رەسەيدىڭ ۋكرايناعا باسىپ كىرىپ، ويران سالعانىنا 3 اي تولدى. وسى ۋاقىتقا دەيىن قاندى مايداندا رەسەيدىڭ قانشا اسكەرى، ۋكراينانىڭ قانشا ساربازى مەن بەيبىت تۇرعىنى قازا بولدى؟ بۇل تۋرالى «ناستوياششەە ۆرەميا» ارناسى ساراپتاما جاساپتى. ءبىز ساراپتامانى اۋدارىپ، نازارلارىڭىزعا ۇسىنامىز.

ۋكراينا گەنشتابىنىڭ مالىمەتىنشە، رەسەي ۋكراينامەن 3 ايعى سوعىستا 30 مىڭعا جۋىق ساربازىنان ايىرىلدى. 30 مىڭنىڭ ىشىنە قازا بولعاندار دا، جارالانعاندار دا كىرەدى. كيەۆ جەكەلەگەن ستاتيستيكانى ايتپادى. رەسەي قورعانىس مينيسترلىگى ۋكرايناعا جورىعىنان ءبىر اي وتكەندە رەسمي تۇردە سوعىستا 1351 ادامىن جوعالتقانىن مالىمدەدى. سول كەزدە اقش مەملەكەتتىك دەپارتامەنتىنىڭ وكىلى رەسەي اتالعان ساننان 7 ەسەگە كوپ ساربازىنان ايىرىلدى دەگەن بولاتىن.

«وكىنىشكە وراي رەسەي ۋكراينا اسكەرىنىڭ قانشالىقتى مىقتى ەكەنىن ءالى دە تۇسىنبەي وتىر. رەسەي ادام سەنگىسىز شىعىنعا باتىپ جاتىر. ءبىزدىڭ ەسەپتەۋىمىزشە، رەسەي 10 مىڭنان كوپ ساربازىنان ايىرىلدى»، - دەدى اقش مەملەكەتتىك حاتشىسىنىڭ ورىنباسارى ۆيكتوريا نۋلاند.

قازىرگى كۇنى باتىستىڭ بارلاۋشىلارى رەسەيدىڭ 3 ايداعى ۋكرايناداعى شىعىنى مەن كەڭەس وداعىنىڭ 9 جىلعى اۋعانستان سوعىسىنداعى شىعىنىن سالىستىرۋدا. ۇلىبريتانيا قورعانىس ءمينيسترى ۋكراينادا 15 مىڭعا شامالاس رەسەيلىك اسكەريلەر قازا تاپقانىن ايتتى.

«ءبىزدىڭ باعالاۋىمىزشا، ۋكرايناعا باسىپ كىرگەن ۋاقىتىنان باستاپ رەسەيلىكتەردىڭ 15 مىڭ ادامى وپات بولدى. ءارتۇرلى اقپارات كوزدەرى 2 مىڭنان اسا بروندالعان ماشينا قولدى بولدى نە جويىلدى دەپ حابارلايدى»، - دەدى ۇلىبريتانيا قورعانىس ءمينيسترى بەن ۋوللەس. ۋكراينا تارابى: «رەسەي ولتىرىلگەن بەيبىت تۇرعىنداردىڭ جانە ءوز اسكەرىنىڭ ءمايىتىن جاسىرۋ ءۇشىن ءموبيلدى كرەماتوريدى قولدانىپ جاتىر»، - دەيدى. ولار كوبىنەسە قايتىس بولعان ساربازداردىڭ دەنەسىن الىپ كەتۋدەن باس تارتادى ەكەن.

«كەيبىرىن الىپ كەتىپ جاتقان شىعار. ولاردىڭ «ءوز باۋىرلارىمىزدى تاستامايمىز» دەگەن ەرتەگىسى بار. بۇل ءسوز ەگەر ەرتەگى بولماسا، مىنا جەردە ءولى دەنەلەر جاتپاس ەدى. توڭازىتقىشتا جۇزدەگەن ادامنىڭ دەنەسى جاتىر. بۇل فاكت. ولار ءوز باۋىرلارىن «لاقتىرىپ» كەتتى»، - دەدى ۋكراينا قارۋلى كۇشتەرىنىڭ پولكوۆنىگى ۆلاديمير ليامزين.

مەديازونا مەن BBC ورىس رەداكتسياسىنىڭ جۋرناليستەرى رەسەيدىڭ 2622 اسكەرىنەن ايىرىلعانىن ايتادى. بۇل تەك الەۋمەتتىك جەلىدەگى جازبالار، جەرگىلىكتى باق جانە رەسمي بيلىك سياقتى اشىق اقپارات كوزدەرىنەن الىنعان دەرەكتەر. جۋرناليستەر قازا بولعان ساربازدار تۋرالى حابار بۋرياتيا، داعىستان سەكىلدى جاي-كۇيى ناشار ايماقتاردان كەلەتىنىن ايتتى. كاۆكاز. رەالي ءجۋرناليسى سوعىستا قايتىس بولعان ساربازدىڭ قايىن ەنەسىمەن سويلەسكەن.

«ءبىر ايەلدىڭ ءتورت ۇلى وسى سوعىستا ءجۇر. ءبارى وفيتسەر. كورشىمىزدىڭ بالاسى تانكتە جانىپ كەتتى. ءتىپتى دنق-سىن دا، بەلگىسىن دە تاپپاي قالدى. باسقا ءبىر ايەلدىڭ بالاسى 4 اي بويى حابار-وشارسىز كەتتى. ونداي كوپ. بىراق كورىپ تۇرسىز عوي، بۇل جەردە جۇمىس جوق. وتباسىن اسىراۋى كەرەك. اسكەرگە كەلىسىم-شارتپەن كەتكەندەر. بۇكىل داعىستاندىق سول جاقتا»، - دەدى داعىستان تۇرعىنى ءامينا نۇراتدينوۆا

رەسەيدىڭ قورعانىس مينيسترلىگى سوعىستا 23367 ۋكراين اسكەرى قازا تاپتى دەپ مالىمدەدى. بۇل دەرەكتى تەكسەرۋ مۇمكىن ەمەس. كيەۆ قايتىس بولعاندار سانى 5 جۇزدەي ەكەنىن ايتادى. ءساۋىر ايىنىڭ ورتاسىندا ۋكراينا پرەزيدەنتى ۆلاديمير زەلەنسكي سوعىس باستالعاننان بەرى 2500-3000 شاماسىندا ۋكرايندىق اسكەريلەر قازا تاۋىپ، 10 مىڭداي ادام جارالانعانىن ايتقان.

«بۇگىن ءبىزدىڭ ەڭ قيىن باعىتىمىز - ەلىمىزدىڭ شىعىسىنداعى سوعىستا 50-100 ادامداي قازا تابۋى مۇمكىن. ولار الەمدە ءبارى ايتىپ جاتقانداي،  ءبىزدىڭ وتانىمىزدى، تاۋەلسىزدىگىمىزدى قورعاپ جاتىر. ءبارى وسىلاي ايتادى، الايدا بۇل ءبىزدىڭ قابىرعامىزعا قاتتىراق باتادى»، -دەدى زەلەنسكي دونباستاعى اياۋسىز سوعىس تۋرالى. سوعىستا اسكەريلەر عانا ەمەس، بەيبىت تۇرعىندار قۇربان بولىپ جاتىر. بۇۇ ۋكراينادا  شامامەن 3930 بەيبىت تۇرعىن قايتىس بولىپ، 4532 ادام جارالانعانىن مالىمدەدى. بىراق، شىندىعىنا كەلگەندە وپات بولعاندار سانى بۇدان دا كوپ. ويتكەنى بۇۇ-نا اقپارات كەشىگىپ جەتۋدە.

ۋكراينا باس پروكۋرورىنىڭ دەرەگىنشە، قۇربان بولعان بەيبىت تۇرعىندار سانى- 4600, ونىڭ ىشىندە 232-ءى بالا. ۋكراينا بيلىگى ازىرگە باسىپ الىنعان اۋماقتاردا قايتىس بولعان ادامدار سانىن انىقتاي الماي وتىر. بۇدان بۇرىن ماريۋپولدە 20 مىڭ ادام قازا تاپقانى حابارلانعان بولاتىن.

ايجان تەمىرحان

Abai.kz