ەكس-پرەزيدەنت نۇرسۇلتان نازارباەۆ 5 ماۋسىم كۇنى كونتيتۋتسياعا وزگەرىستەر ەنگىزۋگە بايلانىستى بولاتىن رەفەرەندۋمعا قاتىسادى جانە قازىرگى پرەزيدەنت قاسىم-جومارت توقاەۆتى تولىقتاي قولدايدى. بۇل تۋرالى ول ساياساتتانۋشى دانيار اشىمباەۆقا بەرگەن سۇحباتىندا ايتتى.  

«2019 جىلى مەن سانالى قادام جاسادىم جانە كوپشىلىكتىڭ قارسىلىعىنا قاراماستان مەملەكەت باسشىسى قىزمەتىنەن كەتتىم. حالىق قولداۋىنىڭ شىڭىنا جەتكەن ۋاقىت بولاتىن. بۇعان 2015 جىلعى سوڭعى پرەزيدەنتتىك سايلاۋدا 97,7% داۋىس العانىم دالەل بولا الادى.

ءيا، مەندە بەلگىلى ءبىر وكىلەتتىكتەر قالدى. بىراق بۇل ساياسي ءترانزيتتىڭ كەدەرگىسىز ءوتۋى ءۇشىن جانە قوعام مەن بيلىك ەليتاسى اراسىنداعى قايشىلىقتاردى جەڭىلدەتۋ ءۇشىن جاسالدى. كونستيتۋتسياعا سايكەس پرەزيدەنت رەتىندەگى وكىلەتىمدى سەنات توراعاسى بولعان قاسىم-جومارت كەمەلۇلى توقاەۆقا تاپسىردىم. ول كەيىنگى جالپىحالىقتىق سايلاۋدا جەڭىسكە جەتتى. وسى جىلدار ىشىندە مەن ونىڭ ەلىمىزدى رەفورمالاۋ مەن ودان ءارى دامىتۋ جونىندەگى ءىس-ارەكەتتەرىن جان-جاقتى قولدادىم. بۇل جولى دا كۇمانسىز قولداۋ كورسەتەمىن»، - دەدى نازارباەۆ.

نۇرسۇلتان نازارباەۆ ءوزى ەل باسقارىپ تۇرعان كەزدە اتقارىلعان جۇمىستاردى اتاپ ءوتتى.

«مەن پرەزيدەنت بولعان جىلدارى حالقىمىز كوپتەگەن جەتىستىككە قول جەتكىزدى. كەيبىرەۋلەر ونى ۇمىتىپ كەتەدى. ءبىزدىڭ  دانا حالقىمىز ءبارىن ەستە ساقتايتىنىنا سەنەمىن»، - دەدى ول.

بۇرىنعى پرەزيدەنت 2000 جىلى قۇرىلعان «نۇرسۇلتان نازارباەۆ قورى» مەن 2011 جىلى قۇرىلعان «نازارباەۆ قورى» تۋرالى ايتىپ بەردى. بۇگىنگى كۇنى «نۇرسۇلتان نازارباەۆ قورى» قارجىلاندىراتىن نازارباەۆ ۋنيۆەرسيتەتىنىڭ قارجىلىق ماسەلەسىمەن بۇرىنعى ۇقك توراعاسى كارىم ءماسىموۆ اينالىسقان.

«جوعارى وقۋ ورنىنىڭ قامقورشىلىق كەڭەسى نازارباەۆ ۋنيۆەرسيتەتىنىڭ قارجىسىن باسقارۋ، ونىڭ ينۆەستيتسيالىق قىزمەتى، سونىڭ ىشىندە ەلىمىزدىڭ جەكەلەگەن قارجى ينستيتۋتتارىمەن بايلانىستى ماسەلەلەرمەن تىكەلەي اينالىستى. كەڭەس توراعاسى سول كەزدە پرەمەر-مينيستر قىزمەتىن اتقارىپ جۇرگەن كارىم ءماسىموۆ ەدى. وسىلايشا، ونىڭ قۇزىرەتىنە ۋنيۆەرسيتەتتىڭ جانە ونىمەن بايلانىستى قۇرىلىمداردىڭ، سونىڭ ىشىندە جەكە قارجى ۇيىمدارىنىڭ قارجىلىق قىزمەتى كىردى.

كارىم ماسىموۆكە قاتىستى قازىر تەرگەۋ امالدارى جۇرگىزىلۋدە. مەنىڭ ويىمشا، قۇقىق قورعاۋ ورگاندارى ونىڭ وسى قىزمەتىنە بايلانىستى ءمان-جايدى دا انىقتايدى»، - دەدى بۇرىنعى پرەزيدەنت.

نۇرسۇلتان نازارباەۆ قاڭتار وقيعاسىنىڭ ءمان-جايىن، تارتىپسىزدىكتەردىڭ ارتىندا كىم تۇرعانىن قۇقىق قورعاۋ ورگاندارى انىقتايتىنىنا سەنىم ءبىلدىردى.

نازارباەۆ وتستاۆكاعا كەتكەننەن كەيىن كوپتەگەن مەملەكەتتىڭ باسشىلارى ەلدەرىنە قوناق ەتىپ شاقىرعان. قازىرگى كۇنى ەكس-پرەزيدەنت ولارمەن بايلانىسىپ تۇرادى ەكەن. سونداي-اق نازارباەۆ الداعى جوسپارلارىمەن ءبولىستى.

«مەنىڭ تىكەلەي قاتىسۋىممەن قۇرىلعان ەۋرازيالىق ەكونوميكالىق وداق، تۇركى مەملەكەتتەرىنىڭ ۇيىمى مەنى وسى ۇيىمداردىڭ قۇرمەتتى توراعاسى ەتىپ سايلادى. قوردىڭ جۇمىسى دا نازار اۋدارۋدى تالاپ ەتەدى. ۋاقىتىمدى جاھاندىق يادرولىق قاۋىپسىزدىك ماسەلەلەرىنە ارنايمىن. مەنىڭ جارلىعىممەن سەمەيدەگى پوليگون جابىلعاننان كەيىن قازاقستان يادرولىق قارۋسىزدانۋدىڭ كوشباسشىسى بولدى، ءبىز يادرولىق ارسەنالدان باس تارتتىق. وسىلارمەن قاتار، مەن ءومىر جولىم، قىزمەتىم تۋرالى ەستەلىكتەرمەن اينالىسىپ جاتىرمىن. مەنىڭ بۇكىل ويىم، تىلەگىم، دۇعام تەك قازاقستاننىڭ اماندىعى، تۇراقتىلىعى مەن گۇلدەنۋىنە ارنالادى. ءبىزدىڭ ۇرپاقتارىمىز ءبىز جاساعان ىستەن دە كوپ جاساسىن. ولارعا شىن جۇرەكتەن ساتتىلىك تىلەيمىن»، - دەدى نازارباەۆ.

ەكس-پرەزيدەنت نۇرسۇلتان نازارباەۆ ءوزىنىڭ قۇقىق بۇزعان تۋىستارى تۋرالى دا ايتىپتى.

«ءبىز قازاقستاندا كوپ جىلدان بەرى قۇقىقتىق مەملەكەت قۇرىپ كەلەمىز. ونىڭ نەگىزگى قاعيداسى - زاڭ بارشاعا بىردەي.

ەگەر تۋىستارىمنىڭ ءبىرى زاڭدى بۇزۋ ءۇشىن مەنىڭ اتىمدى پايدالانسا، وندا ولار ءتيىستى جاۋاپكەرشىلىككە تارتىلۋى كەرەك. كىناسى سوتتا دالەلدەنۋى كەرەك. ءاربىر ازاماتتىڭ زاڭدى قورعاۋعا قۇقىعى بار ەكەنىن ۇمىتپاعانىمىز ءجون.

راحات اليەۆكە قاتىستى وقيعا ءبارىنىڭ ەسىندە دەپ ويلايمىن. ول - مەنىڭ كۇيەۋبالام ەدى. مەنىڭ ۇلىم سياقتى بولدى، نەمەرەلەرىمنىڭ اكەسى بولدى. ول سوت تورەلىگىمەن سوتتالدى. بىراق ول قاشىپ كەتتى، ءومىرىنىڭ سوڭىنا دەيىن جاسىرىنىپ ءجۇردى. بايانسىز تاعدىر»، - دەيدى نازارباەۆ.

Abai.kz