"ۇلتتىق ۆاليۋتانىڭ "شىنايى باعامى" ەندى قالىپتاستى”,- دەدى ۇلتتىق ەكونوميكا ءمينيسترى الىبەك قۋانتىروۆ جۋرناليستەرگە بەرگەن جاۋابىندا.

ونىڭ ايتۋىنشا،اقپان-ناۋرىز ايلارىندا تەڭگە باعامىنىڭ قۇلدىراۋىنا بىرنەشە جاعداي اسەر ەتكەن، بيزنەس پەن حالىقتىڭ داۋرىعۋى دا دوللارعا سۇرانىستى ارتتىرعان كورىنەدى.

"ودان سوڭ جاعداي تۇراقتالدى، قازىر الدەقايدا جاقسارعانىن كورىپ وتىرمىز. سوعان قاراماستان ءبىز ناۋرىز ايىندا-اق بيۋدجەت پەن بولجامدى ناقتىلاپ، بيۋدجەتتەگى دوللار باعامىن 460 تەڭگەگە دەيىن كوتەردىك", - دەدى مينيستر.

بيىل ناۋرىز ايىندا ۇلتتىق ۆاليۋتا باعامى دوللورعا شاققاندا 510 تەڭگەگە كوتەرىلگەن. قازىر ول نىعايا باستادى. 25 مامىرداعى قازاقستان قور بيرجاسىنىڭ (KASE) كۇندىزگى ساۋداسىندا دوللاردىڭ تەڭگەگە شاققانداعى ورتاشا باعامى 415,12 تەڭگەگە تۇراقتادى. دەگەنمەن ساراپشىلار تەڭگە نىعايعانىمەن ينفلياتسيا ارتا بەرەتىنىن ايتادى. ەكونوميست ارمان بايتانوۆتىڭ پىكىرىنشە، رۋبل قىمباتتاعاندىقتان، ۇلتتىق بانك تەڭگەنى نىعايتادى. سەبەبى، رەسەيلىك تاۋارلاردىڭ قىمباتتاۋى ينفلياتسياعا ۇشىراتادى. اقپان-ناۋرىز ايلارىندا 1 رۋبل 5 تەڭگەدەن ارزانعا باعالانسا، قازىر رۋبل 7 تەڭگەگە دەيىن كوتەرىلدى.

ءساۋىر ايىندا قازاقستان ينفلياتسيا كورسەتكىشى بويىنشا ەۋرازيا ەكونوميكا وداعى ەلدەرى اراسىندا ەكىنشى ورىن الدى. مامىردىڭ باسىندا قازاقستان ۇلتتىق بانكى ينفلياتسيا 13,2 پايىزعا ارتقانىن مالىمدەگەن. ۇلتتىق ەكونوميكا ءمينيسترى الىبەك قۋانتىروۆتىڭ پىكىرىنشە، "ينفلياتسيا - ساۋ ەكونوميكا نىشانى", ينفلياتسيا بولماعانى "ەكونوميكانىڭ تۇرالاپ قالعانىن" بىلدىرەدى.

Abai.kz