نۇرلان ماسىموۆكە ىزدەۋ جاريالاندى. ول اسا ءىرى كولەمدە پارا الدى دەگەن كۇدىككە ىلىنگەن.

پاۆلودار وبلىسىنىڭ سىبايلاس جەمقورلىققا قارسى قىزمەتى نۇرلان ماسىموۆكە قاتىستى سوتقا دەيىنگى تەرگەۋ باستالعانىن مالىمدەدى.

اسا ءىرى مولشەردە پارا الۋ فاكتىسى بويىنشا ونىڭ ءىس-ارەكەتى سىرتتاي ناقتىلانىپ، تەرگەۋ سوتى وعان قاتىستى "كۇزەتتە ۇستاۋ" تۇرىندەگى بۇلتارتپاۋ شاراسىن سانكتسيالادى.

"قازىرگى ۋاقىتتا ن.م. ماسىموۆكە ىزدەۋ جاريالاندى، ونىڭ ورنالاسقان جەرىن انىقتاۋعا قاجەتتى جەدەل-ىزدەستىرۋ ءىس – شارالارى جانە ءىستىڭ بارلىق ءمان-جايلارىن انىقتاۋعا باعىتتالعان باسقا دا تەرگەۋ ارەكەتتەرى جۇرگىزىلۋدە", - دەپ حابارلادى سىبايلاس جەمقورلىققا قارسى قىزمەت.

ايتا كەتەيىك، نۇرلان ءماسىموۆ – كارىم ءماسىموۆتىڭ نەمەرە ءىنىسى. ك.ءماسىموۆ قر ۇلتتىق قاۋىپسىزدىك كوميتەتىن باسقارىپ تۇرعان كەزدە ن.ءماسىموۆ الماتى وبلىستىق پوليتسيا دەپارتامەنتىندە، ىىم-دە، جاۋاپتى قىزمەتتەر اقتاردى. سوڭعى لاۋازىمى – پاۆلودار وبلىسى پوليتسيا دەپارتامەنتىنىڭ باستىعى. اعاسى ك.ءماسىموۆ 6 قاڭتاردا تۇتقىندالدى، ال ن.ءماسىموۆ 17 قاڭتاردا قىزمەتىنەن كەتكەن ەدى.

Abai.kz