ۆاشينگتوننىڭ كيەۆكە قاۋىپسىزدىگىن نىعايتۋى ءۇشىن بولگەن 800 ملن دوللارلىق كومەگى اياسىندا اقش جىبەرگەن قارۋ-جاراق، وق-دارىلەر ۋكرايناعا كەلە باستادى. بۇل جونىندە امەريكا ۇكىمەتىندەگى دەرەككوزگە سۇيەنگەن CNN تەلەارناسى حابارلادى.

تەلەارنانىڭ مالىمەتىنشە، اقش پرەزيدەنتى دجو بايدەن ۋكرايناعا قوسىمشا قارۋ-جاراق پەن وق-ءدارى جونەلتۋدى وسى اپتا باسىندا ماقۇلداعان.

ۆاشينگتون كيەۆكە قۋاتتى قارۋ تۇرلەرىن بەرۋگە العاش رەت كەلىسىپ وتىر. بىرنەشە اپتا بۇرىن بايدەن اكىمشىلىگىندەگى كەيبىر شەنەۋنىكتەر مي-17 تىكۇشاعىنىڭ 11 داناسى، 18 155-مم گاۋبيتسا، 300 Switchblade درونى ءتارىزدى قۋاتتى قارۋ تۇرلەرىن كيەۆكە بەرۋ جاعدايدى ۋشىقتىرىپ جىبەرۋى مۇمكىن دەگەن قاۋىپ ايتقان.

جۇما كۇنى اقش قورعانىس مينيسترلىگىنىڭ جوعارى لاۋازىمدى وكىلى قارۋ-جاراق پەن جابدىقتار تيەلگەن العاشقى رەيس ايماققا الداعى كۇندەرى جەتكىزىلەدى دەپ مالىمدەگەن.

ۋكراينا پرەزيدەنتى ۆلاديمير زەلەنسكي سەنبى كۇنى ۋكراينا اقپارات قۇرالدارىنا بەرگەن سۇحباتىندا، اقش، ۇلىبريتانيا، پولشا جانە بىرقاتار مەملەكەتتەر "قازىرگى كەزدە ۋكراينالىقتارعا جاقسى دەم بەرىپ جاتىر" دەدى.

Abai.kz