بيزنەس پەن قايىرىمدىلىق ءبىر-بىرىنەن ءبولىپ قاراۋعا بولمايتىن ۇعىم. الماتى وبلىسىندا 1 مىڭ وتباسىنا ازىق-تۇلىك جانە قارجىلاي كومەك بەرىلدى. پانفيلوۆ، ەڭبەكشىقازاق جانە ۇيعىر اۋدانىندا مۇقتاج وتباسىلارعا بەرىلگەن جاردەم رامازان ايىنىڭ قۇرمەتىنە ۇيىمداستىرىلدى. زەكەت جارىمجان بالا تاربيەلەيتىن جانە كومەككە اسا مۇقتاج جاندارعا ۇلەستىرىلدى. گۋمانيتارلىق كومەككە جەرگىلىكتى كاسىپكەرلەر 15 ملن تەڭگە بولگەن. ايماقتاعى ءىرى كاسىپورىننىڭ يەسى، الماتى وبلىسى ءماسليحاتىنىڭ دەپۋتاتى زاكىرجان كۋزيەۆ پەن  بيزنەسمەن سەرىك اقسۋباەۆ بۇل ءۇردىستى داستۇرگە اينالدىرعان. وسى ەكى كاسىپ يەسى بىلتىر الماتى وبلىسى پەنجىم اۋىلىندا جاپپاي تارتىپسىزدىك كەزىندە بۇلىنگەن حالىقتىڭ دۇنيە -مۇلكىن ءوز ەسەبىنەن قالپىنا كەلتىرگەن بولاتىن، دەيدى جەرگىلىكتى اكىمدىك وكىلدەرى.

وبلىستا بۇگىنگە دەيىن كاسىپكەرلەردىڭ كومەگىمەن  «مىڭ العىس»، «ءبىز بىرگەمىز»، «جاقسىلىق جاسا»، «پوداري جيزن»، «جاقسىلىق جاساۋعا كەشىكپە»، «جۇرەكتەن شىققان العىس»، «ارداگەرلەرگە قۇرمەت»، «بالالارعا مەرەكە سىيلا» اتتى ونداعان قايىرىمدىلىق شارا وتكەن. وعان جوعارىداعى كاسىپ يەلەرى 100 ملن تەڭگەدەن استام قاراجات بولگەن. جەرگىلىكتى اكىمدىكتە تىزىمدە تۇرعان وتباسىلاردان بولەك رامازان ايىنىڭ قۇرمەتىنە جاركەنت كراحمال-سىرنە زاۋىتى مەن قاپ تىگەتىن زاۋىتتىڭ جۇزدەگەن جۇمىسشىسى ازىق-تۇلىك تۇرىندەگى كومەك الدى.

«مەن وسىندا 15 جىلدان بەرى جۇمىس ىستەيمىن. بۇكىل مۇسىلمان قاۋىمعا اسسالاۋماعالەيكۇم، ورازا قابىل بولسىن دەيمىن. وسى ايدا سانسىز شۇكىرشىلىك ەتەمىن. بىزگە مۇنداي كومەك بۇگىن عانا ەمەس جىل بويى بەرىلەدى. رامازان، قۇربان ايت، ءتۇرلى مەرەكەلەردە جالاقىدان بولەك قارجىلاي جانە ازىق-تۇلىك تۇرىندە قايتارىمسىز كومەك ۇيىمداستىرىلادى. بيىل دا وسى زاۋىتتاعى بىرنەشە جۇزدەگەن جۇمىسشىعا ەشكىمدى قالدىرماي ازىق- تۇلىك، سونىڭ ىشىندە  ەڭ قاجەتتى ۇن، كۇرىش جانە سۇيىق ماي تاراتىلىپ جاتىر. بۇل كومەك قانا ەمەس شىنايى كوڭىل دەپ تۇسىنەمىن. ۋاقىتىندا جالاقىنى الامىز. سوندىقتان جۇمىسشىلار اتىنان راقمەت ايتقىمىز كەلەدى»،- دەيدى جاركەنت كراحمال-سىرنە زاۋىتىنى جۇمىسشىسى نۇرمۇحامەد جاقىباەۆ.

«بۇكىل الەمدە مۇسىلمان حالقى قازىر ورازا تۇتىپ جاتىر. ءار جىلدا رامازان ايىندا اۋقاتتى ادامدار مۇقتاج جاندارعا كومەك قولىن سوزىپ، ساۋاپ الىپ جاتادى. ءتىپتى ءبىر كۇن بولسا دا، قارىندارى تويىپ، دەندەرى ساۋ بولسىن دەپ ويلايدى. اۋدانىمىزداعى كاسىپكەر زاكىرجان كۋزيەۆ حالىققا قولىنان كەلگەنشە كومەگىن اياپ جۇرگەن جوق. ءبىز ونىڭ دەنى ساۋ بولسىن، تالابىنا جەتسىن دەپ باتا بەرەمىز.  ودان تىس پانفيلوۆ اۋدانى بويىنشا قانشاما حالىق ونىڭ كاسىپورنىندا جۇمىس ىستەپ جاتىر. بۇل دا حالىققا دەگەن كومەك»،- دەيدى پانفيلوۆ اۋدانى كوكتال اۋىلىنىڭ تۇرعىنى ءۇمىت شاياحمەتوۆا.  

«رامازان ايىندا قايىرىمدىلىق جاساۋ ۇلكەن ساۋاپتى امالداردان. وسى قاسيەتتى ايدا جاسالعان قايىرىمدىلىق 70-تەن 700 ەسەگە دەيىن ەسەلەنەدى. وسى ايدا اۋدانىمىزداعى ۇلكەن كاسىپكەرلەر زاكىرجان  كۋزيەۆ پەن سەرىك اقسۋباەۆ اعامىز جانە وزگە دە كاسىپكەرلەر جىل سايىن ءوزىنىڭ زەكەتتەرىن وسى ورتالىق مەشىتكە كەلىپ تاراتىپ وتىرادى. مۇقتاج كىسىلەر ازىق-تۇلىك وزگە دە زاتتار العاندا جۇزدەرىنە كۇلكى ءۇيىرىلىپ، رامازاندا قايىرىمدىلىق بولا ما دەپ بىزدەن سۇراپ وتىرادى. اللا تاعالا وسىنداي ساۋاپتى ىستەر مەن زەكتتەردى ساۋاپتان جازسىن. قايىرىمدىلىق العان وتباسىلار بالا-شاعاسىمەن بىرگە قۋانىپ، العىستارىن ايتىپ جاتقانىنىڭ كۋاسى بولدىق»،- دەيدى الماتى وبلىسى پانفيلوۆ اۋدانى ورتالىق مەشىتىنىڭ باس يمامى سەرىك ءشارىپۇلى.

Abai.kz