الماتى وبلىسىنىڭ اكىمى قانات بوزىمباەۆ BaitassovLive يۋتۋب ارناسىنا بەرگەن سۇقباتىندا قاڭتار وقيعاسى جايلى پىكىر ءبىلدىرىپ، «التىن وردا» بازارىنداعى وزگەرىستەر تۋرالى، ءوزىن بۇرىنعى جانە قازىرگى پرەزيدەنتتەرمەن بايلانىسى بار –جوعى تۋرالى ايتىپتى.

بوزىمباەۆ قاڭتار وقيعاسى كەزىندەگى تالدىقورعانداعى جاعداي تۋرالى ءسوز قوزعادى. «شىنىن ايتقاندا، ەگەر بىرەۋ ادام ءولتىرۋ، ۇرلاۋ سياقتى اۋىر قىلمىس جاساماسا، تەك زات ۇرلاعان بولسا وندايعا پروتسەدۋرالىق كەلىسىمدەر جاسالادى. بۇل جازانى جەڭىلدەتەدى. كوبىنە جاس جىگىتتەر قاتىستى. كەيبىرى قاتەلەستى، كەيبىرى ەلدەگى جاعدايدى وسىلاي وزگەرتە الامىز دەپ ويلادى. كوپشىلىكتىڭ دە اسەرى بولدى. ىشىمدىك پەن ەسىرتكىنىڭ دە اسەرى بولدى. سوندىقتان ءاربىر ناقتى جاعدايدى قۇقىق قورعاۋ ورگاندارى سۇرىپتادى»،- دەدى ول. اكىم الماتى وبلىسىندا 566 سوتقا دەيىنگى تەرگەۋ جۇرگىزىلگەنىن، ونىڭ ىشىندە 50-گە جۋىق ءىس باسقا اۋماقتىق ورگاندارعا بەرىلگەنىن، 1500-دەن استام ادام ۇستالىپ، 160-قاماۋعا الىنعانىن اتاپ ءوتتى.

بوزىمباەۆ قۇقىق قورعاۋ قىزمەتكەرلەرىنىڭ ۇستالعانداردى ازاپتاۋى – ارسىزدىق ەكەنىن، ولاردىڭ ارەكەتى ءۇشىن ۇيالاتىنىن ايتتى.

«مۇنداي ءىس - ارەكەتتەرمەن ولار جەرگىلىكتى بيلىك پەن پرەزيدەنتتى جەرگە قاراتادى. ءبىز جابىرلەنۋشىلەردىڭ تۋىستارىمەن ۇنەمى كەزدەسىپ وتىرامىز. ولار، ءبىر جاعىنان كۇدىكتى بولسا، ەكىنشى جاعىنان- جابىرلەنۋشى. ولارمەن قۇقىق قورعاۋشىلار مەن تۋىستارى عانا بايلانىسا الادى. قوعامىمىزدا ازاپتاۋعا مۇلدە جول بەرىلمەۋى كەرەك»،- دەيدى ول.

پرەزيدەنتتىڭ جولداۋىندا ايتىلعانداي الداعى ۋاقىتتا الماتى وبلىسى ەكىگە بولىنەدى. «ءبىرى – جەتىسۋ دەپ اتالادى، بۇرىنعى تالدىقورعان وبلىسىنىڭ شەكاراسىندا انىقتالادى. بۇرىن الماتى وبلىسىن تەك اكىم مەن اكىمدىك قانا ەمەس، بەيرەسمي باسشىلار دا باسقاردى - باقىتىمىزعا وراي، قازىر ولار باسقارا المايدى»، - دەپ ايتىپ ءوتتى اكىم.

ونىڭ ايتۋىنشا، جەتىسۋ قۇرامىنا سەگىز اۋدان جانە ەكى قالا: تالدىقورعان مەن تەكەلى كىرەدى. جالپى وبلىستا 352 ەلدى مەكەن بولادى. حالقى - 660 مىڭ ادام. الماتى وبلىسىنا 9 اۋدان جانە ءبىر قالا — قاپشاعاي كىرەدى. 1 ملن 400 مىڭ تۇرعىن تۇراتىن بولادى.

بوزىمباەۆ ازىرگە قاي وبلىستى باسقاراتىنىن بىلمەيدى ەكەن. ول وبلىستاعى ينۆەستيتسيالىق الەۋەت، لوگيستيكا (دوستىق جانە قورعاس) جانە قايتا وڭدەۋ ونەركاسىبىنىڭ پروبلەمالارى مەن پەرسپەكتيۆالارى، سونداي-اق G4 City مەگاجوباسى تۋرالى ايتىپ بەردى.

«ەشقانداي دا ءتورت قالا بولمايدى، ءبىر عانا قالا «Gate District» بولادى، ول پەرۆومايكادان باستالىپ قاپشاعاي قالاسىنا دەيىن بارادى، - دەپ حابارلادى بوزىمباەۆ.

«وعان 37 ميلليارد تەڭگە ينۆەستيتسيا سالىندى، قازاندىق بار، سۋ جۇيەسى دە سالىنۋدا. سينگاپۋرلىق Surbana Jurong Group وسىعان ينۆەستيتسيا قۇيعىسى كەلەدى. بۇل ءتورت اۋدانعا بولىنگەن ۇلكەن قالا بولماقشى. ەنى 40 شاقىرىم، ۇزىندىعى 70 شاقىرىم. ءبىر بولىگى اكىمشىلىك-تۇرعىن ءۇي، ەكىنشى بولىگى — الەمدىك ۋنيۆەرسيتەتتەرمەن عىلىمي-ءبىلىم بەرۋ جانە مەديتسينالىق حاب، ءۇشىنشى بولىگى-ونەركاسىپتىك، ۇلكەن داتا-ورتالىقتار قۇرىلاتىن بولادى. قاپشاعايعا جاقىن Green District-ويىن-ساۋىق، تۋريستىك ءبولىمى بولادى. ديسنەيلەند سياقتى ساياباق سالىنادى. ولار كازينونىنىڭ جۇمىسىن توقتاتادى دەپ بولجانىپ وتىر. شەتەلدىك ينۆەستورلار تۇرۋعا ىقتيارحات الا الادى. بۇكىل قالا اعىلشىن قۇقىعىمەن رەتتەلەتىن بولادى، احقو يۋريسديكتسيا بولادى دەپ بولجانۋدا. بولاشاقتا اۋەجاي دا سالىنادى دەگەن جوسپار بار. وبلىسقا بارلىعى $1,8 ملرد كولەمىندە ينۆەستيتسيا قاجەت،- دەدى بوزىمباەۆ.

وبلىس اكىمى بولات نازارباەۆتىڭ وتباسىنا تيەسىلى دەلىنەتىن "التىن وردا" بازارى تۋرالى دا ايتىپ ءوتتى.

"التىن وردا" نارىعىندا بۇزىلماعان بىردە-ءبىر زاڭ قالعان جوق", - دەدى ول. “قۇرىلىستاردىڭ جارتىسىنان استامى زاڭسىز سالىنعان، ەشقانداي سانيتارلىق نورمالار ساقتالمايدى. بارلىق قالدىقتار تىكەلەي وزەنگە قۇيىلادى. بىراق ەڭ ماڭىزدى ماسەلە — مونوپولياسىزداندىرۋ. بۇل بازار ازىق-تۇلىك نارىعىندا مونوپوليست. سونىمەن قاتار، بازاردى مۇمكىندىگىنشە جولدان ارىگە جىلجىتۋ كەرەك.

بوزىمباەۆ ءوزىنىڭ بۇرىنعى جانە قازىرگى مەملەكەت باسشىلارىنا قاتىسى جوعىن ايتتى.

“بۇل جالعان اقپارات. مەنىڭ قايرات ساتىبالدى تەگىنە  ەشقانداي قاتىسىم جوق. مەنىڭ قايىن اتامنىڭ اتى – ساتىبالدى. بيىل 75 جاسقا تولادى. ەلىمىزدىڭ ەڭبەك سىڭىرگەن قۇرىلىسشىسى. ونىڭ دا ءبىرىنشى پرەزيدەنتكە ەش قاتىسى جوق. كەيبىرلەر مەنى پرەزيدەنت توقاەۆتىڭ بولەسى دەيتىن كورىنەدى. بۇل دا جالعان ءسوز. مەنىڭ پرەزيدەنتپەن ەشقانداي تۋىستىق بايلانىسىم جوق. تەك رۋلاسپىز. رۋلاس دەگەن كوپ قوي، 600-700 ادام بار شىعار. ەگەر سونى ايتسا، وندا تۋىس شىعارمىز» دەپ كۇلدى اكىم.

Abai.kz