پالەستينا مەملەكەت مارتەبەسىن الۋ ءۇشىن قاراشادا بۇۇ-عا ءوتىنىش جاساماقشى
استانا. 12 قاراشا. قازاقپارات - پالەستينا ۇلتتىق اكىمشىلىگىنىڭ باسشىسى ماحمۇد ابباس قاراشا ايىندا پالەستينا مەملەكەتتىگىن تانۋ ءۇشىن بۇۇ باس اسسامبلەياسىنا ءوتىنىش جاسايتىنىن قۋاتتاپ، بۇل قادامنىڭ كەيىنگى قالدىرىلاتىنى تۋرالى سىبىستاردى جوققا شىعاردى، دەپ حابارلادى رەسەيلىك «جاڭالىقتار» اگەنتتىگى.
استانا. 12 قاراشا. قازاقپارات - پالەستينا ۇلتتىق اكىمشىلىگىنىڭ باسشىسى ماحمۇد ابباس قاراشا ايىندا پالەستينا مەملەكەتتىگىن تانۋ ءۇشىن بۇۇ باس اسسامبلەياسىنا ءوتىنىش جاسايتىنىن قۋاتتاپ، بۇل قادامنىڭ كەيىنگى قالدىرىلاتىنى تۋرالى سىبىستاردى جوققا شىعاردى، دەپ حابارلادى رەسەيلىك «جاڭالىقتار» اگەنتتىگى.
ول بۇۇ باس اسسامبلەياسىندا داۋىس بەرۋگە قويۋ كۇنىن تاياۋداعى كۇندەردە اراب مەملەكەتتەرى ليگاسىمەن كەلىسۋگە ۋادە ەتتى.
«وسى ايدا ءبىز بۇۇ-عا جۇگىنەمىز. اراب مەملەكەتتەرى ليگاسى ەكى كۇننىڭ ىشىندە ءوتىنىش بەرۋ كۇنىن جاريالايدى»، دەدى ابباس ءوزىنىڭ الدىندا ەل باسشىسى بولعان ياسير ارافاتتىڭ قايتىس بولۋىنا سەگىز جىل تولۋىنا وراي سويلەگەن سوزىندە.
بۇعان دەيىن جەرگىلىكتى باق پالەستينالىقتاردىڭ بۇۇ باقىلاۋشى-مەملەكەت مارتەبەسىن الۋعا ۇمتىلۋى كەلەسى جىلعا دەيىن كەيىنگە قالدىرىلۋى مۇمكىن دەپ جازعان بولاتىن. بۇگىندە بۇۇ-دا پالەستينالىقتاردىڭ مۇددەسىن پالەستينانى ازات ەتۋ ۇيىمى بايقاۋشى-سۋبەكتى رەتىندە قورعاۋدا.
«ءبىز بۇۇ-عا 2013 جىلى نەمەسە 2014 جىلى ەمەس، 2012 جىلدىڭ قاراشا ايىندا شىعامىز»، - دەدى ابباس.
«ءبىزدى قورقىتىپ-ۇركىتكىسى كەلەتىندەر بار ەكەنىن بىلەمىز، بىراق تا ءبىز ءۇشىن وتان بارىنەن دە قىمبات»، - دەدى پالەستينالىق كوشباسشى.
«كول يسراەل» راديوستانساسى جەكسەنبى كۇنى يزرايلدىڭ قارجى ءمينيسترى يۋۆال ءشتاينيتستىڭ «ەگەر پالەستينالىقتار بۇۇ-عا ءوتىنىش جاساۋدان باس تارتپاسا، پالەستينا قاجەتتەرى ءۇشىن سالىق جيناۋ توقتاتىلادى» دەگەن سوزدەرىن كەلتىردى.
ءوزارا جانجالداردى تۇپكىلىكتى رەتتەۋ شارتتارى تۋرالى پالەستينا-يزرايل ديالوگى ەكى جىل بۇرىن ۇزىلگەن بولاتىن. پالەستينا ەگەر يزرايل ءوز ەلىنىڭ حالقىن گازا سەكتورىنا قونىستاندىرۋدى توقتاتپاسا، كەلىسسوزدەر ۇستەلىنە وتىرۋدان باس تارتىپ وتىر. پالەستينالىقتار بۇۇ-عا مۇشەلىككە ءوتىپ، 1949-1967 جىلدارداعى شەكاراسى حالىقارالىق دارەجەدە تانىلعاننان كەيىن عانا، يزرايلمەن تەرەزەسى تەڭ مەملەكەت رەتىندە كەلىسسوزدەر جۇرگىزبەك.
