قىرعىزستاننىڭ بۇرىنعى پرەزيدەنتى المازبەك اتامباەۆ №27 كولونيادان ۇلتتىق كارديولوگيا ورتالىعىنا اۋىستىرىلدى. بۇل تۋرالى ونىڭ ادۆوكاتى زامير جووشەۆ حابارلاعان، دەپ جازدى ازاتتىق.

قورعاۋشىنىڭ ايتۋىنشا، 25 ساۋىردە 1-ماي اۋداندىق سوتى اتامباەۆتىڭ دارىگەرگە قارالۋ قاجەتتىگى تۋرالى ارىزدى قاناعاتتاندىردى. "سودان بەرى تۋرا ءبىر اي ءوتتى، بۇگىن ونى ۇلتتىق كارديولوگيا ورتالىعىنا اۋىستىردى", - دەپ حابارلادى ادۆوكات.

بۇرىنعى پرەزيدەنتتىڭ ۇلى قادىر اتامباەۆ "اكەسىنىڭ "قولى مەن اياعى ۇيىپ قالاتىنىن، وتىرىپ-تۇرۋى قيىنداعانىن" جەتكىزگەن. "ونىڭ ومىرتقاسى بۇلىنگەن، جۇرەگىندە اقاۋ بار، اس قورىتۋى ناشار. مۇنداي دياگنوزدى جەكەمەنشىك كلينيكادا ەمەس، №47 كولونيانىڭ ەمدەۋ دەپارتامەنتىندە قويعان. دارىگەرلەر ونىڭ سوتقا بارۋى قيىن ەكەنىن، كوتەرە المايتىنىن مويىنداپ وتىر", - دەدى قادىر اتامباەۆ. المازبەك اتامباەۆتىڭ اۋرۋحانادا قانشا ۋاقىت جاتاتىنى ازىرگە بەلگىسىز.

بۇنىڭ الدىندا ەكس-پرەزيدەنت دەنساۋلىعىنا بايلانىستى سوت وتىرىستارىنا قاتىسا المايتىنىن بىرنەشە مارتە مالىمدەگەن. "دياگنوزىم ناشار. دارىگەر ونى جاقسى بىلەدى. ماعات سوتقا كەلىپ-كەتۋ، زالدا وتىرۋ وڭاي ەمەس. مۇگەدەك بولىپ قالعىم كەلمەيدى، ولاردىڭ قالاعانى دا وسى", - دەدى بۇرىنعى پرەزيدەنت سوتتىڭ 14 ساۋىردەگى وتىرىسىندا. پرەزيدەنت سادىر جاپاروۆ اتامباەۆقا قاتىستى سوتتاردى اشىق وتكىزۋدى سۇراعان.

2011-2017 جىلدار ارالىعىندا قىرعىزستان پرەزيدەنتى بولعان المازبەك اتامباەۆ 2020 جىلدىڭ اياعىنان بەرى بىشكەكتەگى №47 كولونيادا وتىردى. بيىل ساۋىردە ونى مولدوۆانوۆكا اۋىلىنداعى №27 كولونياعا اۋىستىردى.

ونى قوي-تاش وقيعاسىنا قاتىستى ءىس بويىنشا سوتتاپ جاتىر. سونىمەن بىرگە 2020 جىلعى ماۋسىمدا اتامباەۆ قىلمىس الەمىنىڭ دوكەيى ءازىز باتۋكاەۆتى تۇرمەدەن زاڭسىز بوساتقانى ءۇشىن 11 جىلعا سوتتالعان. المازبەك اتامباەۆتىڭ ۇستىنەن بۇلاردان باسقا تاعى بىرنەشە قىلمىستىق ءىس قوزعالعان.

Abai.kz