حۇكىمەت باسىندا وتىرۋشى ازاماتتاردىڭ نازارىنا

ەلدەن كەلگەن ادامداردىڭ ايتۋلارىنا قاراعاندا اقمەشىت[1]تىڭ سولتۇستىك جاعىندا اتپەنەن جۇرگەن ادامعا ءۇش كۇنشىلىك جول «ارىس» دەگەن جەردە كەيكى دەگەن بىرەۋ شىققان. بۇل ءوزى تورعاي ۇيەزىنىڭ قازاعى بولىپ، تورعايدان ايىپتى بولىپ قاشىپ شىقسا كەرەك. سول ايتىلعان «ارىس» دەگەن جەردە قىستاپ وتىرعان كوشپەلى ەلدىڭ ىشىنە كەلىپ جاتىر دەيدى.

بۇل كەيكى جانىنا ەرگەن ودان قاشقان، بۇدان قاشقان 30-40 شامالى ۇرىلار بولسا كەرەك. سونداعى كەيكنىڭ ىستەپ جۇرگەن ىستەرى مىناۋ:

سول ارىستا قىستاپ وتىرعان ەلدەردىڭ مالىندا دا، جانىندا دا ەرىك جوق. جاقسى زات بولسا سونىكى، جاقسى كيىم بولسا سونىكى. ەلدىڭ كوشەمىن دەگەندەرى بولسا كوشپەيدى دەيدى.

قىسقاسى ءبارىن ءبىر شىبىقپەن ايداپ جۇرسە كەرەك. ماسەلەن:

كەيكى قاسىنداعى ادامدارىمەنەن ەلدى ارالاپ ءجۇرىپ تۇستە ەكى قوي، كەشكە ەكى قوي سويدىرادى-مىس. اتتارىنىڭ جەم، شوپتەرى ءبارى دە ەلدىڭ موينىندا. وسى ۋاقىتتا ەلدىڭ كەيكىنىڭ زورلىعىن ايتىپ ەڭىرەگەندە ەتەگى تولادى.

ەندى حۇكىمەت باسىنداعى ازاماتتاردىڭ بۇل بەيشارا ەلدەردى وسىنداي بۇزىقتاردىڭ قارماعىنان قۇتقارۋلارى ءجون-اۋ دەيمىن!

كوپەي.

اقمەشىت.

«اق جول» گازەتى. №148. سەنبى، 4 مارت، 1922 جىل. تاشكەن شاھارى.

اباي مىرزانىڭ جازباسى

Abai.kz