ءماجىلىس توراعاسى ەرلان قوشانوۆتىڭ قاراعاندى وبلىسىنا جۇمىس ساپارى باستالدى. پالاتا سپيكەرى «AMANAT» پارتياسىنىڭ  وبلىستىق فيليالى عيماراتىندا ءوڭىر جۇرتشىلىعىمەن جۇزدەستى.

ەرلان قوشانوۆ الداعى رەفەرەندۋم جايلى ايتىپ، ەل تاعدىرىن شەشەتىن اۋقىمدى رەفورمالاردىڭ ءمان-ماڭىزىن ءتۇسىندىردى. ونىڭ ايتۋىنشا، مەملەكەت باسشىسى ۇسىنىپ وتىرعان كونستيتۋتسيالىق رەفورمالاردىڭ بارلىق سالاعا قاتىسى بار.

– تاياۋدا پرەزيدەنت جارلىعىمەن ۇلىتاۋ وبلىسى قايتا قۇرىلدى. وزدەرىڭىزگە بەلگىلى، قازىرگى قاراعاندى – الىپ ايماق. ءبىر ورتالىقتان مۇنداي ءوڭىردى باسقارۋدىڭ ءتيىمسىز تۇستارى بارشىلىق. شالعاي ەلدى مەكەندەردەن وبلىس ورتالىعىنا جەتۋ قولايسىزدىق تۋدىراتىن. سوندىقتان بۇل حالىق ۇنىنە قۇلاق اسقان ءادىل ءارى ءتيىمدى شەشىم دەپ ەسەپتەيمىن. دەگەنمەن، قاراعاندى وبلىسى ەلىمىزدەگى ەڭ ءىرى ايماقتىڭ ءبىرى بولىپ قالا بەرەدى, – دەدى ەرلان قوشانوۆ.

جيىندا ءماجىلىس توراعاسى ەلىمىزدىڭ ساياسي ومىرىندەگى ۇلكەن وزگەرىستەردى ايتا كەلە، قازىرگى الەمدە بولىپ جاتقان كۇردەلى ۇدەرىستەرگە بەيىمدەلىپ، ءتۇرلى سىناقتارعا دايىن بولۋى كەرەكتىگىن اتاپ ءوتتى.

– قازىر جاھان جۇرتى كۇردەلى كەزەڭدى باستان كەشۋدە. بۇگىنگى تاڭدا ءبىزدىڭ مەملەكەتىمىزدە دە اۋقىمدى وزگەرىستەر بولىپ جاتىر. پرەزيدەنت رەفورمالارى وسى سىن-قاتەرلەرگە بەرىلگەن ناقتى جاۋاپ دەپ ايتۋعا بولادى. ءبىز جاڭا ءارى ادىلەتتى قازاقستان قۇرۋعا بەت بۇردىق, – دەدى پالاتا سپيكەرى.

قازىرگى تاڭدا ءماجىلىس دەپۋتاتتارى مەن «AMANAT» پارتياسىنىڭ مۇشەلەرى وڭىرلەردە حالىقپەن كەزدەسۋدە.

– جۇرتشىلىق مەملەكەت باسشىسىنىڭ باستامالارىن جاقسى قابىلداپ، قولداپ جاتىر. ەل بولاشاعىن ايقىندايتىن وسىنداي اۋقىمدى رەفورمالاردىڭ تاعدىرىن حالىقتىڭ ءوزى شەشۋى كەرەك.  وسى ويمەن مەملەكەت باسشىسى رەفەرەندۋم جاريالادى, – دەدى پالاتا سپيكەرى.

سونىمەن قاتار ەرلان قوشانوۆ جاساندى مونوپوليالاردى تۇبەگەيلى جويىپ، ازاماتتارعا تەڭ مۇمكىندىك بەرۋ ءۇشىن مەملەكەت تاراپىنان ۇلكەن شارۋا اتقارىلىپ جاتقانىنا نازار اۋداردى.

– ەلىمىزدە اشىق ساياساتتىڭ جاڭا كەزەڭى باستالايىن دەپ وتىر. ەندى بارلىق ساياسي كۇشتەر سايلاۋشىلاردىڭ ناقتى سۇرانىسىنا باسىمدىق بەرەدى. سونىمەن بىرگە رەفەرەندۋم مەملەكەتتىڭ جاڭا ماقساتتارىن جۇزەگە اسىرۋ بولىپ سانالادى. حالىق ەلىمىزدىڭ سايلاۋ جۇيەسىنە سەنۋى كەرەك. بۇل – بيلىك لەگيتيمدىگىنىڭ نەگىزى. سايلاۋ ساياسي ومىرىمىزدەگى قالىپتى جاعدايدا اينالۋعا ءتيىس. ءبىز بىرتە-بىرتە وسىعان كەلە جاتىرمىز, – دەدى ءماجىلىس توراعاسى.

پالاتا سپيكەرى رەفورمالاردىڭ باستى ماقساتى ازاماتتاردىڭ كونستيتۋتسيالىق قۇقىقتارىن قورعاۋدى نەگىزگە الاتىن ادىلەتتى قوعام قۇرۋ ەكەنىن اتاپ ءوتتى.

–  قازىر تۇرعىنداردىڭ كوپشىلىگى مەملەكەتتىك ورگانداردىڭ نورماتيۆتىك اكتىلەرىنە كوڭىلى تولماي وتىر. ولار ءارتۇرلى ينستانتسيالارعا شاعىمدانۋدا. ادامدار وزدەرىنىڭ كونستيتۋتسيالىق قۇىقتارى بۇزىلىپ جاتىر دەپ ەسەپتەيدى. رەفەرەندۋمنان كەيىن كونستيتۋتسيالىق سوت قۇرىلادى. ءار ازامات وسى ورگانعا نەمەسە ادام قۇقىقتارى جونىندەگى ۋاكىلگە شاعىمدانا الادى. ومبۋدسمەنگە كونستيتۋتسيالىق مارتەبە بەرىلەدى. ەندى ولار ءوز كونستيتۋتسيالىق قۇقىعىن قورعاۋ ءۇشىن ەلورداعا كەلمەي-اق، وڭىرلەردەگى ۋاكىلدەردىڭ قىزمەتىنە جۇگىنە الادى. وفيستەر بارلىق وبلىستا اشىلادى, – دەدى ەرلان قوشانوۆ.

ودان ءارى ءماجىلىس سپيكەرى ساياسي جۇيەنى كەشەندى جاڭعىرتۋ ماسەلەلەرىنە نازار اۋداردى. وندا پارلامەنتتىڭ ءرولىن ايتارلىقتاي كۇشەيتۋگە ەرەكشە ءمان بەرىلىپ وتىر.

ەرلان قوشانوۆ بۇگىندە پارلامەنت كەز-كەلگەن اۋداننىڭ بيۋدجەتىن تەكسەرە المايتىنىن، پارلامەنت دەپۋتاتتارىندا مۇنداي وكىلەتتىك جوق ەكەنىن ايتتى. ءماجىلىس توراعاسىنىڭ ايتۋىنشا، وڭىرلەرگە رەسپۋبليكادان قىرۋار قارجى بولىنۋدە. ال ەل بيۋدجەتىن بەكىتەتىن ورگان ءۇشىن ونىڭ قالاي جۇمسالاتىنىن ءتۇسىنۋ كەرەك.

– ەندى ەسەپ كوميتەتى مەن بارلىق تەكسەرۋ كوميسسيالارى اۋديتورلىق پالاتاعا بىرىكتىرىلىپ، جىلىنا ەكى رەت ءماجىلىس دەپۋتاتتارى الدىندا جاريا تۇردە ەسەپ بەرەتىن بولادى. بۇل ماجىلىسكە باقىلاۋدى كۇشەيتۋگە مۇمكىندىك بەرەدى. وسىلايشا  رەسپۋبليكالىق، وبلىستىق جانە جەرگىلىكتى بيۋدجەتتەردى باقىلاي الادى، – دەدى پالاتا سپيكەرى.

ءسوز سوڭىندا ەرلان قوشانوۆ وبلىس جۇرتشىلىعىن رەسپۋبليكالىق رەفەرەندۋمعا بەلسەندى قاتىسىپ، تاريحي تاڭداۋ جاساۋعا شاقىردى.

كەزدەسۋدەن كەيىن «AMANAT» پارتياسىنىڭ توراعاسى جەكە قابىلداۋ وتكىزىپ، وبلىس تۇرعىندارىمەن سويلەستى.

پالاتا سپيكەرى جۇمىس ساپارى بارىسىندا تەمىرتاۋ قالاسىنىڭ جۇرتشىلىعىمەن كەزدەستى. وندا 20 مىڭ ەمدەلۋشىگە ارنالعان جاڭادان اشىلعان ەمحاناعا باردى. ەرلان قوشانوۆ ەم قابىلدايتىن كابينەتتەردى ارالاپ، دارىگەرلەرمەن اڭگىمەلەستى. ودان كەيىن سپورت دەنە شىنىقتىرۋ-ساۋىقتىرۋ كەشەنىنە باردى.

كەزدەسۋ بارىسىندا تەمىرتاۋ قالاسىنىڭ بەلسەندىسى ولەگ گۋسەۆ قازاقستان الەمدە بولىپ جاتقان بارلىق قيىندىقتارعا قاراماستان، كوپۇلتتى قوعامدا بەيبىتشىلىك پەن كەلىسىمدى ساقتاي وتىرىپ، بارشا قيىندىقتارعا توتەپ بەرە الدى دەدى.

– ەڭ باستىسى – ىشكى ساياسي تۇراقتىلىقتى ساقتاۋ. پرەزيدەنتىمىز وتە جاۋاپتى جانە تەز شەشىم قابىلدايدى. ءبىز وعان بىرنەشە رەت كۋا بولدىق. ءبىز ونىڭ ىشكى ساياسي تۇراقتىلىق پەن ەل بىرلىگىن ساقتاۋعا باعىتتالعان ساياساتىن قولدايمىز، ­– دەدى ول.

سونىمەن قاتار ءماجىلىس توراعاسى ەرلان قوشانوۆ "لەنين" اتىنداعى شاحتا كەنشىلەرىمەن كەزدەستى. وڭىردەگى ءىرى كومىر شىعاراتىن زاماناۋي شاحتا قىزمەتىمەن تانىسقاننان كەيىن، 770 مەتر تەرەڭدىكتەگى شاحتاعا ءتۇسىپ، كەنشىلەرمەن رەفەرەندۋم تۋرالى اڭگىمەلەستى.

ءوز كەزەگىندە كەنشىلەر مەملەكەت باسشىسىنىڭ ساياساتىن قولدايتىندارىن جەتكىزىپ، 5 ماۋسىمدا وتەتىن ناۋقانعا قاتىسۋعا شاقىردى.

Abai.kz