندا ول كورسەتكەن ادامدارعا قايتارىلماعان سياقتى. وسى ماسەلەنى شەشۋ ءۇشىن ەلباسى قاسىم-جومارت توقاەۆقا كارىم ءماسىموۆتى تۇتقىنداۋعا رۇقسات بەردى. وعان «قاڭتار وقيعاسى» جاقسى سەبەپ بولىپ كەتتى. مۇمكىن، ءوزى قاماققا باستاماشى بولعان شىعار.

ويتكەنى نازارباەۆتىڭ جاقىن كومەكشىلەرىنىڭ قايسىسى كورىنبەي كەتكەنىن بايقاۋعا بولادى. بۇل ادام قازىردىڭ وزىندە گونكونگتا ورنالاسقان، وندا ول ءىرى اكتيۆتەردى ۇستاۋشى كومپانيانى باسقارىپ وتىرعان بولۋى مۇمكىن نەمەسە جاقىن ارادا بەدەلدى ينۆەرتور رەتىندە سول جاقتان تابىلىپ قالادى. ەگەر وسىلاي بولسا، ءماسىموۆتىڭ بوستاندىققا شىعۋ مۇمكىندىگى كۇرت تومەندەيدى. ءسوزىمىزدىڭ دالەلى رەتىندە نازارباەۆ كلانىنىڭ ىقپالدى مۇشەسى بولعان راحات اليەۆتىڭ قايعىلى تاعدىرىن ەسكە ءتۇسىرۋدى ۇسىنامىز»، - دەپ بولجام جاسالدى ساراپتاما ماقالادا.

Abai.kz