الماتىدا 1 ملرد تەڭگە جۇمسالعان كوپقاباتتى تۇرعىن ءۇيدىڭ قۇرىلىسى بۇزىلماق. قۇرىلىس جاسايتىن قۇجاتتارىم دۇرىس ءارى بارلىق تالاپقا ساي ءۇي سالدىم دەگەن كومپانيا باسشىسى رەداكتسيامىزعا حابارلاسىپ، بۇل ىسكە اراشا بولۋىمىزدى سۇرادى.

2021 جىلى «ارت تەحنوسس» قۇرىلىس كومپانياسى تۇرعىن ءۇي كەشەنىن سالۋ ءۇشىن ناۋرىزباي اۋدانىنداعى «شۇعىلا» شاعىن اۋدانىنان 1 گا جەر تەلىمىن ساتىپ العان.

اكىمدىكتىڭ رۇقساتىن الىپ، تەحنيكالىق تالاپتاردى بەلگىلەيتىن قاجەتتى قۇجاتتاردى جيناعان قۇرىلىس سالۋشى جوبانى جۇزەگە اسىرۋعا كىرىسەدى. ەكى اي ىشىندە جەراستى اۆتوتۇراقتارىن سالىپ، گاز بەن ەلەكتر قۋاتىن تارتقان. بۇعان 1 ميلليارد تەڭگەگە جۋىق قارجى جۇمسالعان. بىراق ارحيتەكتۋرا ءبولىمى ساۋلەت-جوسپارلاۋ تاپسىرماسىن بەرمەگەن جانە بۇل قۇرىلىس زاڭسىز دەگەن شەشىم شىعارعان.

وسىدان كەيىن قۇرىلىس كومپانياسىنىڭ يەسى مۇحتار ابيتوۆ بۇل جوباعا سالعان اقشاسىن قايتارا الماي سوتقا جۇگىنگەن. الايدا، سوت قۇرىلىس زاڭسىز دەگەن شەشىم شىعارعان. ال ينۆەستور بارلىق تالاپتاردىڭ زاڭدى تۇردە ورىندالعانىنا سەنىمدى.

جوبا بويىنشا اۋماعى 23 مىڭ شارشى مەتر بولاتىن 12 قاباتتى ەكى ءۇي سالىنۋ كەرەك بولعان. قازىر ەكى قاباتتان تۇراتىن جەراستى اۆتوتۇراعى مەن ءۇيدىڭ ەكى قاباتى سالىنىپ بىتكەن. قۇرىلىس الاڭىنا گاز، ەلەكتر قۋاتى تارتىلعان.

«2021 جىلدىڭ ناۋرىزىندا ءۇيدىڭ قۇرىلىسى باستالدى، جوسپار بويىنشا جەلتوقساندا سالىنىپ ءبىتۋى كەرەك بولعان. ايىنا ەكى قاباتتان كوتەرۋ كوزدەلدى، ياعني 12 قاباتتى ءۇيدى التى ايدا سالىپ ءبىتىرۋىمىز قاجەت بولعان. قۇرىلىس ەكى اي ءجۇردى، كەيىن توقتاتىپ تاستادى. الدىمەن الماتى قالاسى قالا قۇرىلىسىن باقىلاۋ باسقارماسىنىڭ ادامدارى كەلىپ قۇرىلىس زاڭسىز دەدى. قۇجاتتارىمنىڭ بارلىعى ورنىندا، تەك ساۋلەت-جوسپارلاۋ تاپسىرماسىن (سجت) بەرمەي جاتقانىن ايتتىم. سول سەبەپتى ولار ماعان ايىپپۇل سالدى. ەكى رەت 291 مىڭ تەڭگەدەن تولەدىم. سجت-نى ساۋلەت ءبولىمى بەرۋ كەرەك، سولار بەرمەي وتىر»،-دەيدى قۇرىلىس كومپانياسىنىڭ يەسى م.ابيتوۆ.

ساۋلەت باسقارماسى قۇرىلىستى رۇقساتسىز سالىپ جاتىرسىڭدار دەگەن ءۋاج ايتقان. بىراق كومپانيا ولارعا 9 رەت حات جازىپ، ماردىمدى جاۋاپ الا الماعاندارىن ايتادى.

«ولارعا 9 مارتە حات جازدىم. ۇنەمى «موتيۆيروۆاننىي وتكاز» دەپ جازادى. ولار ءبىرىنشى رەت جاۋاپ بەرگەندە ءۇيدى نە ءۇشىن سالۋعا بولمايتىنىن، قانداي كەمشىلىگىم بارىن ناقتى كورسەتۋ كەرەك ەدى، سوعان قاراپ مەن كەمشىلىگىمدى تۇزەيتىن ەدىم. دەگەنمەن مەن بارلىعىن نورماتيۆكە ساي جۇرگىزىپ جاتىرمىن»،-دەيدى ول.

باستاپقىدا ساۋلەت باسقارماسى قۇرىلىس كومپانياسىن ەكونوميكالىق سوتقا بەرگەن. الايدا سوت ءۇي سۇرىلۋگە جاتپايدى دەگەن شەشىم شىعارادى. كەيىن كوماپنيا يەسى اكىمشىلىك سوتقا يسك بەرگەن. ولار الدىمەن سجت الۋ كەرەك، سودان كەيىن ەسكيزدىك جۇمىستار جۇرگىزىلسىن دەگەن شەشىم شىعارادى.

«2021 قاراشا ايىندا الماتى قالاسىنىڭ جەرگىلىكتى سۋديالارى اپپەلياتسيادا قارادى، ول كەزدە مەنىڭ پايداما شەشىپ بەردى. بىراق ول شەشىمدى ساناۋلى كۇن بۇرىن جوعارى سوت بۇزىپ، قۇرىلىستى زاڭسىز دەپ تانىدى. مەنى بۇل جايت تاڭقالدىرىپ وتىر، ويتكەنى جەرگىلىكتى سوتتار بۇل ءىستى ەكى ايداي زەرتتەپ بارىپ شەشىم شىعارعان. ال، بۇل ءىستىڭ ءمان-جايىن بىلمەيتىن جوعارى سوت ونى 5 مينۋت قاراپ، زاڭسىز دەپ شەشىم شىعارعانىن تۇسىنە المايمىن»،-دەيدى قۇرىلىس كومپانياسىنىڭ باسشىسى.

جوعارى سوت بۇزسىن دەپ شەشىم شىعارعان قۇرىلىسقا 5 مىڭ كۋب بەتون، مىڭ توننا ارماتۋرا كەتكەن ەكەن. مۇحتار ابيتوۆ بۇل وسى جەرگە قىزىققان ادامداردىڭ ىستەپ وتىرعانى ما دەپ كۇدىكتەنەدى.

«قازىر 1990 جىلدارداعىداي رەيدەرلىك تارتىپ الۋ قايتا كەلىپ جاتقان سياقتى. پرەزيدەنت ينۆەستورلارعا جاعداي جاساڭدار، قولداۋ كورسەتىڭدەر دەپ ايتقانىمەن اتقارۋشى ورگاندار كەرىسىنشە جاساپ وتىر، تىپتەن جاساعانىڭدى تارتىپ الىپ قويىپ جاتىر. باسقاشا قالاي ايتامىن؟ گوساكتىدە بۇل جەرگە كوپقاباتتى ءۇي سالۋعا بولاتىنى كورسەتىلگەن. سۋ تارتۋ، كارىز جەلىسىنە قوسىلۋ، گاز تارتۋ بويىنشا تەحنيكالىق شارتتارى دا بار. ەلەكتر جەلىسىن تارتىپ، ترانسفومارتور قويدىم، وعان قوسا وسى ماڭداعى كوشەلەردى جارىقتاندىردىم. قۇرىلىسقا قاتىستى ج-5 دەگەن قۇجاتىم دا بار. قالا اكىمىنىڭ ورىنباسارى مۇحيت ازىرباەۆتىڭ قابىلداۋىنا كىرگەنىمدە ول كىسى قۇجاتتارىمنىڭ بارلىعىن كورىپ، «اعا، سىزدە ج-5 قۇجاتى بار ما؟» دەپ سۇرادى. بار دەپ ەدىم، «ج-5» بولسا سىزدە ەشقانداي پروبلەما بولماۋ كەرەك» دەدى. مۇنداي تالاپتاردىڭ بارلىعى ورىندالعاندا ارحيتەكتۋرا بىزگە سجت-نى مىندەتتى تۇردە بەرۋ كەرەك. قاسىمداعى ۇيدە تۇراتىن كورشىلەر قۇرىلىستى سالۋعا قارسى ەمەس ەكەندەرىن بىلدىرەتىن حاتتى دا جازىپ بەردى، ولار كەرىسىنشە بۇل جەردە بالاباقشا، ءدارىحانا سالىناتىن بولدى دەپ قۋانىپ وتىر. بۇل جەردە تەك سجت عانا ۇستاپ تۇر، ونى نەلىكتەن بەرمەي جاتقانىن تۇسىنبەدىم»،-دەپ ناليدى م.ابيتوۆ.

«ارت تەحنوسس» قۇرىلىس كومپانياسى بۇعان دەيىن قالادا بىرنەشە قۇرىلىس نىساندارىن تۇرعىزعان. 450 ورىندى بالاباقشا، مەكتەپتەر سالعان، بىراق ول كەزدە مۇنداي ماسەلە بولماعان، دەيدى كومپانيا باسشىسى.

«ناۋرىزباي اۋدانى اكىمدىگىنە ەشقانداي نارازىلىعىم جوق. ولار ءبىزدى ينۆەستور ەسەبىندە تىركەدى. ولاردان ەشقانداي كەدەرگى جوق. 2-3 ملرد تەڭگە قۇيامىن دەگەنىمدە اكىمدىك كەرىسىنشە قۋاندى. بۇل ءۇيدى تۇرعىزۋعا ءوز اقشامدى سالىپ وتىرمىن. 12 قاباتتى ەكى ۇيدەن 176 پاتەر قولدانىسقا بەرىلۋ كەرەك ەدى، ونىڭ ىشىندە 5-6 پاتەرىن جاعدايى ناشار، ءۇيى جوق جاندارعا بەرسەم دەپ نيەت ەتىپ جۇرگەنمىن»،-دەيدى ول.

قۇرىلىس الاڭىندا 55 ادام جۇمىس ىستەگەن، ولارعا 380-450 مىڭ تەڭگە كولەمىندە ورتاشا ايلىق تولەنىپ كەلىپتى.

ينۆەستورلارعا اتقارۋشى ورگاندار تاراپىنان جاسالعان قىسىمدار مەن كەدەرگىلەر مەملەكەتكە قارسى جاسالعان قىلىمىس رەتىندە قارالسىن، دەگەن پرەزيدەنتتىڭ ءسوزىن العا تارتقان م.ابيتوۆ «ەندىگى ءۇمىتىم مەملەكەت باسشىسىندا» دەيدى.

قۇرىلىسى جارتىلاي بىتكەن بۇل نىسان نەلىكتەن جارامسىز بولىپ قالدى جانە ساۋلەت-جوسپارلاۋ تاپسىرماسىن نەگە بەرمەدى دەگەن سۇراق بويىنشا الماتى قالاسىنىڭ اكىمدىگىنە سۇراۋ سالعان ەدىك. الداعى ۋاقىتتا ونىڭ جاۋابىن دا جاريالايمىز.

Abai.kz