بۇگىنگى ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە بالانىڭ قۇقىقتارىن قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى قابىلدانىپ، پرەزيدەنتكە قول قويۋعا جىبەرىلدى.

«سەناتتىڭ تۇزەتۋلەرى بالاعا زيان كەلتىرەتىن، تىيىم سالىنعان نەمەسە تاراتىلۋى شەكتەلگەن اقپاراتتى ورنالاستىرۋعا جول بەرگەن ينتەرنەت-رەسۋرستارمەن مەملەكەتتىك ورگانداردىڭ ءوزارا ءىس-قيمىل جاساۋ تەتىگىن وزگەرتۋگە باعىتتالعان. سەنات دەپۋتاتتارى بۇقارالىق اقپارات قۇرالدارى سالاسىنداعى ۋاكىلەتتى ورگانعا بالاعا قاتىستى كيبەربۋللينگ فاكتىلەرى بويىنشا ساراپتاما جۇرگىزۋ ءتارتىبىن ايقىنداۋ جونىندە قۇزىرەت بەرۋدى، سونىمەن قاتار ينتەرنەت-رەسۋرستارعا قول جەتكىزۋدى توقتاتا تۇرۋعا نەگىز رەتىندە كيبەربۋللينگ فاكتىلەرىن زاڭنامالىق تۇردە ايقىنداۋدى ۇسىندى»، - دەدى كوميتەت ءتورايىمى ءجاميلا نۇرمانبەتوۆا.

ونىڭ ايتۋىنشا، سەنات ۇسىنعان وزگەرىستەر مەن تولىقتىرۋلار زاڭ جوباسىنىڭ مازمۇنىن وزگەرتپەيدى، كوميتەت وسى تۇزەتۋلەردى ماقۇلداۋدى ۇسىنعان. زاڭ جوباسىن 101 دەپۋتاتتىڭ 100-ءى جاقتاپ، ءبىرى قالىس قالدى.

بالالاردى ينتەرنەتتەگى كيبەربۋللينگتەن قورعاۋدى العا تارقان زاڭ جوباسى وسى وزگەرىستەردى ۇسىنعان دەپۋتاتتار ايدوس سارىم مەن دينارا زاكيەۆانىڭ اتىمەن الەۋمەتتىك جەلىدە «سارىم مەن زاكيەۆانىڭ تۇزەتۋى» دەپ اتالىپ كەتتى. جاڭا تۇزەتۋلەر ەل اراسىندا قىزۋ تالقىلاندى. قوعام بەلسەندىلەرى، جۋرناليستەر زاڭ نورماسى «ءسوز بوستاندىعىن شەكتەيدى»، دەپ سانايتىنىن ايتىپ، وعان قارسى پەتيتسيا جاريالاعان بولاتىن.

«زاڭ جوباسى ەلدە الەۋمەتتىك جەلىلەر مەن مەسسەندجەرلەردى قولدانۋعا شەكتەۋ ەنگىزۋگە مۇمكىندىك بەرەدى. بۇل تۇزەتۋلەر قابىلدانعان جاعدايدا (زاڭ جوباسىنىڭ 14-16 بەتى) Facebook, Instagram, Youtube, Telegram, Whatsapp جانە باسقا دا جەلىلەردىڭ قازاقستان ينتەرنەت كەڭىستىگىندە جۇمىس ىستەۋىنە قاۋىپ تونەدى... «قر زاڭدارىنىڭ تالابىن بۇزاتىن اقپارات» دەگەن ۇعىمعا كەز كەلگەن نارسەنى، ونىڭ ىشىندە – ازاماتتىق قوعام تاراپىنان بيلىكتى ورىندى سىناۋ نە كوررۋپتسيا تۋرالى زەرتتەۋلەردى جاتقىزۋعا بولادى. ەگەر بۇل تۇزەتۋلەر قابىلدانسا، ونىڭ قىزىعىن قازاقستاندى 50 جىلعا كەرى كەتىرگىسى كەلەتىن، ەلدە كەڭەس وداعى كەزىندەگىدەي تسەنزۋرانى كۇشەيتىپ، ادام قۇقىن تاپتاۋعا نيەتتى شەنەۋنىكتەر كورەتىنىنە سەنىمدىمىز»، - دەلىنگەن پەتيتسيادا.

سەبەبى، دەپۋتاتتار ايدوس سارىم مەن دينارا زاكيەۆا «الەۋمەتتىك جەلىلەر مەن مەسسەندجەرلەردى باقىلاۋ ءۇشىن قازاقستان اۋماعىندا وكىلدىك اشىپ، ونىڭ باسشىلارىن قازاقستان ازاماتتارىنان تاعايىنداۋ كەرەك» دەگەن ەدى. دەپۋتاتتار بالالارعا كيبەربۋللينگ جاسالعان جاعدايدا، زاڭعا قارسى ارەكەت قىلعان ادامدى تاۋىپ الىپ، ودان الەۋمەتتىك جەلىگە جاريالاعان ماتەريالىن العىزىپ تاستاۋعا بولاتىنىن ايتتى.

دەگەنمەن سەنات دەپۋتاتتارى ءبىرىنشى تىڭدالىمدا زاڭ جوباسىنا تولىقتىرۋلار ەنگىزۋدى ۇسىنعان ەدى.

بۇگىنگى پارلامەنت وتىرىسىندا قابىلدانعان زاڭ جوباسىنداعى وزگەرىس مىناداي: ۋاكىلەتتى ورگان ءوز قالاۋى بويىنشا ينتەرنەت-رەسۋرستارعا، الەۋمەتتىك جەلىلەر مەن مەسسەندجەرلەرگە شەكتەۋ قويىپ نە جۇمىسىن توقتاتا المايدى. سەنات بۇل قۇزىرەتتى الىپ تاستادى. ونىڭ ورنىنا كيبەربۋللينگ فاكتىلەرى تۋرالى ارىز-شاعىمداردى قارايتىن ساراپشىلار كوميسسياسى قۇرىلادى. سونىمەن قاتار سەنات سپيكەرى ماۋلەن اشىمباەۆ «كوميسسيا تەك بالاعا قاتىستى كيبەربۋللينگ دەپ تانىعان اقپاراتتاردى عانا جوياتىنىن» باسا ايتتى.

Abai.kz