ءماجىلىس توراعاسى ەرلان قوشانوۆ رەفەرەندۋمنىڭ ءمان-ماڭىزىن ءتۇسىندىرۋ ءۇشىن جۇمىس ساپارىمەن شىعىس قازاقستان وبلىسىنا باردى. الدىمەن سەمەي قالاسىندا بولىپ، ءوڭىر جۇرتشىلىعىمەن كەزدەستى.

ەرلان قوشانوۆ جيىن بارىسىندا مەملەكەت باسشىسى قاسىم-جومارت توقاەۆتىڭ باستاماسىمەن قازىر ەلىمىزدە اۋقىمدى وزگەرىستەر بولىپ جاتقانىن ايتىپ، ءوڭىر حالقىن اباي وبلىسىنىڭ قۇرىلۋىمەن قۇتتىقتادى.

سەمەي – الاش ارىستارىنىڭ باسىن قوسقان قازاق رۋحانياتىنىڭ قارا شاڭىراعى. سوندىقتان تاريحي تۇرعىدان قارايتىن بولساق، اۋماقتىق جاعىنان، حالىق سانى جاعىنان الساق تا، ءادىل شەشىم بولدى دەپ ويلايمىن. ەندەشە، سىزدەردى سول تاريحي ادىلەتتىلىكتىڭ ورناۋىمەن شىن جۇرەكتەن قۇتتىقتايمىن، – دەدى پالاتا سپيكەرى.

ءماجىلىس توراعاسىنىڭ ايتۋىنشا، پرەزيدەنتتىڭ اباي وبلىسىن قۇرۋ تۋرالى شەشىمى ايماقتىڭ ودان ءارى  وركەندەۋىنە تىڭ سەرپىن بەرەدى. جاڭا جۇمىس ورىندارى اشىلىپ، ينۆەستيتسيا تارتىلادى جانە كاسىپكەرلىكتىڭ دامۋىنا جاڭا مۇمكىندىكتەر پايدا بولادى.

اباي ءوڭىرى، سەمەي جەرى تاريحتىڭ جاڭا پاراعىن اشتى. ءبىز اباي وبلىسىنىڭ شاڭىراعىن حالقىمىزبەن، پرەزيدەنتىمىزبەن بىرگە كوتەرەمىز. وسى ىستە پارلامەنت ءماجىلىسى، «AMANAT» پارتياسى دا سىزدەرمەن بىرگە بولادى، – دەدى ءماجىلىس سپيكەرى.

ەرلان قوشانوۆ ەل تاعدىرىن ايقىندايتىن ۇلكەن ماقسات-مىندەتتەرگە توقتالىپ، ول جالپىحالىقتىق رەفەرەندۋمنان باستالاتىنىن اتاپ ءوتتى. ءماجىلىس توراعاسى جينالعان قاۋىمعا مەملەكەت باسشىسى رەفورمالارىنىڭ ءمان-ماڭىزىن ءتۇسىندىرىپ، «جاڭا قازاقستاننىڭ» كەلەشەك كەلبەتى جايلى ءوز ويىمەن ءبولىستى.

راسىمەن دە، جاڭا قازاقستان دەگەنىمىز نە؟ قازىر ەڭ ءجيى قويىلاتىن سۇراق وسى. پرەزيدەنت جۋىردا بۇعان ناقتى جاۋاپ بەردى. «ول – ادىلەتتى قازاقستان» دەپ ءدوپ باسىپ ايتتى. ال «جاڭا قازاقستاندىق» قانداي بولۋى قاجەت؟ مۇنى وسى توپىراقتا تۋعان ۇلى اباي 1 جارىم عاسىر بۇرىن ايتىپ كەتكەن. ول – بەس نارسەدەن قاشىق بوپ، بەس نارسەگە اسىق بولۋى كەرەك. قاراپ وتىرساڭىزدار، اباي فيلوسوفياسى پرەزيدەنتىمىزدىڭ «جاڭا قازاقستان» تۋرالى كوزقاراسىمەن تولىق ۇندەسىپ تۇر. سوندىقتان جاستاردى بىلىمگە، ەڭبەككە باۋلۋ، وسى بەس قاسيەتتى بويىنا ءسىڭىرۋ ماڭىزدى، – دەدى پالاتا سپيكەرى.

ەرلان قوشانوۆ پرەزيدەنت رەفورمالارىنىڭ جاڭا مۇمكىندىكتەرگە جول اشاتىنىن ايتىپ، الداعى ۋاقىتتا پارلامەنتتىڭ ءرولى كۇشەيەتىنىنە، ەلىمىزدىڭ سايلاۋ جۇيەسىنە دە بىرقاتار وزگەرىستەر بولاتىنىنا ءمان بەردى. اسىرەسە، اكىمدەر سايلاۋى – كوپشىلىكتى قىزىقتىراتىن تاقىرىپتاردىڭ ءبىرى.

– بۇل تاقىرىپ ەل اراسىندا ءجيى ايتىلىپ ءجۇر. ءبىز وعان كەزەڭ-كەزەڭمەن كەلە جاتىرمىز. بىلتىر ەلىمىزدە 1 مىڭعا جۋىق اۋىل اكىمىن حالىقتىڭ ءوزى سايلادى. كەلەر جىلى اۋدان اكىمدەرىن سايلاۋعا كىرىسەمىز. الداعى كەزەڭدەردە بۇكىل اۋىل، اۋدان، قالا اكىمدەرى حالىقپەن تىكەلەي سايلاناتىن بولادى. وبلىس باسشىلارىن تاعايىنداۋ ماسەلەسىنە كەلەر بولساق، بۇرىن پرەزيدەنت ۇسىنعان جالعىز كانديدات 20-30 وبلىستىق ءماسليحات دەپۋتاتىمەن كەلىسىلەتىن. ەندى مەملەكەت باسشىسى تاراپىنان كەم دەگەندە ەكى ۇمىتكەر ۇسىنىلادى. ونى بارلىق دەڭگەيدەگى ءماسليحاتتار، اۋدان، قالا، وبلىس دەپۋتاتتارى تاڭدايتىن بولادى، – دەدى ءماجىلىس توراعاسى.

جيىندا وبلىستىڭ قوعام وكىلدەرى ءسوز سويلەپ، مەملەكەت باسشىسىنىڭ رەفەرەندۋم وتكىزۋ جونىندەگى باستاماسى مەن بارلىق رەفورمالاردى قولدايتىندىقتارىن ايتتى.

ودان ءارى ءماجىلىس توراعاسى سەمەي قالاسىنداعى جەدەل مەديتسينالىق جاردەم اۋرۋحاناسى ۇجىمىمەن كەزدەستى، ەلىمىز بويىنشا قابىرعا ماتەريالدارىن شىعاراتىن ءىرى كاسىپورىنداردىڭ ءبىرى  «سيليكات»  زاۋىتىندا بولىپ، جۇمىسشىلارمەن اڭگىمەلەستى. سونداي-اق، مۇگەدەكتەرگە ارنالعان 150 ورىندىق وڭالتۋ ورتالىعىنىڭ قۇرىلىسىمەن تانىستى.

ساپار بارىسىندا ەرلان قوشانوۆ اباي اۋدانىنداعى قاراۋىل اۋىلىنا بارىپ، جۇرتشىلىقپەن كەزدەستى. وندا پرەزيدەنت باستامالارىنىڭ ءمان-ماڭىزدىلىعىن ءتۇسىندىرىپ، اۋىل زيالىلارى مەن تۇرعىندارىنىڭ پىكىرىن تىڭدادى.

– ەلىمىزدە قاراۋىلدى بىلمەيتىن قازاق جوق شىعار. بۇل – ادامزاتقا عۇلاما ابايدى سىيلاعان قاسيەتتى توپىراق. وسىندا سىزدەرمەن جۇزدەسكەنىمە قۋانىشتىمىن. «جاڭا قازاقستان» قۇرۋعا باعىتتالعان مەملەكەت باسشىسىنىڭ ساياسي رەفورمالارى توڭىرەگىندە وزدەرىڭىزبەن اڭگىمەلەسۋ ءۇشىن ارنايى كەلدىم. پرەزيدەنت ەل تاعدىرىن – قالىڭ جۇرتتىڭ ءوزى شەشكەنىن قالاپ وتىر. وسىناۋ جاۋاپتى كەزەڭدە حالىق پەن بيلىك ءبىرتۇتاس بولۋىمىز كەرەك. وسى جولدى مەملەكەت باسشىسىنا قولداۋ ءبىلدىرىپ، رەفەرەندۋمعا ءبىر كىسىدەي اتسالىسۋعا، تاريحي تاڭداۋ جاساۋعا شاقىرامىن، – دەدى پالاتا توراعاسى.

كەزدەسۋگە كەلگەن زيالى قاۋىم وكىلدەرى اباي اۋدانى جۇرتشىلىعىنىڭ رەفورمالاردى جاقسى قابىلداپ جاتقانىن جانە ونىڭ ماڭىزىن ەسكەرە وتىرىپ، الداعى رەفەرەندۋمعا اتسالىساتىندارىن ايتتى.

– بۇل رەفورمالاردىڭ ءبارى حالىقتىڭ كوكەيىندە جۇرگەن سۇراقتارعا جاۋاپ بەرەدى. ءبىز ونى جاقسى تۇسىنەمىز. ەلدىڭ يەسى، جەردىڭ يەسى – حالىق دەگەن ءسوز جۇرەگىمىزگە جاقىن ءتيدى. پرەزيدەنتىمىز جۇمىسقا كىرىسكەن كۇننەن باستاپ وسى دەموكراتيالىق پروتسەستەردىڭ جۇزەگە اسۋىن ءسوز ەتىپ ءجۇر. ءبىز ونى تولىق قولدايمىز، – دەدى اباي اۋدانىنىڭ قۇرمەتتى ازاماتى امانتاي مۇقاتاەۆ.

كەزدەسۋ سوڭىندا جينالعاندار پرەزيدەنتكە اباي وبلىسىنىڭ قۇرۋعا ۇيتقى بولعانى ءۇشىن كۇللى اۋدان اتىنان شىنايى العىس ايتتى.

– وبلىسىمىز قۇرىلىپ جاتىر. زور ماقتانىشپەن، ۇلكەن ۇمىتپەن قاراپ وتىرمىز. پرەزيدەنتىمىز قاسىم-جومارت كەمەلۇلىنا ءبىزدىڭ سالەمىمىزدى جەتكىزىڭىز. ابايلىقتار مەن اباي ۇرپاقتارى شەكسىز العىسىن بىلدىرەدى. ءوڭىرىمىزدىڭ گۇلدەنۋىنە ءبارىمىز ءبىر كىسىدەي اتسالىسامىز، – دەدى اباي اۋدانىنىڭ قۇرمەتتى ازاماتى تولەگەن جانعاليەۆ.

سونىمەن قاتار ءماجىلىس توراعاسى قاراۋىلدا ورنالاسقان اباي اتىنداعى مەكتەپ-گيمنازياسىن ارالاپ، مۇعالىمدەرمەن جانە وقۋشىلارمەن كەزدەستى.

Abai.kz