جاڭاوزەندە قالا تازالىعىنا جاۋاپتى "تازالىق-س" مەكەمەسىنىڭ جەتپىسكە جۋىق جۇمىسشىسىنىڭ جالاقىنى ءوسىرىپ، ەڭبەك جاعدايىن جاقسارتۋدى تالاپ ەتىپ تۇرعاندارىنا ەكى اپتا بولدى. نارازىلار مەكەمە گاراجىنىڭ الدىندا ەرەۋىلدەپ جاتىر.

تازالىققا جاۋاپتى قالاداعى جالعىز مەكەمەدە قوقىس تاسيتىن، جينايتىن 66 ادام 30 ناۋرىزدان بەرى جۇمىسقا بارۋدان باس تارتىپ، جالاقىنى ءوسىرۋدى تالاپ ەتىپ تۇر. نارازىلىققا قاتىسۋشىلاردىڭ ءبىرى شەبەر گۇلنار ايبەرگەنوۆانىڭ ايتۋىنشا، جۇمىسشىلار بۇل قادامعا امالسىزدان بارىپ وتىر.

– جالاقىنى ءجۇز پايىزعا كوتەرىپ، وندىرىستىك وبەكتىلەردى ەڭبەك جاعدايىنا ساي جابدىقتاۋدى تالاپ ەتىپ تۇرمىز. قولىمىزعا 70-80 مىڭ تەڭگە تيەدى. سىياقى، الەۋمەتتىك پاكەت دەگەندى بىلمەيمىز. ەڭبەك دەمالىسىنا شىقساق، ونىڭ اقشاسىن دەمالىسقا بارىپ كەلگەن سوڭ الامىز. بالالاردى دەمالىس لاگەرىنە جىبەرۋ ءتارىزدى ەشقانداي قولداۋ جوق. ءبىز دە دۇرىس جالاقى العىمىز كەلەدى. قالاداعى دەنساۋلىققا زياندى قالدىق، قوقىس اتاۋلىنىڭ ءبارىن قولىمىزبەن جينايمىز، زياندىلىق ءۇشىن دە ەشتەڭە تولەنبەيدى،- دەيدى ول.

ونىڭ تالابىن وزگە جۇمىسشىلار دا قولدادى. الەۋمەتتىك جەلىدە تاراعان ۆيدەودا جۇمىسشىلاردىڭ ءبىرى "تەحنيكانى شىعارماي مەكەمە قاقپاسىن جاۋىپ تۇرعانىن" ايتادى. كومپانيا وكىلى ولارعا مۇنىڭ "زاڭسىز" ەكەنىن ەسكەرتەدى.

"تازالىق-س" مەكەمەسىنىڭ ديرەكتورى سەرىك تابىنباەۆ جالاقىنى 10% كوتەرۋدى ۇسىنعانىن، بىراق ونىمەن جۇمىسشىلاردىڭ كەلىسپەگەنىن ايتادى.

– تاتۋلاسۋ كوميسسياسىنا كەلىسپەي تۇر. مەن ولاردىڭ جالاقىسىن ءجۇز پايىز كوتەرە المايمىن، تاريف پرەزيدەنت جاريالاعان موراتوريدەن سوڭ كوتەرىلگەن جوق. ەڭبەك كودەكسىنە ساي كوميسسيادان سوڭ سوتقا جۇگىنەمىن، - دەيدى سەرىك تابىنباەۆ.

"تازالىق-س" مەكەمەسى جۇمىسشىلارى 2021 جىلى شىلدە ايىندا دا جۇمىستى توقتاتىپ، جالاقىنى كوتەرۋدى تالاپ ەتكەن. گۇلنارا ايبەرگەنوۆانىڭ ايتۋىنشا، ول جولى جالاقىلارىن 30 پايىزعا كوتەرىپ، كەيىن جاڭا جىلدان سوڭ جالاقىعا تاعى دا پايىز قوسۋعا ۋادە بەرگەن. بۇل ۋادە ورىندالماعان سوڭ "تازالىق-C" جۇمىسشىلارى بيىلعى اقپاندا دا جۇمىستى توقتاتقان. بىراق جۇمىسشىلار مەكەمە باسشىلىعى اقپانداعى نارازىلىقتان سوڭ 15 كۇن مۇرسات سۇراعانىمەن، ەشتەڭە بىتىرمەگەن سوڭ ناۋرىز سوڭىندا قايتا جۇمىستى توقتاۋعا ءماجبۇر بولعاندارىن ايتادى. "تازالىق-س" مەكەمەسىندە 219 ادام جۇمىس ىستەيدى.

Abai.kz