ماريۋپول قالاسىندا ورىس كۇشتەرىنىڭ قورشاۋىندا قالعان ۋكراين اسكەرلەرى باعىنۋدان باس تارتتى. بۇل تۋرالى ۋكراينا پرەمەر-ءمينيسترى دەنيس شمىگال مالىمدەدى.

ونىڭ سوزىنشە، "قالا ءالى قۇلاعان جوق" جانە "ۋكراين ارمياسى ماريۋپولدىڭ بىرقاتار بولىگىن باقىلاۋىندا ۇستاپ تۇر".

وسىعان دەيىن رەسەيدىڭ قورعانىس مينيسترلىگى ۋكراين اسكەرى قالاداعى "ازوۆستال" زاۋىتىندا جاسىرىنىپ جاتىر دەگەن. ريا "نوۆوستي" اگەنتتىگى ورىس كۇشتەرى شابۋىل جاساپ، ۋكراينا تەڭىز اسكەرلەرى 36-بريگاداسىنىڭ كومانديرى ۆلاديمير بارانيۋكتىڭ كوزىن جويعانىن حابارلاعان. بۇل مالىمەتتى ازىرگە كيەۆ راستاعان جوق.

رەسەيدىڭ جانە "دونەتسك حالىقتىق رەسپۋبليكاسى" دەپ اتالعان جىكشىل ايماقتاردىڭ كۇشتەرى ماريۋپول قالاسىن ناۋرىزدىڭ باسىندا قورشاپ العان. سودان بەرى ءتۇرلى مالىمەتتەر بويىنشا 1,5 مىڭنان 3 مىڭعا دەيىنگى "ازوۆ" باتالونى مەن تەڭىز اسكەرلەرىنىڭ 36-بريگاداسىنىڭ جاۋىنگەرلەرى قالا ءۇشىن شايقاسىپ جاتىر.

ۋكراينا بيلىگىنىڭ مالىمەتىنە سايكەس، ورىس ارمياسىنىڭ اسكەري شابۋىلىنان قالاداعى عيماراتتاردىڭ 90% استامى تالقاندالعان. ازىرگە قازا بولعاندار جايلى تولىق مالىمەت ايتىلماي جاتىر. بىراق قۇرباندار سانى مىڭداعان بولۋى مۇمكىن.

Abai.kz