بۇرىنعى ەكونوميكا جانە ساۋدا، كەيىننەن ءبىلىم جانە عىلىم ءمينيسترى قىزمەتتەرىن اتقارعان ەكونوميست جاقسىبەك قۇلەكەەۆ ەكس-پرەزيدەنت نۇرسۇلتان نازارباەۆقا قاتىستى ويىن ايتىپ، «ەلباسىنىڭ جاقسى اتىن ساقتاپ قالعان دۇرىس»، - دەپ پىكىر ءبىلدىرىپتى. 

بۇل تۋرالى قۇلەكەەۆ مىرزا «سۇراۋى بار» Youtube ارناسىنا بەرگەن سۇقباتىندا ايتقان.

ەكس-ءمينيستردىڭ پىكىرىنشە، حالىقتىڭ نازارباەۆقا كەشىرىمدى بولعانى ءجون. ال، ونىڭ وتباسى مۇشەلەرى مەن جاقىندارىنا قاتىستى كۇدىك، قىلمىستىق تەكسەرۋ ءادىل ءجۇرۋ كەرەك.

- «قولىمىزدان كەلەتىن بولسا، ەگەمەندىك ءۇشىن، كەلەشەك ۇرپاق ءۇشىن و كىسىنىڭ جاقسى اتىن ساقتاپ قالعان دۇرىس. ەلباسى مەن ونىڭ اينالاسىندا جۇرگەن ادامداردىڭ وزبىرلىعىن نەمەسە قىلمىسىن ءبولىپ قاراعان ءجون دەپ ويلايمىن. پرەزيدەنتتىڭ ۇستاپ وتىرعان ساياساتى دا سونداي. مەملەكەت ءۇشىن، بولاشاق ۇرپاقتار ءۇشىن، ەگەمەندىكتىڭ تۋىن بەرىك قىلۋ ءۇشىن نازارباەۆتىڭ اتقارعان ءرولى وتە جوعارى. و كىسىنى قازىر قورلايتىن بولساق، ول – ەگەمەندىكتى قورلاعانمەن بىردەي نارسە. سوندىقتان بۇل تۇرعىدا مەن حالىقتىڭ ەلباسىعا كەشىرىمدى بولعانىن قالار ەدىم.

ال، وتباسىنىڭ جاقىن مۇشەلەرى مەن وتباسىعا جاقىن ازاماتتار، سول كىسىنىڭ جانىندا ءجۇرىپ كوپ پايداسىن كورگەن ازاماتتاردى كەشىرۋ-كەشىرمەۋ جاساعان ءىس-ارەكەتتەرىنە، قىلمىسىنا بايلانىستى», - دەيدى ەكس-مينيستر.

سونداي-اق ول، ەكس-پرەزيدەنتتىڭ دە قوعامدىق پىكىرگە الاڭدايتىنىن ايتىپتى.

- «ەلباسى دا پەندە، ول دا اكە. ول دا اتا. نەمەرە، شوبەرە ءسۇيىپ وتىر. وتباسىنىڭ اينالاسىنداعىلارعا قاتىستى قوعامدا ايتىلىپ جاتقان پىكىرلەرگە و كىسى الاڭدامايدى ەكەن، قىنجىلمايدى ەكەن دەپ ايتۋ وتە قيىن. ول دا ەت پەن سۇيەكتەن جارالعان ادام عوي. مەنىڭشە، و كىسىنى ءدال قازىر تابالاۋدىڭ قاجەتى جوق»، - دەيدى قۇلەكەەۆ.

ودان بولەك، ەكس-مينيستر قاسىم-جومارت توقاەۆپەن بايلانىسى تۋرالى دا پىكىر بىلدىرگەن. ايتۋىنشا، قۇلەكەەۆ تۇرمەدەن شىققان ۋاقىتتا (2008 جىلى پارا الۋ مەن قىزمەت بابىن اسىرا پايدالانعانى ءۇشىن ءۇش جىل باس بوستاندىعىنان ايىرىلعان) سول كەزدەگى سەنات توراعاسى بولعان قاسىم-جومارت توقاەۆ ۇيىنە شاقىرىپ، قوناق ەتكەن.

- «مەن تۇرمەدەن شىققان ۋاقىتتا قازاق بولعان سوڭ، ارينە، جاقىن تۋىستارىم، اينالام شاقىرىپ شاي بەرىپ جاتتى. ال بۇرىنعى قىزمەتتەس بولعانداردىڭ ىشىندە ۇيىنە شاقىرىپ ءبىرىنشى شاي بەرگەن ازامات – قاسىم-جومارت كەمەلۇلى. ول كەزدە توقاەۆ سەنات توراعاسى ەدى. تۇرمەدەن شىعىپ كەلگەن مەنى ۇيىنە شاقىرىپ داستارحان جايدى. ەكەۋمىز كەشكى ساعات 6-دان تۇنگى 2-3 كە دەيىن ۇزاق وتىرىپ اڭگىمەلەستىك. سودان كەيىن مەملەكەت ماسەلەلەرى، قابىلدانىپ جاتقان شەشىمدەر بويىنشا پىكىرىمدى سۇرادى»، - دەپ ەسكە الدى ول.

ايتا كەتەيىك، 2020 جىلدىڭ ناۋرىز ايىندا پرەزيدەنت توقاەۆ  «قازمۇنايگاز ينجينيرينگ» كومپانياسى باس ديرەكتورىنىڭ كەڭەسشىسى جاقسىبەك قۇلەكەەۆتى قابىلداپ، قازاقستاننىڭ الەۋمەتتىك-ەكونوميكالىق دامۋى جونىندەگى ماسەلەلەردى تالقىلاعان بولاتىن.

Abai.kz